EeseDharmaSanātana Library
24काण्ड 20 · सूक्त 24
Atharvaveda Śaunaka Kand 20, Sukta 24.
9 shlok१-९ विश्वामित्रः। इन्द्रः। गायत्री।
उप॑ नः सु॒तमा ग॑हि॒ सोम॑मिन्द्र॒ गवा॑शिरम्। हरि॑भ्यां॒ यस्ते॑ अस्म॒युः ॥१॥
१-९ viśvāmitraḥ | indraḥ | gāyatrī | upa॑ naḥ su॒tamā ga॑hi॒ soma॑mindra॒ gavā॑śiram | hari॑bhyāṃ॒ yaste॑ asma॒yuḥ || १ ||
तमि॑न्द्र॒ मद॒मा ग॑हि बर्हि॒ष्ठां ग्राव॑भिः सु॒तम्। क॒विन्न्वऽस्य तृ॒प्णवः॑ ॥२॥
tami॑ndra॒ mada॒mā ga॑hi barhi॒ṣṭhāṃ grāva॑bhiḥ su॒tam | ka॒vinnva’sya tṛ॒pṇavaḥ॑ || २ ||
इन्द्रमि॒त्था गिरो॒ ममाच्छा॑गुरिषि॒ता इ॒तः । आ॒वृते॒ सोम॑पीतये ॥३॥
indrami॒tthā giro॒ mamācchā॑guriṣi॒tā i॒taḥ | ā॒vṛte॒ soma॑pītaye || ३ ||
इन्द्रं॒ सोम॑स्य पी॒तये॒ स्तोमै॑रि॒ह ह॑वामहे । उ॒क्थेभिः॑ कु॒विदा॒गम॑त् ॥४॥
indraṃ॒ soma॑sya pī॒taye॒ stomai॑ri॒ha ha॑vāmahe | u॒kthebhiḥ॑ ku॒vidā॒gama॑t || ४ ||
इन्द्र॒ सोमाः॑ सु॒ता इ॒मे तान् द॑धिष्व शतक्रतो । ज॒ठरे॑ वाजिनीवसो ॥५॥
indra॒ somāḥ॑ su॒tā i॒me tān da॑dhiṣva śatakrato | ja॒ṭhare॑ vājinīvaso || ५ ||
वि॒द्मा हि त्वा॑ धनंज॒यं वाजे॑षु दधृ॒षं क॑वे । अधा॑ ते सु॒म्नमी॑महे ॥६॥
vi॒dmā hi tvā॑ dhanaṃja॒yaṃ vāje॑ṣu dadhṛ॒ṣaṃ ka॑ve | adhā॑ te su॒mnamī॑mahe || ६ ||
इ॒ममि॑न्द्र॒ गवा॑शिरं॒ यवा॑शिरं च नः पिब । आ॒गत्या॒ वृष॑भिः सु॒तम् ॥७॥
i॒mami॑ndra॒ gavā॑śiraṃ॒ yavā॑śiraṃ ca naḥ piba | ā॒gatyā॒ vṛṣa॑bhiḥ su॒tam || ७ ||
तुभ्येदि॑न्द्र॒ स्व ओ॒क्ये॒३ सोमं॑ चोदामि पी॒तये॑ । ए॒ष रा॑रन्तु ते हृ॒दि ॥८॥
tubhyedi॑ndra॒ sva o॒kye॒३ somaṃ॑ codāmi pī॒taye॑ | e॒ṣa rā॑rantu te hṛ॒di || ८ ||
त्वां सु॒तस्य॑ पी॒तये॑ प्र॒त्नमि॑न्द्र हवामहे । कु॒शि॒कासो॑ अव॒स्यवः॑ ॥९॥
tvāṃ su॒tasya॑ pī॒taye॑ pra॒tnami॑ndra havāmahe | ku॒śi॒kāso॑ ava॒syavaḥ॑ || ९ ||