EeseDharmaSanātana Library
137काण्ड 20 · सूक्त 137
Atharvaveda Śaunaka Kand 20, Sukta 137.
14 shlokयद्ध॒ प्राची॒रज॑ग॒न्तोरो॑ मण्डूरधाणिकीः ।
ह॒ता इन्द्र॑स्य॒ शत्र॑वः॒ सर्वे॑ बुद्बु॒दया॑शवः ॥१॥
yaddha॒ prācī॒raja॑ga॒ntoro॑ maṇḍūradhāṇikīḥ | ha॒tā indra॑sya॒ śatra॑vaḥ॒ sarve॑ budbu॒dayā॑śavaḥ || १ ||
कपृ॑न्नरः कपृ॒थमुद्द॑धातन चो॒दय॑त खु॒दत॒ वाज॑सातये ।
नि॒ष्टि॒ग्र्यः पु॒त्रमा च्या॑वयो॒तय॒ इन्द्रं॑ स॒बाध॑ इ॒ह सोम॑पीतये ॥२॥
kapṛ॑nnaraḥ kapṛ॒thamudda॑dhātana co॒daya॑ta khu॒data॒ vāja॑sātaye | ni॒ṣṭi॒gryaḥ pu॒tramā cyā॑vayo॒taya॒ indraṃ॑ sa॒bādha॑ i॒ha soma॑pītaye || २ ||
द॒धि॒क्राव्णो॑ अकारिषं जि॒ष्णोरश्व॑स्य वा॒जिनः॑ ।
सु॒र॒भि नो॒ मुखा॑ कर॒त्प्र ण॒ आयूं॑षि तारिषत् ॥३॥
da॒dhi॒krāvṇo॑ akāriṣaṃ ji॒ṣṇoraśva॑sya vā॒jinaḥ॑ | su॒ra॒bhi no॒ mukhā॑ kara॒tpra ṇa॒ āyūṃ॑ṣi tāriṣat || ३ ||
सु॒तासो॒ मधु॑मत्तमाः॒ सोमा॒ इन्द्रा॑य म॒न्दिनः॑ ।
प॒वित्र॑वन्तो अक्षरन्दे॒वान्ग॑च्छ॑न्तु वो॒ मदाः॑ ॥४॥
su॒tāso॒ madhu॑mattamāḥ॒ somā॒ indrā॑ya ma॒ndinaḥ॑ | pa॒vitra॑vanto akṣarande॒vānga॑ccha॑ntu vo॒ madāḥ॑ || ४ ||
इन्दु॒रिन्द्रा॑य पवत॒ इति॑ दे॒वासो॑ अब्रुवन्।
वा॒चस्पति॑र्मखस्यते॒ विश्व॒स्येशा॑न॒ ओज॑सा ॥५॥
indu॒rindrā॑ya pavata॒ iti॑ de॒vāso॑ abruvan | vā॒caspati॑rmakhasyate॒ viśva॒syeśā॑na॒ oja॑sā || ५ ||
स॒हस्र॑धारः पवते समु॒द्रो वा॑चमीङ्ख॒यः ।
सोमः॒ पती॑ रयी॒णां सखेन्द्र॑स्य दि॒वेदि॑वे ॥६॥
sa॒hasra॑dhāraḥ pavate samu॒dro vā॑camīṅkha॒yaḥ | somaḥ॒ patī॑ rayī॒ṇāṃ sakhendra॑sya di॒vedi॑ve || ६ ||
अव॑ द्र॒प्सो अं॑शु॒मती॑मतिष्ठदिया॒नः कृ॒ष्णो द॒शभिः॑ स॒हस्रैः॑ ।
आव॒त्तमिन्द्रः॒ शच्या॒ धम॑न्त॒मप॒स्नेहि॑तीर्नृ॒मणा॑ अधत्त ॥७॥
ava॑ dra॒pso aṃ॑śu॒matī॑matiṣṭhadiyā॒naḥ kṛ॒ṣṇo da॒śabhiḥ॑ sa॒hasraiḥ॑ | āva॒ttamindraḥ॒ śacyā॒ dhama॑nta॒mapa॒snehi॑tīrnṛ॒maṇā॑ adhatta || ७ ||
द्र॒प्सम॑पश्यं॒ विषु॑णे॒ चर॑न्तमुपह्व॒रे न॒द्यो अंशु॒मत्याः॑ ।
नभो॒ न कृ॒ष्णम॑वतस्थि॒वांस॒मिष्या॑मि वो वृषणो॒ युध्य॑ता॒जौ ॥८॥
dra॒psama॑paśyaṃ॒ viṣu॑ṇe॒ cara॑ntamupahva॒re na॒dyo aṃśu॒matyāḥ॑ | nabho॒ na kṛ॒ṣṇama॑vatasthi॒vāṃsa॒miṣyā॑mi vo vṛṣaṇo॒ yudhya॑tā॒jau || ८ ||
अध॑ द्र॒प्सो अं॑शु॒मत्या॑ उ॒पस्थेऽधा॑रयत्त॒न्वं॑ तित्विषा॒णः ।
विशो॒ अदे॑वीर॒भ्या॒३चर॑न्ती॒र्बृह॒स्पति॑ना यु॒जे॑न्द्रः॑ ससाहे ॥९॥
adha॑ dra॒pso aṃ॑śu॒matyā॑ u॒pasthe’dhā॑rayatta॒nvaṃ॑ titviṣā॒ṇaḥ | viśo॒ ade॑vīra॒bhyā॒३cara॑ntī॒rbṛha॒spati॑nā yu॒je॑ndraḥ॑ sasāhe || ९ ||
त्वं ह॒ त्यत्स॒प्तभ्यो॒ जाय॑मानोऽश॒त्रुभ्यो॑ अभवः॒ शत्रु॑रिन्द्र ।
गू॒ल्हे द्यावा॑पृथि॒वी अन्व॑विन्दो विभु॒मद्भ्यो॒ भुव॑नेभ्यो॒ रणं॑ धाः ॥१०॥
tvaṃ ha॒ tyatsa॒ptabhyo॒ jāya॑māno’śa॒trubhyo॑ abhavaḥ॒ śatru॑rindra | gū॒lhe dyāvā॑pṛthi॒vī anva॑vindo vibhu॒madbhyo॒ bhuva॑nebhyo॒ raṇaṃ॑ dhāḥ || १० ||
त्वं ह॒ त्यद॑प्रतिमा॒नमोजो॒ वज्रे॑ण वज्रिन्धृषि॒तो ज॑घन्थ ।
त्वं शुष्ण॒स्यावा॑तिरो॒ वध॑त्रै॒स्त्वं गा इ॑न्द्र॒ शच्येद॑विन्दः ॥११॥
tvaṃ ha॒ tyada॑pratimā॒namojo॒ vajre॑ṇa vajrindhṛṣi॒to ja॑ghantha | tvaṃ śuṣṇa॒syāvā॑tiro॒ vadha॑trai॒stvaṃ gā i॑ndra॒ śacyeda॑vindaḥ || ११ ||
तमिन्द्रं॑ वाजयामसि म॒हे वृ॒त्राय॒ हन्त॑वे । स वृषा॑ वृष॒भो भु॑वत् ॥१२॥
tamindraṃ॑ vājayāmasi ma॒he vṛ॒trāya॒ hanta॑ve | sa vṛṣā॑ vṛṣa॒bho bhu॑vat || १२ ||
इन्द्रः॒ स दाम॑ने कृ॒त ओजि॑ष्ठः॒ स मदे॑ हि॒तः । द्यु॒म्नी श्लो॒की स सो॒म्यः ॥१३॥
indraḥ॒ sa dāma॑ne kṛ॒ta oji॑ṣṭhaḥ॒ sa made॑ hi॒taḥ | dyu॒mnī ślo॒kī sa so॒myaḥ || १३ ||
गि॒रा वज्रो॒ न संभृ॑तः॒ सब॑लो॒ अन॑पच्युतः । व॒व॒क्ष ऋ॒ष्वो अस्तृ॑तः ॥१४॥
gi॒rā vajro॒ na saṃbhṛ॑taḥ॒ saba॑lo॒ ana॑pacyutaḥ | va॒va॒kṣa ṛ॒ṣvo astṛ॑taḥ || १४ ||