EeseDharmaSanātana Library
7काण्ड 19 · सूक्त 7
Atharvaveda Śaunaka Kand 19, Sukta 7.
5 shlokचि॒त्राणि॑ सा॒कं दि॒वि रो॑च॒नानि॑ सरीसृ॒पाणि॒ भुव॑ने ज॒वानि॑ ।
तु॒र्मिशं॑ सुम॒तिमि॒च्छमा॑नो॒ अहा॑नि गी॒र्भिः स॑प॒र्यामि॒ नाक॑म् ॥१॥
ci॒trāṇi॑ sā॒kaṃ di॒vi ro॑ca॒nāni॑ sarīsṛ॒pāṇi॒ bhuva॑ne ja॒vāni॑ | tu॒rmiśaṃ॑ suma॒timi॒cchamā॑no॒ ahā॑ni gī॒rbhiḥ sa॑pa॒ryāmi॒ nāka॑m || १ ||
सु॒हव॑मग्ने॒ कृत्ति॑का॒ रोहि॑णी॒ चास्तु॑ भ॒द्रं मृ॒गशि॑रः॒ शमा॒र्द्रा।
पुन॑र्वसू सू॒नृता॒ चारु॒ पुष्यो॑ भा॒नुरा॑श्ले॒षा अय॑नं म॒घा मे ॥२॥
su॒hava॑magne॒ kṛtti॑kā॒ rohi॑ṇī॒ cāstu॑ bha॒draṃ mṛ॒gaśi॑raḥ॒ śamā॒rdrā | puna॑rvasū sū॒nṛtā॒ cāru॒ puṣyo॑ bhā॒nurā॑śle॒ṣā aya॑naṃ ma॒ghā me || २ ||
पुण्यं॒ पूर्वा॒ फल्गु॑न्यौ॒ चात्र॒ हस्त॑श्चि॒त्रा शि॒वा स्वा॒ति सु॒खो मे॑ अस्तु ।
राधे॑ वि॒शाखे॑ सु॒हवा॑नुरा॒धा ज्येष्ठा॑ सु॒नक्ष॑त्र॒मरि॑ष्ट॒ मूल॑म् ॥३॥
puṇyaṃ॒ pūrvā॒ phalgu॑nyau॒ cātra॒ hasta॑ści॒trā śi॒vā svā॒ti su॒kho me॑ astu | rādhe॑ vi॒śākhe॑ su॒havā॑nurā॒dhā jyeṣṭhā॑ su॒nakṣa॑tra॒mari॑ṣṭa॒ mūla॑m || ३ ||
अन्नं॒ पूर्वा॑ रासतां मे अषा॒ढा ऊर्जं॑ दे॒व्युत्त॑रा॒ आ व॑हन्तु ।
अ॒भि॒जिन्मे॑ रासतां॒ पुण्य॑मे॒व श्रव॑णः॒ श्रवि॑ष्ठाः कुर्वतां सुपु॒ष्टिम् ॥४॥
annaṃ॒ pūrvā॑ rāsatāṃ me aṣā॒ḍhā ūrjaṃ॑ de॒vyutta॑rā॒ ā va॑hantu | a॒bhi॒jinme॑ rāsatāṃ॒ puṇya॑me॒va śrava॑ṇaḥ॒ śravi॑ṣṭhāḥ kurvatāṃ supu॒ṣṭim || ४ ||
आ मे॑ म॒हच्छ॒तभि॑ष॒ग् वरी॑य॒ आ मे॑ द्व॒या प्रोष्ठ॑पदा सु॒शर्म॑ ।
आ रे॒वती॑ चाश्व॒युजौ॒ भगं॑ म॒ आ मे॑ र॒यिं भर॑ण्य॒ आ व॑हन्तु ॥५॥
ā me॑ ma॒haccha॒tabhi॑ṣa॒g varī॑ya॒ ā me॑ dva॒yā proṣṭha॑padā su॒śarma॑ | ā re॒vatī॑ cāśva॒yujau॒ bhagaṃ॑ ma॒ ā me॑ ra॒yiṃ bhara॑ṇya॒ ā va॑hantu || ५ ||