EeseDharmaSanātana Library
5काण्ड 2 · सूक्त 5
Atharvaveda Śaunaka Kand 2, Sukta 5.
7 shlokइन्द्र॑ जु॒षस्व॒ प्र व॒हा या॑हि शूर॒ हरि॑भ्याम्।
पिबा॑ सु॒तस्य॑ म॒तेरि॒ह मधो॑श्चका॒नश्चारु॒र्मदा॑य ॥१॥
indra॑ ju॒ṣasva॒ pra va॒hā yā॑hi śūra॒ hari॑bhyām | pibā॑ su॒tasya॑ ma॒teri॒ha madho॑ścakā॒naścāru॒rmadā॑ya || १ ||
इन्द्र॑ ज॒ठरं॑ न॒व्यो न पृ॒णस्व॒ मधो॑र्दि॒वो न।
अ॒स्य सु॒तस्य॒ स्व॑१र्णोप॑ त्वा॒ मदाः॑ सु॒वाचो॑ अगुः ॥२॥
indra॑ ja॒ṭharaṃ॑ na॒vyo na pṛ॒ṇasva॒ madho॑rdi॒vo na | a॒sya su॒tasya॒ sva॑१rṇopa॑ tvā॒ madāḥ॑ su॒vāco॑ aguḥ || २ ||
इन्द्र॑स्तुरा॒षाण्मि॒त्रो वृ॒त्रं यो ज॒घान॑ य॒तीर्न।
बि॒भेद॑ व॒लं भृगु॒र्न स॑सहे॒ शत्रू॒न् मदे॒ सोम॑स्य ॥३॥
indra॑sturā॒ṣāṇmi॒tro vṛ॒traṃ yo ja॒ghāna॑ ya॒tīrna | bi॒bheda॑ va॒laṃ bhṛgu॒rna sa॑sahe॒ śatrū॒n made॒ soma॑sya || ३ ||
आ त्वा॑ विशन्तु सु॒तास॑ इन्द्र पृ॒णस्व॑ कु॒क्षी वि॒ड्ढि श॑क्र धि॒येह्या नः॑ ।
श्रु॒धी हवं॒ गिरो॑ मे जुष॒स्वेन्द्र॑ स्व॒युग्भि॒र्मत्स्वे॒ह म॒हे रणा॑य ॥४॥
ā tvā॑ viśantu su॒tāsa॑ indra pṛ॒ṇasva॑ ku॒kṣī vi॒ḍḍhi śa॑kra dhi॒yehyā naḥ॑ | śru॒dhī havaṃ॒ giro॑ me juṣa॒svendra॑ sva॒yugbhi॒rmatsve॒ha ma॒he raṇā॑ya || ४ ||
इन्द्र॑स्य॒ नु प्रा वो॑चं वी॒र्याऽणि॒ यानि॑ च॒कार॑ प्रथ॒मानि॑ व॒ज्री।
अह॒न्नहि॒मन्व॒पस्त॑तर्द॒ प्र व॒क्षणा॑ अभिन॒त् पर्व॑तानाम् ॥५॥
indra॑sya॒ nu prā vo॑caṃ vī॒ryā’ṇi॒ yāni॑ ca॒kāra॑ pratha॒māni॑ va॒jrī | aha॒nnahi॒manva॒pasta॑tarda॒ pra va॒kṣaṇā॑ abhina॒t parva॑tānām || ५ ||
अह॒न्नहिं॒ पर्व॑ते शिश्रिया॒णं त्वष्टा॑स्मै॒ वज्रं॑ स्व॒र्यं ऽ ततक्ष ।
वा॒श्रा इ॑व धे॒नवः॒ स्यन्द॑माना॒ अञ्जः॑ समु॒द्रमव॑ जग्मु॒रापः॑ ॥६॥
aha॒nnahiṃ॒ parva॑te śiśriyā॒ṇaṃ tvaṣṭā॑smai॒ vajraṃ॑ sva॒ryaṃ ’ tatakṣa | vā॒śrā i॑va dhe॒navaḥ॒ syanda॑mānā॒ añjaḥ॑ samu॒dramava॑ jagmu॒rāpaḥ॑ || ६ ||
वृषा॒यमा॑णो अवृणीत॒ सोमं॒ त्रिक॑द्रुकेष्वपिबत् सु॒तस्य॑ ।
आ साय॑कं म॒घवा॑दत्त॒ वज्र॒मह॑न्नेनं प्रथम॒जामही॑नाम् ॥७॥
vṛṣā॒yamā॑ṇo avṛṇīta॒ somaṃ॒ trika॑drukeṣvapibat su॒tasya॑ | ā sāya॑kaṃ ma॒ghavā॑datta॒ vajra॒maha॑nnenaṃ prathama॒jāmahī॑nām || ७ ||