EeseDharmaSanātana Library
1काण्ड 2 · सूक्त 1
Atharvaveda Śaunaka Kand 2, Sukta 1.
5 shlokवे॒नस्तत् प॑श्यत् पर॒मं गुहा॒ यद् यत्र॒ विश्वं॒ भव॒त्येक॑रूपम्।
इ॒दं पृश्नि॑रदुह॒ज्जाय॑मानाः स्व॒र्विदो॑ अ॒भ्यऽनूषत॒ व्राः ॥१॥
ve॒nastat pa॑śyat para॒maṃ guhā॒ yad yatra॒ viśvaṃ॒ bhava॒tyeka॑rūpam | i॒daṃ pṛśni॑raduha॒jjāya॑mānāḥ sva॒rvido॑ a॒bhya’nūṣata॒ vrāḥ || १ ||
प्र तद् वो॑चेद॒मृत॑स्य वि॒द्वान् ग॑न्ध॒र्वो धाम॑ पर॒मं गुहा॒ यत्।
त्रीणि॑ प॒दानि॒ निहि॑ता॒ गुहा॑स्य॒ यस्तानि॒ वेद॒ स पि॒तुष्पि॒तास॑त् ॥२॥
pra tad vo॑ceda॒mṛta॑sya vi॒dvān ga॑ndha॒rvo dhāma॑ para॒maṃ guhā॒ yat | trīṇi॑ pa॒dāni॒ nihi॑tā॒ guhā॑sya॒ yastāni॒ veda॒ sa pi॒tuṣpi॒tāsa॑t || २ ||
स नः॑ पि॒ता ज॑नि॒ता स उ॒त बन्धु॒र्धामा॑नि वेद॒ भुव॑नानि॒ विश्वा॑ ।
यो दे॒वानां॑ नाम॒ध एक॑ ए॒व तं सं॑प्र॒श्नं भुव॑ना यन्ति॒ सर्वा॑ ॥३॥
sa naḥ॑ pi॒tā ja॑ni॒tā sa u॒ta bandhu॒rdhāmā॑ni veda॒ bhuva॑nāni॒ viśvā॑ | yo de॒vānāṃ॑ nāma॒dha eka॑ e॒va taṃ saṃ॑pra॒śnaṃ bhuva॑nā yanti॒ sarvā॑ || ३ ||
परि॒ द्यावा॑पृथि॒वी स॒द्य आ॑य॒मुपा॑तिष्ठे प्रथम॒जामृ॒तस्य॑ ।
वाच॑मिव व॒क्तरि॑ भुवने॒ष्ठा धा॒स्युरे॒ष न॒न्वे॒३षो अ॒ग्निः ॥४॥
pari॒ dyāvā॑pṛthi॒vī sa॒dya ā॑ya॒mupā॑tiṣṭhe prathama॒jāmṛ॒tasya॑ | vāca॑miva va॒ktari॑ bhuvane॒ṣṭhā dhā॒syure॒ṣa na॒nve॒३ṣo a॒gniḥ || ४ ||
परि॒ विश्वा॒ भुव॑नान्यायमृ॒तस्य॒ तन्तुं॒ वित॑तं दृ॒शे कम्।
यत्र॑ दे॒वा अ॒मृत॑मानशा॒नाः स॑मा॒ने योना॒वध्यैर॑यन्त ॥५॥
pari॒ viśvā॒ bhuva॑nānyāyamṛ॒tasya॒ tantuṃ॒ vita॑taṃ dṛ॒śe kam | yatra॑ de॒vā a॒mṛta॑mānaśā॒nāḥ sa॑mā॒ne yonā॒vadhyaira॑yanta || ५ ||