EeseDharmaSanātana Library
50काण्ड 19 · सूक्त 50
Atharvaveda Śaunaka Kand 19, Sukta 50.
7 shlokअध॑ रात्रि तृ॒ष्टधू॑ममशी॒र्षाण॒महिं॑ कृणु ।
अ॒क्षौ वृक॑स्य॒ निर्ज॑ह्या॒स्तेन॒ तं द्रु॑प॒दे ज॑हि ॥१॥
adha॑ rātri tṛ॒ṣṭadhū॑mamaśī॒rṣāṇa॒mahiṃ॑ kṛṇu | a॒kṣau vṛka॑sya॒ nirja॑hyā॒stena॒ taṃ dru॑pa॒de ja॑hi || १ ||
ये ते॑ रात्र्यन॒ड्वाह॒स्तीक्ष्ण॑शृङ्गाः स्वा॒शवः॑ ।
तेभि॑र्नो अ॒द्य पा॑र॒याति॑ दु॒र्गाणि॑ वि॒श्वहा॑ ॥२॥
ye te॑ rātryana॒ḍvāha॒stīkṣṇa॑śṛṅgāḥ svā॒śavaḥ॑ | tebhi॑rno a॒dya pā॑ra॒yāti॑ du॒rgāṇi॑ vi॒śvahā॑ || २ ||
रात्रिं॑रात्रि॒मरि॑ष्यन्त॒स्तरे॑म त॒न्वा व॒यम्।
ग॒म्भी॒रमप्ल॑वा इव॒ न त॑रेयु॒ररा॑तयः ॥३॥
rātriṃ॑rātri॒mari॑ṣyanta॒stare॑ma ta॒nvā va॒yam | ga॒mbhī॒ramapla॑vā iva॒ na ta॑reyu॒rarā॑tayaḥ || ३ ||
यथा॑ शा॒म्याकः॑ प्र॒पत॑न्नप॒वान् नानु॑वि॒द्यते॑ ।
ए॒वा रा॑त्रि॒ प्र पा॑तय॒ यो अ॒स्मां अ॑भ्यघा॒यति ॥४॥
yathā॑ śā॒myākaḥ॑ pra॒pata॑nnapa॒vān nānu॑vi॒dyate॑ | e॒vā rā॑tri॒ pra pā॑taya॒ yo a॒smāṃ a॑bhyaghā॒yati || ४ ||
अप॑ स्ते॒नं वासो॑ गोअ॒जमु॒त तस्क॑रम्।
अथो॒ यो अर्व॑तः॒ शिरो॑ऽभि॒धाय॒ निनी॑षति ॥५॥
apa॑ ste॒naṃ vāso॑ goa॒jamu॒ta taska॑ram | atho॒ yo arva॑taḥ॒ śiro॑’bhi॒dhāya॒ ninī॑ṣati || ५ ||
यद॒द्या रा॑त्रि सुभगे वि॒भज॒न्त्ययो॒ वसु॑ ।
यदे॒तद॒स्मान् भो॑जय॒ यथेद॒न्यानु॒पाय॑सि ॥६॥
yada॒dyā rā॑tri subhage vi॒bhaja॒ntyayo॒ vasu॑ | yade॒tada॒smān bho॑jaya॒ yatheda॒nyānu॒pāya॑si || ६ ||
उ॒षसे॑ नः॒ परि॑ देहि॒ सर्वा॒न् रात्र्य॑ना॒गसः॑ ।
उ॒षा नो॒ अह्ने॒ आ भ॑जा॒दह॒स्तुभ्यं॑ विभावरि ॥७॥
u॒ṣase॑ naḥ॒ pari॑ dehi॒ sarvā॒n rātrya॑nā॒gasaḥ॑ | u॒ṣā no॒ ahne॒ ā bha॑jā॒daha॒stubhyaṃ॑ vibhāvari || ७ ||