EeseDharmaSanātana Library
48काण्ड 19 · सूक्त 48
Atharvaveda Śaunaka Kand 19, Sukta 48.
6 shlokअथो॒ यानि॑ च॒ यस्मा॑ ह॒ यानि॑ चा॒न्तः प॑री॒णहि॑ ।
तानि॑ ते॒ परि॑ दद्मसि ॥१॥
atho॒ yāni॑ ca॒ yasmā॑ ha॒ yāni॑ cā॒ntaḥ pa॑rī॒ṇahi॑ | tāni॑ te॒ pari॑ dadmasi || १ ||
रात्रि॒ मात॑रु॒षसे॑ नः॒ परि॑ देहि ।
उ॒षा नो॒ अह्ने॒ परि॑ ददा॒त्वह॒स्तुभ्यं॑ विभावरि ॥२॥
rātri॒ māta॑ru॒ṣase॑ naḥ॒ pari॑ dehi | u॒ṣā no॒ ahne॒ pari॑ dadā॒tvaha॒stubhyaṃ॑ vibhāvari || २ ||
यत् किं चे॒दं प॒तय॑ति यत् किं चे॒दं स॑रीसृ॒पम्।
यत् किं च॒ पर्व॑ताया॒सत्वं॒ तस्मा॒त् त्वं रा॑त्रि पाहि नः ॥३॥
yat kiṃ ce॒daṃ pa॒taya॑ti yat kiṃ ce॒daṃ sa॑rīsṛ॒pam | yat kiṃ ca॒ parva॑tāyā॒satvaṃ॒ tasmā॒t tvaṃ rā॑tri pāhi naḥ || ३ ||
सा प॒श्चात् पा॑हि॒ सा पु॒रः सोत्त॒राद॑ध॒रादु॒त।
गो॒पाय॑ नो विभावरि स्तो॒तार॑स्त इ॒ह स्म॑सि ॥४॥
sā pa॒ścāt pā॑hi॒ sā pu॒raḥ sotta॒rāda॑dha॒rādu॒ta | go॒pāya॑ no vibhāvari sto॒tāra॑sta i॒ha sma॑si || ४ ||
ये रात्रि॑मनु॒तिष्ठ॑न्ति॒ ये च॑ भू॒तेषु॒ जाग्र॑ति ।
प॒शून् ये सर्वा॒न् रक्ष॑न्ति॒ ते न॑ आ॒त्मसु॑ जाग्रति॒ ते नः॑ प॒शुषु॑ जाग्रति ॥५॥
ye rātri॑manu॒tiṣṭha॑nti॒ ye ca॑ bhū॒teṣu॒ jāgra॑ti | pa॒śūn ye sarvā॒n rakṣa॑nti॒ te na॑ ā॒tmasu॑ jāgrati॒ te naḥ॑ pa॒śuṣu॑ jāgrati || ५ ||
वेद॒ वै रा॑त्रि ते॒ नाम॑ घृ॒ताची॒ नाम॒ वा अ॑सि ।
तां त्वां भ॒रद्वा॑जो वेद॒ सा नो॑ वि॒त्तेऽधि॑ जाग्रति ॥६॥
veda॒ vai rā॑tri te॒ nāma॑ ghṛ॒tācī॒ nāma॒ vā a॑si | tāṃ tvāṃ bha॒radvā॑jo veda॒ sā no॑ vi॒tte’dhi॑ jāgrati || ६ ||