EeseDharmaSanātana Library
4काण्ड 2 · सूक्त 4
Atharvaveda Śaunaka Kand 2, Sukta 4.
6 shlokदी॒र्घा॒यु॒त्वाय॑ बृह॒ते रणा॒यारि॑ष्यन्तो॒ दक्ष॑माणाः॒ सदै॒व।
म॒णिं वि॑ष्कन्ध॒दूष॑णं जङ्गि॒डं बि॑भृमो व॒यम् ॥१॥
dī॒rghā॒yu॒tvāya॑ bṛha॒te raṇā॒yāri॑ṣyanto॒ dakṣa॑māṇāḥ॒ sadai॒va | ma॒ṇiṃ vi॑ṣkandha॒dūṣa॑ṇaṃ jaṅgi॒ḍaṃ bi॑bhṛmo va॒yam || १ ||
जङ्गि॒डो ज॒म्भाद् वि॑श॒राद् विष्क॑न्धादभि॒शोच॑नात्।
म॒णिः स॒हस्र॑वीर्यः॒ परि॑ णः पातु वि॒श्वतः॑ ॥२॥
jaṅgi॒ḍo ja॒mbhād vi॑śa॒rād viṣka॑ndhādabhi॒śoca॑nāt | ma॒ṇiḥ sa॒hasra॑vīryaḥ॒ pari॑ ṇaḥ pātu vi॒śvataḥ॑ || २ ||
अ॒यं विष्क॑न्धं सहते॒ऽयं बा॑धते अ॒त्त्रिणः॑ ।
अ॒यं नो॑ वि॒श्वभे॑षजो जङ्गि॒डः पा॒त्वंह॑सः ॥३॥
a॒yaṃ viṣka॑ndhaṃ sahate॒’yaṃ bā॑dhate a॒ttriṇaḥ॑ | a॒yaṃ no॑ vi॒śvabhe॑ṣajo jaṅgi॒ḍaḥ pā॒tvaṃha॑saḥ || ३ ||
दे॒वैर्द॒त्तेन॑ म॒णिना॑ जङ्गि॒डेन॑ मयो॒भुवा॑ ।
विष्क॑न्धं॒ सर्वा॒ रक्षां॑सि व्याया॒मे स॑हामहे ॥४॥
de॒vairda॒ttena॑ ma॒ṇinā॑ jaṅgi॒ḍena॑ mayo॒bhuvā॑ | viṣka॑ndhaṃ॒ sarvā॒ rakṣāṃ॑si vyāyā॒me sa॑hāmahe || ४ ||
श॒णश्च॑ मा जङ्गि॒डश्च॒ विष्क॑न्धाद॒भि र॑क्षताम्।
अर॑ण्याद॒न्य आभृ॑तः कृ॒ष्या अ॒न्यो रसे॑भ्यः ॥५॥
śa॒ṇaśca॑ mā jaṅgi॒ḍaśca॒ viṣka॑ndhāda॒bhi ra॑kṣatām | ara॑ṇyāda॒nya ābhṛ॑taḥ kṛ॒ṣyā a॒nyo rase॑bhyaḥ || ५ ||
कृ॒त्या॒दूषि॑र॒यं म॒णिरथो॑ अराति॒दूषिः॑ ।
अथो॒ सह॑स्वान् जङ्गि॒डः प्र ण॒ आयुं॑षि तारिषत् ॥६॥
kṛ॒tyā॒dūṣi॑ra॒yaṃ ma॒ṇiratho॑ arāti॒dūṣiḥ॑ | atho॒ saha॑svān jaṅgi॒ḍaḥ pra ṇa॒ āyuṃ॑ṣi tāriṣat || ६ ||