EeseDharmaSanātana Library
53काण्ड 19 · सूक्त 53
Atharvaveda Śaunaka Kand 19, Sukta 53.
10 shlokका॒लो अश्वो॑ वहति स॒प्तर॑श्मिः सहस्रा॒क्षो अ॒जरो॒ भूरि॑रेताः ।
तमा रो॑हन्ति क॒वयो॑ विप॒श्चित॒स्तस्य॑ च॒क्रा भुव॑नानि॒ विश्वा॑ ॥१॥
kā॒lo aśvo॑ vahati sa॒ptara॑śmiḥ sahasrā॒kṣo a॒jaro॒ bhūri॑retāḥ | tamā ro॑hanti ka॒vayo॑ vipa॒ścita॒stasya॑ ca॒krā bhuva॑nāni॒ viśvā॑ || १ ||
स॒प्त च॒क्रान् व॑हति का॒ल ए॒ष स॒प्तास्य॒ नाभी॑र॒मृतं॒ न्वक्षः॑ ।
स इ॒मा विश्वा॒ भुव॑नान्यञ्जत् का॒लः स ई॑यते प्रथ॒मो नु दे॒वः ॥२॥
sa॒pta ca॒krān va॑hati kā॒la e॒ṣa sa॒ptāsya॒ nābhī॑ra॒mṛtaṃ॒ nvakṣaḥ॑ | sa i॒mā viśvā॒ bhuva॑nānyañjat kā॒laḥ sa ī॑yate pratha॒mo nu de॒vaḥ || २ ||
पू॒र्णः कु॒म्भोऽधि॑ का॒ल आहि॑त॒स्तं वै पश्या॑मो बहु॒धा नु स॒न्तः।
स इ॒मा विश्वा॒ भुव॑ना॒नि प्र॒त्यङ्कालं तमा॑हुः पर॒मे व्योमन् ॥३॥
pū॒rṇaḥ ku॒mbho’dhi॑ kā॒la āhi॑ta॒staṃ vai paśyā॑mo bahu॒dhā nu sa॒ntaḥ | sa i॒mā viśvā॒ bhuva॑nā॒ni pra॒tyaṅkālaṃ tamā॑huḥ para॒me vyoman || ३ ||
स ए॒व सं भुव॑ना॒न्याभ॑र॒त् स ए॒व सं भुव॑नानि॒ पर्यै॑त्।
पि॒ता सन्न॑भवत् पु॒त्र ए॑षां॒ तस्मा॒द् वै नान्यत् पर॑मस्ति॒ तेजः॑ ॥४॥
sa e॒va saṃ bhuva॑nā॒nyābha॑ra॒t sa e॒va saṃ bhuva॑nāni॒ paryai॑t | pi॒tā sanna॑bhavat pu॒tra e॑ṣāṃ॒ tasmā॒d vai nānyat para॑masti॒ tejaḥ॑ || ४ ||
का॒लोऽमूं दिव॑मजनयत् का॒ल इ॒माः पृ॑थि॒वीरु॒त।
का॒ले ह॑ भू॒तं भव्यं॑ चेषि॒तं ह॒ वि ति॑ष्ठते ॥५॥
kā॒lo’mūṃ diva॑majanayat kā॒la i॒māḥ pṛ॑thi॒vīru॒ta | kā॒le ha॑ bhū॒taṃ bhavyaṃ॑ ceṣi॒taṃ ha॒ vi ti॑ṣṭhate || ५ ||
का॒लो भू॒तिम॑सृजत का॒ले त॑पति॒ सूर्यः॑ ।
का॒ले ह॒ विश्वा॑ भू॒तानि॑ का॒ले चक्षु॒र्वि प॑श्यति ॥६॥
kā॒lo bhū॒tima॑sṛjata kā॒le ta॑pati॒ sūryaḥ॑ | kā॒le ha॒ viśvā॑ bhū॒tāni॑ kā॒le cakṣu॒rvi pa॑śyati || ६ ||
का॒ले मनः॑ का॒ले प्रा॒णः का॒ले नाम॑ स॒माहि॑तम्।
का॒लेन॒ सर्वा॑ नन्द॒न्त्याग॑तेन प्र॒जा इ॒माः ॥७॥
kā॒le manaḥ॑ kā॒le prā॒ṇaḥ kā॒le nāma॑ sa॒māhi॑tam | kā॒lena॒ sarvā॑ nanda॒ntyāga॑tena pra॒jā i॒māḥ || ७ ||
का॒ले तपः॑ का॒ले ज्येष्ठं॑ का॒ले ब्रह्म॑ स॒माहि॑तम्।
का॒लो ह॒ सर्व॑स्येश्व॒रो यः पि॒तासी॑त् प्र॒जाप॑तेः ॥८॥
kā॒le tapaḥ॑ kā॒le jyeṣṭhaṃ॑ kā॒le brahma॑ sa॒māhi॑tam | kā॒lo ha॒ sarva॑syeśva॒ro yaḥ pi॒tāsī॑t pra॒jāpa॑teḥ || ८ ||
तेने॑षि॒तं तेन॑ जा॒तं तदु॒ तस्मि॒न् प्रति॑ष्ठितम्।
का॒लो ह॒ ब्रह्म॑ भू॒त्वा बिभ॑र्ति परमे॒ष्ठिन॑म् ॥९॥
tene॑ṣi॒taṃ tena॑ jā॒taṃ tadu॒ tasmi॒n prati॑ṣṭhitam | kā॒lo ha॒ brahma॑ bhū॒tvā bibha॑rti parame॒ṣṭhina॑m || ९ ||
का॒लः प्र॒जा अ॑सृजत का॒लो अग्रे॑ प्र॒जाप॑तिम्।
स्व॒यं॒भूः क॒श्यपः॑ का॒लात् तपः॑ का॒लाद॑जायत ॥१०॥
kā॒laḥ pra॒jā a॑sṛjata kā॒lo agre॑ pra॒jāpa॑tim | sva॒yaṃ॒bhūḥ ka॒śyapaḥ॑ kā॒lāt tapaḥ॑ kā॒lāda॑jāyata || १० ||