EeseDharmaSanātana Library
107काण्ड 20 · सूक्त 107
Atharvaveda Śaunaka Kand 20, Sukta 107.
15 shlokसम॑स्य म॒न्यवे॒ विशो॒ विश्वा॑ नमन्त कु॒ष्टयः॑ । स॒मु॒द्राये॑व॒ सिन्ध॑वः ॥१॥
sama॑sya ma॒nyave॒ viśo॒ viśvā॑ namanta ku॒ṣṭayaḥ॑ | sa॒mu॒drāye॑va॒ sindha॑vaḥ || १ ||
ओज॒स्तद॑स्य तित्विष उ॒भे यत् स॒मव॑र्तयत्। इन्द्र॒श्चर्मे॑व॒ रोद॑सी ॥२॥
oja॒stada॑sya titviṣa u॒bhe yat sa॒mava॑rtayat | indra॒ścarme॑va॒ roda॑sī || २ ||
वि चिद् वृ॒त्रस्य॒ दोध॑तो॒ वज्रे॑ण श॒तप॑र्वणा । शिरो॑ बिभेद् वृ॒ष्णिना॑ ॥३॥
vi cid vṛ॒trasya॒ dodha॑to॒ vajre॑ṇa śa॒tapa॑rvaṇā | śiro॑ bibhed vṛ॒ṣṇinā॑ || ३ ||
तदिदा॑स॒ भुव॑नेषु॒ ज्येष्ठं॒ यतो॑ ज॒ज्ञ उ॒ग्रस्त्वे॒षनृ॑म्णः ।
स॒द्यो ज॑ज्ञा॒नो नि रि॑णाति॒ शत्रू॒ननु॒ यदे॑नं॒ मद॑न्ति॒ विश्व॒ ऊमाः॑ ॥४॥
tadidā॑sa॒ bhuva॑neṣu॒ jyeṣṭhaṃ॒ yato॑ ja॒jña u॒grastve॒ṣanṛ॑mṇaḥ | sa॒dyo ja॑jñā॒no ni ri॑ṇāti॒ śatrū॒nanu॒ yade॑naṃ॒ mada॑nti॒ viśva॒ ūmāḥ॑ || ४ ||
वा॒वृ॒धा॒नः शव॑सा॒ भूर्यो॑जाः॒ शत्रु॑र्दा॒साय॑ भि॒यसं॑ दधाति ।
अव्य॑नच्च व्य॒नच्च॒ सस्नि॒ सं ते॑ नवन्त॒ प्रभृ॑ता॒ मदे॑षु ॥५॥
vā॒vṛ॒dhā॒naḥ śava॑sā॒ bhūryo॑jāḥ॒ śatru॑rdā॒sāya॑ bhi॒yasaṃ॑ dadhāti | avya॑nacca vya॒nacca॒ sasni॒ saṃ te॑ navanta॒ prabhṛ॑tā॒ made॑ṣu || ५ ||
त्वे क्रतु॒मपि॑ पृञ्चन्ति॒ भूरि॒ द्विर्यदे॒ते त्रिर्भव॒न्त्यूमाः॑ ।
स्वा॒दोः स्वादी॑यः स्वा॒दुना॑ सृजा॒ सम॒दः सु मधु॒ मधु॑ना॒भि यो॑धीः ॥६॥
tve kratu॒mapi॑ pṛñcanti॒ bhūri॒ dviryade॒te trirbhava॒ntyūmāḥ॑ | svā॒doḥ svādī॑yaḥ svā॒dunā॑ sṛjā॒ sama॒daḥ su madhu॒ madhu॑nā॒bhi yo॑dhīḥ || ६ ||
यदि॑ चि॒न्नु त्वा॒ धना॒ जय॑न्तं॒ रणे॑रणे अनु॒मद॑न्ति॒ विप्राः॑ ।
ओजी॑यः शुष्मिन्त्स्थि॒रमा त॑नुष्व॒ मा त्वा॑ दभन् दु॒रेवा॑सः क॒शोकाः॑ ॥७॥
yadi॑ ci॒nnu tvā॒ dhanā॒ jaya॑ntaṃ॒ raṇe॑raṇe anu॒mada॑nti॒ viprāḥ॑ | ojī॑yaḥ śuṣmintsthi॒ramā ta॑nuṣva॒ mā tvā॑ dabhan du॒revā॑saḥ ka॒śokāḥ॑ || ७ ||
त्वया॑ व॒यं शा॑शद्महे॒ रणे॑षु प्र॒पश्य॑न्तो यु॒धेन्या॑नि॒ भूरि॑ ।
चो॒दया॑मि त॒ आयु॑धा॒ वचो॑भिः॒ सं ते॑ शिशामि॒ ब्रह्म॑णा॒ वयां॑सि ॥८॥
tvayā॑ va॒yaṃ śā॑śadmahe॒ raṇe॑ṣu pra॒paśya॑nto yu॒dhenyā॑ni॒ bhūri॑ | co॒dayā॑mi ta॒ āyu॑dhā॒ vaco॑bhiḥ॒ saṃ te॑ śiśāmi॒ brahma॑ṇā॒ vayāṃ॑si || ८ ||
नितद् द॑धि॒षेऽव॑रे॒ परे॑ च॒ यस्मि॒न्नावि॒थाव॑सा दुरो॒णे।
आ स्था॑पयत मा॒तरं॑ जिग॒त्नुमत॑ इन्वत॒ कर्व॑राणि॒ भूरि॑ ॥९॥
nitad da॑dhi॒ṣe’va॑re॒ pare॑ ca॒ yasmi॒nnāvi॒thāva॑sā duro॒ṇe | ā sthā॑payata mā॒taraṃ॑ jiga॒tnumata॑ invata॒ karva॑rāṇi॒ bhūri॑ || ९ ||
स्तु॒ष्व व॑र्ष्मन् पुरु॒वर्त्मा॑नं॒ समृभ्वा॑णमि॒नत॑ममा॒प्तमा॒प्त्याना॑म्।
आ द॑र्शति॒ शव॑सा॒ भूर्यो॑जाः॒ प्र स॑क्षति प्रति॒मानं॑ पृथि॒व्याः ॥१०॥
stu॒ṣva va॑rṣman puru॒vartmā॑naṃ॒ samṛbhvā॑ṇami॒nata॑mamā॒ptamā॒ptyānā॑m | ā da॑rśati॒ śava॑sā॒ bhūryo॑jāḥ॒ pra sa॑kṣati prati॒mānaṃ॑ pṛthi॒vyāḥ || १० ||
इ॒मा ब्रह्म॑ बृ॒हद्दि॑वः कृणव॒दिन्द्रा॑य शू॒षम॑ग्नि॒यः स्व॒र्षाः ।
म॒हो गो॒त्रस्य॑ क्षयति स्व॒राजा॒ तुर॑श्चि॒द् विश्व॑मर्णव॒त् तप॑स्वान् ॥११॥
i॒mā brahma॑ bṛ॒haddi॑vaḥ kṛṇava॒dindrā॑ya śū॒ṣama॑gni॒yaḥ sva॒rṣāḥ | ma॒ho go॒trasya॑ kṣayati sva॒rājā॒ tura॑ści॒d viśva॑marṇava॒t tapa॑svān || ११ ||
ए॒वा म॒हान् बृ॒हद्दि॑वो॒ अथ॒र्वावो॑च॒त् स्वां त॒न्व॑१मिन्द्र॑मे॒व।
स्वसा॑रौ मात॒रिभ्व॑री अरि॒प्रे हि॒न्वन्ति॑ चैने॒ शव॑सा व॒र्धय॑न्ति च ॥१२॥
e॒vā ma॒hān bṛ॒haddi॑vo॒ atha॒rvāvo॑ca॒t svāṃ ta॒nva॑१mindra॑me॒va | svasā॑rau māta॒ribhva॑rī ari॒pre hi॒nvanti॑ caine॒ śava॑sā va॒rdhaya॑nti ca || १२ ||
चि॒त्रं दे॒वानां॑ के॒तुरनी॑कं॒ ज्योति॑ष्मान् प्र॒दिशः॒ सूर्य॑ उ॒द्यन्।
दि॒वा॒क॒रोऽति॑ द्यु॒म्नैस्तमां॑सि॒ विश्वा॑तारीद् दुरि॒तानि॑ शु॒क्रः ॥१३॥
ci॒traṃ de॒vānāṃ॑ ke॒turanī॑kaṃ॒ jyoti॑ṣmān pra॒diśaḥ॒ sūrya॑ u॒dyan | di॒vā॒ka॒ro’ti॑ dyu॒mnaistamāṃ॑si॒ viśvā॑tārīd duri॒tāni॑ śu॒kraḥ || १३ ||
चि॒त्रं दे॒वाना॒मुद॑गा॒दनी॑कं॒ चक्षु॑र्मि॒त्रस्य॒ वरु॑णस्या॒ग्नेः ।
आप्रा॒द् द्यावा॑पृथि॒वी अ॒न्तरि॑क्षं॒ सूर्य॑ आ॒त्मा जग॑तस्त॒स्थुष॑श्च ॥१४॥
ci॒traṃ de॒vānā॒muda॑gā॒danī॑kaṃ॒ cakṣu॑rmi॒trasya॒ varu॑ṇasyā॒gneḥ | āprā॒d dyāvā॑pṛthi॒vī a॒ntari॑kṣaṃ॒ sūrya॑ ā॒tmā jaga॑tasta॒sthuṣa॑śca || १४ ||
सूर्यो॑ दे॒वीमु॒षसं॒ रोच॑मानां॒ मर्यो॒ न योषा॑म॒भ्येति प॒श्चात्।
यत्रा॒ नरो॑ देव॒यन्तो॑ यु॒गानि॑ वितन्व॒ते प्रति॑ भ॒द्राय॑ भ॒द्रम् ॥१५॥
sūryo॑ de॒vīmu॒ṣasaṃ॒ roca॑mānāṃ॒ maryo॒ na yoṣā॑ma॒bhyeti pa॒ścāt | yatrā॒ naro॑ deva॒yanto॑ yu॒gāni॑ vitanva॒te prati॑ bha॒drāya॑ bha॒dram || १५ ||