EeseDharmaSanātana Library
49काण्ड 19 · सूक्त 49
Atharvaveda Śaunaka Kand 19, Sukta 49.
10 shlokइ॒षि॒रा योषा॑ युव॒तिर्दमू॑ना॒ रात्री॑ दे॒वस्य॑ सवि॒तुर्भग॑स्य ।
अ॒श्व॒क्ष॒भा सु॒हवा॒ संभृ॑तश्री॒रा प॑प्रौ॒ द्यावा॑पृथि॒वी म॑हि॒त्वा ॥१॥
i॒ṣi॒rā yoṣā॑ yuva॒tirdamū॑nā॒ rātrī॑ de॒vasya॑ savi॒turbhaga॑sya | a॒śva॒kṣa॒bhā su॒havā॒ saṃbhṛ॑taśrī॒rā pa॑prau॒ dyāvā॑pṛthi॒vī ma॑hi॒tvā || १ ||
अति॒ विश्वा॑न्यरुहद् गम्भी॒रो वर्षि॑ष्ठमरुहन्त॒ श्रवि॑ष्ठाः ।
उ॒श॒ती रात्र्यनु॒ सा भ॒द्राभि ति॑ष्ठते मि॒त्र इ॑व स्व॒धाभिः॑ ॥२॥
ati॒ viśvā॑nyaruhad gambhī॒ro varṣi॑ṣṭhamaruhanta॒ śravi॑ṣṭhāḥ | u॒śa॒tī rātryanu॒ sā bha॒drābhi ti॑ṣṭhate mi॒tra i॑va sva॒dhābhiḥ॑ || २ ||
वर्ये॒ वन्दे॒ सुभ॑गे॒ सुजा॑त॒ आज॑ग॒न् रात्रि॑ सु॒मना॑ इ॒ह स्या॑म्।
अ॒स्मांस्त्रा॑यस्व॒ नर्या॑णि जा॒ता अथो॒ यानि॒ गव्या॑नि पु॒ष्ठ्या ॥३॥
varye॒ vande॒ subha॑ge॒ sujā॑ta॒ āja॑ga॒n rātri॑ su॒manā॑ i॒ha syā॑m | a॒smāṃstrā॑yasva॒ naryā॑ṇi jā॒tā atho॒ yāni॒ gavyā॑ni pu॒ṣṭhyā || ३ ||
सिं॒हस्य॒ रात्र्यु॑श॒ती पीं॒षस्य॑ व्या॒घ्रस्य॑ द्वी॒पिनो॒ वर्च॒ आ द॑दे ।
अश्व॑स्य ब्र॒ध्नं पुरु॑षस्य मा॒युं पु॒रु रू॒पाणि॑ कृणुषे विभा॒ती ॥४॥
siṃ॒hasya॒ rātryu॑śa॒tī pīṃ॒ṣasya॑ vyā॒ghrasya॑ dvī॒pino॒ varca॒ ā da॑de | aśva॑sya bra॒dhnaṃ puru॑ṣasya mā॒yuṃ pu॒ru rū॒pāṇi॑ kṛṇuṣe vibhā॒tī || ४ ||
शि॒वां रात्रि॑मनु॒सूर्यं॑ च हि॒मस्य॑ मा॒ता सु॒हवा॑ नो अस्तु ।
अ॒स्य स्तोम॑स्य सुभगे॒ नि बो॑ध॒ येन॑ त्वा॒ वन्दे॒ विश्वा॑सु दि॒क्षु ॥५॥
śi॒vāṃ rātri॑manu॒sūryaṃ॑ ca hi॒masya॑ mā॒tā su॒havā॑ no astu | a॒sya stoma॑sya subhage॒ ni bo॑dha॒ yena॑ tvā॒ vande॒ viśvā॑su di॒kṣu || ५ ||
स्तोम॑स्य नो विभावरि॒ रात्रि॒ राजे॑व जोषसे ।
आसा॑म॒ सर्व॑वीरा॒ भवा॑म॒ सर्व॑वेदसो व्यु॒च्छन्ती॒रनू॒षसः॑ ॥६॥
stoma॑sya no vibhāvari॒ rātri॒ rāje॑va joṣase | āsā॑ma॒ sarva॑vīrā॒ bhavā॑ma॒ sarva॑vedaso vyu॒cchantī॒ranū॒ṣasaḥ॑ || ६ ||
शम्या॑ ह॒ नाम॑ दधि॒षे मम॒ दिप्स॑न्ति॒ ये धना॑ ।
रात्री॒हि तान॑सुत॒पा यस्ते॒नो न वि॒द्यते॒ यत् पुन॒र्न वि॒द्यते॑ ॥७॥
śamyā॑ ha॒ nāma॑ dadhi॒ṣe mama॒ dipsa॑nti॒ ye dhanā॑ | rātrī॒hi tāna॑suta॒pā yaste॒no na vi॒dyate॒ yat puna॒rna vi॒dyate॑ || ७ ||
भ॒द्रासि॑ रात्रि चम॒सो न वि॒ष्टो विष्वं॒ गोरू॑पं युव॒तिर्बि॑भर्षि ।
चक्षु॑ष्मती मे उश॒ती वपूंषि॒ प्रति॒ त्वं दि॒व्या न क्षाम॑मुक्थाः ॥८॥
bha॒drāsi॑ rātri cama॒so na vi॒ṣṭo viṣvaṃ॒ gorū॑paṃ yuva॒tirbi॑bharṣi | cakṣu॑ṣmatī me uśa॒tī vapūṃṣi॒ prati॒ tvaṃ di॒vyā na kṣāma॑mukthāḥ || ८ ||
यो अ॒द्य स्ते॒न आय॑त्यघा॒युर्मर्त्यो॑ रि॒पुः ।
रात्री॒ तस्य॑ प्र॒तीत्य॒ प्र ग्री॒वाः प्र शिरो॑ हनत् ॥९॥
yo a॒dya ste॒na āya॑tyaghā॒yurmartyo॑ ri॒puḥ | rātrī॒ tasya॑ pra॒tītya॒ pra grī॒vāḥ pra śiro॑ hanat || ९ ||
प्र पादौ॒ न यथाय॑ति॒ प्र हस्तौ॒ न यथाशि॑षत्।
यो म॑लि॒म्लुरु॒पाय॑ति॒ स संपि॑ष्टो॒ अपा॑यति ।
अपा॑यति॒ स्वपा॑यति॒ शुष्के॑ स्था॒णावपा॑यति ॥१०॥
pra pādau॒ na yathāya॑ti॒ pra hastau॒ na yathāśi॑ṣat | yo ma॑li॒mluru॒pāya॑ti॒ sa saṃpi॑ṣṭo॒ apā॑yati | apā॑yati॒ svapā॑yati॒ śuṣke॑ sthā॒ṇāvapā॑yati || १० ||