EeseDharmaSanātana Library
58काण्ड 19 · सूक्त 58
Atharvaveda Śaunaka Kand 19, Sukta 58.
6 shlokघृ॒तस्य॑ जू॒तिः सम॑ना॒ सदे॑वा संवत्स॒रं ह॒विषा॑ व॒र्धय॑न्ती ।
श्रोत्रं॒ चक्षुः॑ प्रा॒णोच्छि॑न्नो नो अ॒स्त्वच्छि॑न्ना व॒यमायु॑षो॒ वर्च॑सः ॥१॥
ghṛ॒tasya॑ jū॒tiḥ sama॑nā॒ sade॑vā saṃvatsa॒raṃ ha॒viṣā॑ va॒rdhaya॑ntī | śrotraṃ॒ cakṣuḥ॑ prā॒ṇocchi॑nno no a॒stvacchi॑nnā va॒yamāyu॑ṣo॒ varca॑saḥ || १ ||
उपा॒स्मान् प्रा॒णो ह्व॑यता॒मुप॑ व॒यं प्रा॒णं ह॑वामहे ।
वर्चो॑ जग्राह पृथि॒व्य॑१न्तरि॑क्षं॒ वर्चः॒ सोमो॒ बृह॒स्पति॑र्विध॒त्ता ॥२॥
upā॒smān prā॒ṇo hva॑yatā॒mupa॑ va॒yaṃ prā॒ṇaṃ ha॑vāmahe | varco॑ jagrāha pṛthi॒vya॑१ntari॑kṣaṃ॒ varcaḥ॒ somo॒ bṛha॒spati॑rvidha॒ttā || २ ||
वर्च॑सो॒ द्यावा॑पृथि॒वी सं॒ग्रह॑णी बभू॒वथु॒र्वर्चो॑ गृही॒त्वा पृ॑थि॒वीमनु॒ सं च॑रेम ।
य॒शसं॒ गावो॒ गोप॑ति॒मुप॑ तिष्ठन्त्याय॒तीर्यशो॑ गृही॒त्वा पृ॑थि॒वीमनु॒ सं च॑रेम ॥३॥
varca॑so॒ dyāvā॑pṛthi॒vī saṃ॒graha॑ṇī babhū॒vathu॒rvarco॑ gṛhī॒tvā pṛ॑thi॒vīmanu॒ saṃ ca॑rema | ya॒śasaṃ॒ gāvo॒ gopa॑ti॒mupa॑ tiṣṭhantyāya॒tīryaśo॑ gṛhī॒tvā pṛ॑thi॒vīmanu॒ saṃ ca॑rema || ३ ||
व्र॒जं कृ॑णुध्वं॒ स हि वो॑ नृ॒पाणो॒ वर्मा॑ सीव्यध्वं बहु॒ला पृ॒थूनि॑ ।
पुरः॑ कृणुध्व॒माय॑सी॒रधृ॑ष्टा॒ मा वः॑ सुस्रोच्चम॒सो दृं॑हता॒ तम् ॥४॥
vra॒jaṃ kṛ॑ṇudhvaṃ॒ sa hi vo॑ nṛ॒pāṇo॒ varmā॑ sīvyadhvaṃ bahu॒lā pṛ॒thūni॑ | puraḥ॑ kṛṇudhva॒māya॑sī॒radhṛ॑ṣṭā॒ mā vaḥ॑ susroccama॒so dṛṃ॑hatā॒ tam || ४ ||
य॒ज्ञस्य॒ चक्षुः॒ प्रभृ॑ति॒र्मुखं॑ च वा॒चा श्रोत्रे॑ण॒ मन॑सा जुहोमि ।
इ॒मं य॒ज्ञं वित॑तं वि॒श्वक॑र्म॒णा दे॒वा य॑न्तु सुमन॒स्यमा॑नाः ॥५॥
ya॒jñasya॒ cakṣuḥ॒ prabhṛ॑ti॒rmukhaṃ॑ ca vā॒cā śrotre॑ṇa॒ mana॑sā juhomi | i॒maṃ ya॒jñaṃ vita॑taṃ vi॒śvaka॑rma॒ṇā de॒vā ya॑ntu sumana॒syamā॑nāḥ || ५ ||
ये दे॒वाना॑मृ॒त्विजो॒ ये च॑ य॒ज्ञिया॒ येभ्यो॑ ह॒व्यं क्रि॒यते॑ भाग॒धेय॑म्।
इ॒मं य॒ज्ञं स॒ह पत्नी॑भि॒रेत्य॒ याव॑न्तो दे॒वास्त॑वि॒षा मा॑दयन्ताम् ॥६॥
ye de॒vānā॑mṛ॒tvijo॒ ye ca॑ ya॒jñiyā॒ yebhyo॑ ha॒vyaṃ kri॒yate॑ bhāga॒dheya॑m | i॒maṃ ya॒jñaṃ sa॒ha patnī॑bhi॒retya॒ yāva॑nto de॒vāsta॑vi॒ṣā mā॑dayantām || ६ ||