EeseDharmaSanātana Library
54काण्ड 19 · सूक्त 54
Atharvaveda Śaunaka Kand 19, Sukta 54.
5 shlokका॒लादापः॒ सम॑भवन् का॒लाद् ब्रह्म॒ तपो॒ दिशः॑ ।
का॒लेनोदे॑ति॒ सूर्यः॑ का॒ले नि वि॑शते॒ पुनः॑ ॥१॥
kā॒lādāpaḥ॒ sama॑bhavan kā॒lād brahma॒ tapo॒ diśaḥ॑ | kā॒lenode॑ti॒ sūryaḥ॑ kā॒le ni vi॑śate॒ punaḥ॑ || १ ||
का॒लेन॒ वातः॑ पवते का॒लेन॑ पृथि॒वी म॒ही।
द्यौर्म॒ही का॒ल आहि॑ता ॥२॥
kā॒lena॒ vātaḥ॑ pavate kā॒lena॑ pṛthi॒vī ma॒hī | dyaurma॒hī kā॒la āhi॑tā || २ ||
का॒लो ह॑ भू॒तं भव्यं॑ च पु॒त्रो अ॑जनयत् पु॒रा।
का॒लादृचः॒ सम॑भव॒न् यजुः॑ का॒लाद॑जायत ॥३॥
kā॒lo ha॑ bhū॒taṃ bhavyaṃ॑ ca pu॒tro a॑janayat pu॒rā | kā॒lādṛcaḥ॒ sama॑bhava॒n yajuḥ॑ kā॒lāda॑jāyata || ३ ||
का॒लो य॒ज्ञं समै॑रयद् दे॒वेभ्यो॑ भा॒गमक्षि॑तम्।
का॒ले ग॑न्धर्वाप्स॒रसः॑ का॒ले लो॒काः प्रति॑ष्ठिताः ॥४॥
kā॒lo ya॒jñaṃ samai॑rayad de॒vebhyo॑ bhā॒gamakṣi॑tam | kā॒le ga॑ndharvāpsa॒rasaḥ॑ kā॒le lo॒kāḥ prati॑ṣṭhitāḥ || ४ ||
का॒लेऽयमङ्गि॑रा दे॒वोऽथ॑र्वा॒ चाधि॑ तिष्ठतः ।
इ॒मं च॑ लो॒कं प॑र॒मं च॑ लो॒कं पुण्यां॑श्च लो॒कान् विधृ॑तीश्च॒ पुण्याः॑ ।
सर्वां॑ल्लो॒कान॑भि॒जित्य॒ ब्रह्म॑णा का॒लः स ई॑यते पर॒मो नु दे॒वः ॥५॥
kā॒le’yamaṅgi॑rā de॒vo’tha॑rvā॒ cādhi॑ tiṣṭhataḥ | i॒maṃ ca॑ lo॒kaṃ pa॑ra॒maṃ ca॑ lo॒kaṃ puṇyāṃ॑śca lo॒kān vidhṛ॑tīśca॒ puṇyāḥ॑ | sarvāṃ॑llo॒kāna॑bhi॒jitya॒ brahma॑ṇā kā॒laḥ sa ī॑yate para॒mo nu de॒vaḥ || ५ ||