EeseDharmaSanātana Library
27काण्ड 2 · सूक्त 27
Atharvaveda Śaunaka Kand 2, Sukta 27.
7 shlokनेच्छत्रुः॒ प्राशं॑ जयाति॒ सह॑मानाभि॒भूर॑सि ।
प्राशं॒ प्रति॑प्राशो जह्यर॒सान् कृ॑न्वोषधे ॥१॥
necchatruḥ॒ prāśaṃ॑ jayāti॒ saha॑mānābhi॒bhūra॑si | prāśaṃ॒ prati॑prāśo jahyara॒sān kṛ॑nvoṣadhe || १ ||
सु॒प॒र्णस्त्वान्व॑विन्दत् सूक॒रस्त्वा॑खनन्न॒सा।
प्राशं॒ प्रति॑प्राशो जह्यर॒सान् कृ॑ण्वोषधे ॥२॥
su॒pa॒rṇastvānva॑vindat sūka॒rastvā॑khananna॒sā | prāśaṃ॒ prati॑prāśo jahyara॒sān kṛ॑ṇvoṣadhe || २ ||
इन्द्रो॑ ह चक्रे त्वा बा॒हावसु॑रेभ्य॒ स्तरी॑तवे ।
प्राशं॒ प्रति॑प्राशो जह्यर॒सान् कृ॑ण्वोषधे ॥३॥
indro॑ ha cakre tvā bā॒hāvasu॑rebhya॒ starī॑tave | prāśaṃ॒ prati॑prāśo jahyara॒sān kṛ॑ṇvoṣadhe || ३ ||
पा॒टामिन्द्रो॒ व्याऽश्ना॒दसु॑रेभ्य॒ स्तरी॑तवे ।
प्राशं॒ प्रति॑प्राशो जह्यर॒सान् कृ॑ण्वोषधे ॥४॥
pā॒ṭāmindro॒ vyā’śnā॒dasu॑rebhya॒ starī॑tave | prāśaṃ॒ prati॑prāśo jahyara॒sān kṛ॑ṇvoṣadhe || ४ ||
तया॒हं शत्रू॑न्त्साक्ष॒ इन्द्रः॑ सालावृ॒काँ इ॑व ।
प्राशं॒ प्रति॑प्राशो जह्यर॒सान् कृ॑ण्वोषधे ॥५॥
tayā॒haṃ śatrū॑ntsākṣa॒ indraḥ॑ sālāvṛ॒kām̐ i॑va | prāśaṃ॒ prati॑prāśo jahyara॒sān kṛ॑ṇvoṣadhe || ५ ||
रुद्र॒ जला॑षभेषज॒ नील॑शिखण्ड॒ कर्म॑कृत्।
प्राशं॒ प्रति॑प्राशो जह्यर॒सान् कृ॑ण्वोषधे ॥६॥
rudra॒ jalā॑ṣabheṣaja॒ nīla॑śikhaṇḍa॒ karma॑kṛt | prāśaṃ॒ prati॑prāśo jahyara॒sān kṛ॑ṇvoṣadhe || ६ ||
तस्य॒ प्राशं॒ त्वं ज॑हि॒ यो न॑ इन्द्राभि॒दास॑ति ।
अधि॑ नो ब्रूहि॒ शक्ति॑भिः प्रा॒शि मामुत्त॑रं कृधि ॥७॥
tasya॒ prāśaṃ॒ tvaṃ ja॑hi॒ yo na॑ indrābhi॒dāsa॑ti | adhi॑ no brūhi॒ śakti॑bhiḥ prā॒śi māmutta॑raṃ kṛdhi || ७ ||