EeseDharmaSanātana Library
124काण्ड 20 · सूक्त 124
Atharvaveda Śaunaka Kand 20, Sukta 124.
6 shlokकया॑ नश्चि॒त्र आ भु॑वदू॒ती स॒दावृ॑धः॒ सखा॑ । कया॒ शचि॑ष्ठया वृ॒ता ॥१॥
kayā॑ naści॒tra ā bhu॑vadū॒tī sa॒dāvṛ॑dhaḥ॒ sakhā॑ | kayā॒ śaci॑ṣṭhayā vṛ॒tā || १ ||
कस्त्वा॑ स॒त्यो मदा॑नां॒ मंहि॑ष्ठो मत्स॒दन्ध॑सः । दृ॒ल्हा चि॑दा॒रुजे॒ वसु॑ ॥२॥
kastvā॑ sa॒tyo madā॑nāṃ॒ maṃhi॑ṣṭho matsa॒dandha॑saḥ | dṛ॒lhā ci॑dā॒ruje॒ vasu॑ || २ ||
अ॒भी षु णः॒ सखी॑नामवि॒ता ज॑रितॄ॒णाम्। श॒तं भ॑वास्यू॒तिभिः॑ ॥३॥
a॒bhī ṣu ṇaḥ॒ sakhī॑nāmavi॒tā ja॑ritṝ॒ṇām | śa॒taṃ bha॑vāsyū॒tibhiḥ॑ || ३ ||
इ॒मा नु कं॒ भुव॑ना सीषधा॒मेन्द्र॑श्च॒ विश्वे॑ च दे॒वाः ।
य॒ज्ञं च॑ नस्त॒न्वं च प्र॒जां चा॑दि॒त्यैरिन्द्रः॑ स॒ह ची॑क्लृपाति ॥४॥
i॒mā nu kaṃ॒ bhuva॑nā sīṣadhā॒mendra॑śca॒ viśve॑ ca de॒vāḥ | ya॒jñaṃ ca॑ nasta॒nvaṃ ca pra॒jāṃ cā॑di॒tyairindraḥ॑ sa॒ha cī॑klṛpāti || ४ ||
आ॒दि॒त्यैरिन्द्रः॒ सग॑णो म॒रुद्भि॑र॒स्माकं॑ भूत्ववि॒ता त॒नूना॑म्।
ह॒त्वाय॑ दे॒वा असु॑रान् यदाय॑न् दे॒वा दे॑व॒त्वम॑भि॒रक्ष॑माणाः ॥५॥
ā॒di॒tyairindraḥ॒ saga॑ṇo ma॒rudbhi॑ra॒smākaṃ॑ bhūtvavi॒tā ta॒nūnā॑m | ha॒tvāya॑ de॒vā asu॑rān yadāya॑n de॒vā de॑va॒tvama॑bhi॒rakṣa॑māṇāḥ || ५ ||
प्र॒त्यञ्च॑म॒र्कम॑नयं॒ छची॑भि॒रादित् स्व॒धामि॑षि॒रां पर्य॑पश्यन्।
अ॒या वाजं॑ दे॒वहि॑तं सनेम॒ मदे॑म श॒तहि॑माः सु॒वीराः॑ ॥६॥
pra॒tyañca॑ma॒rkama॑nayaṃ॒ chacī॑bhi॒rādit sva॒dhāmi॑ṣi॒rāṃ parya॑paśyan | a॒yā vājaṃ॑ de॒vahi॑taṃ sanema॒ made॑ma śa॒tahi॑māḥ su॒vīrāḥ॑ || ६ ||