EeseDharmaSanātana Library
11काण्ड 2 · सूक्त 11
Atharvaveda Śaunaka Kand 2, Sukta 11.
5 shlokदूष्या॒ दूषि॑रसि हे॒त्या हे॒तिर॑सि मे॒न्या मे॒निर॑सि ।
आ॒प्नु॒हि श्रेयां॑स॒मति॑ स॒मं क्रा॑म ॥१॥
dūṣyā॒ dūṣi॑rasi he॒tyā he॒tira॑si me॒nyā me॒nira॑si | ā॒pnu॒hi śreyāṃ॑sa॒mati॑ sa॒maṃ krā॑ma || १ ||
स्र॒क्त्योऽसि प्रतिस॒रोऽसि प्रत्यभि॒चर॑णोऽसि ।
आ॒प्नु॒हि श्रेयां॑स॒मति॑ स॒मं क्रा॑म ॥२॥
sra॒ktyo’si pratisa॒ro’si pratyabhi॒cara॑ṇo’si | ā॒pnu॒hi śreyāṃ॑sa॒mati॑ sa॒maṃ krā॑ma || २ ||
प्रति॒ तम॒भि च॑र॒ यो॒ऽस्मान् द्वेष्टि॒ यं व॒यं द्वि॒ष्मः ।
आ॒प्नु॒हि श्रेयां॑स॒मति॑ स॒मं क्रा॑म ॥३॥
prati॒ tama॒bhi ca॑ra॒ yo॒’smān dveṣṭi॒ yaṃ va॒yaṃ dvi॒ṣmaḥ | ā॒pnu॒hi śreyāṃ॑sa॒mati॑ sa॒maṃ krā॑ma || ३ ||
सू॒रिर॑सि वर्चो॒धा अ॑सि तनू॒पानोऽसि ।
आ॒प्नु॒हि श्रेयां॑स॒मति॑ स॒मं क्रा॑म ॥४॥
sū॒rira॑si varco॒dhā a॑si tanū॒pāno’si | ā॒pnu॒hi śreyāṃ॑sa॒mati॑ sa॒maṃ krā॑ma || ४ ||
शु॒क्रोऽसि भ्रा॒जोऽसि॒ स्वऽरसि॒ ज्योति॑रसि ।
आ॒प्नु॒हि श्रेयां॑स॒मति॑ स॒मं क्रा॑म ॥५॥
śu॒kro’si bhrā॒jo’si॒ sva’rasi॒ jyoti॑rasi | ā॒pnu॒hi śreyāṃ॑sa॒mati॑ sa॒maṃ krā॑ma || ५ ||