EeseDharmaSanātana Library
47काण्ड 19 · सूक्त 47
Atharvaveda Śaunaka Kand 19, Sukta 47.
9 shlokआ रा॑त्रि॒ पार्थि॑वं॒ रजः॑ पि॒तुर॑प्रायि॒ धाम॑भिः ।
दि॒वः सदां॑सि बृह॒ती वि ति॑ष्ठस॒ आ त्वे॒षं व॑र्तते॒ तमः॑ ॥१॥
ā rā॑tri॒ pārthi॑vaṃ॒ rajaḥ॑ pi॒tura॑prāyi॒ dhāma॑bhiḥ | di॒vaḥ sadāṃ॑si bṛha॒tī vi ti॑ṣṭhasa॒ ā tve॒ṣaṃ va॑rtate॒ tamaḥ॑ || १ ||
न यस्याः॑ पा॒रं ददृ॑शे॒ न योयु॑व॒द् विश्व॑म॒स्यां नि वि॑शते॒ यदेज॑ति ।
अरि॑ष्टासस्त उर्वि तमस्वति॒ रात्रि॑ पा॒रम॑शीमहि॒ भद्रे॑ पा॒रम॑शीमहि ॥२॥
na yasyāḥ॑ pā॒raṃ dadṛ॑śe॒ na yoyu॑va॒d viśva॑ma॒syāṃ ni vi॑śate॒ yadeja॑ti | ari॑ṣṭāsasta urvi tamasvati॒ rātri॑ pā॒rama॑śīmahi॒ bhadre॑ pā॒rama॑śīmahi || २ ||
ये ते॑ रात्रि नृ॒चक्ष॑सो द्र॒ष्टारो॑ नव॒तीर्नव॑ ।
अ॒शी॒तिः सन्त्य॒ष्टा उ॒तो ते॑ स॒प्त स॑प्त॒तिः ॥३॥
ye te॑ rātri nṛ॒cakṣa॑so dra॒ṣṭāro॑ nava॒tīrnava॑ | a॒śī॒tiḥ santya॒ṣṭā u॒to te॑ sa॒pta sa॑pta॒tiḥ || ३ ||
ष॒ष्टिश्च॒ षट् च॒ रेवति पञ्चा॒शत् पञ्च॑ सुम्नयि ।
च॒त्वार॑श्चत्वारिं॒शच्च॒ त्रय॑स्त्रिं॒शच्च॑ वाजिनि ॥४॥
ṣa॒ṣṭiśca॒ ṣaṭ ca॒ revati pañcā॒śat pañca॑ sumnayi | ca॒tvāra॑ścatvāriṃ॒śacca॒ traya॑striṃ॒śacca॑ vājini || ४ ||
द्वौ च॑ ते विंश॒तिश्च॑ ते॒ रात्र्येका॑दशाव॒माः ।
तेभि॑र्नो अ॒द्य पा॒युभि॒र्नु पा॑हि दुहितर्दिवः ॥५॥
dvau ca॑ te viṃśa॒tiśca॑ te॒ rātryekā॑daśāva॒māḥ | tebhi॑rno a॒dya pā॒yubhi॒rnu pā॑hi duhitardivaḥ || ५ ||
रक्षा॒ माकि॑र्नो अ॒धशं॑स ईशत॒ मा नो॑ दुः॒शंस॑ ईशत ।
मा नो॑ अ॒द्य गवां॑ स्ते॒नो मावी॑नां॒ वृक॑ ईशत ॥६॥
rakṣā॒ māki॑rno a॒dhaśaṃ॑sa īśata॒ mā no॑ duḥ॒śaṃsa॑ īśata | mā no॑ a॒dya gavāṃ॑ ste॒no māvī॑nāṃ॒ vṛka॑ īśata || ६ ||
माश्वा॑नां भद्रे॒ तस्क॑रो॒ मा नृ॒णां या॑तुधा॒न्यः ।
प॒र॒मेभिः॑ प॒थिभिः॑ स्ते॒नो धा॑वतु॒ तस्क॑रः ।
परे॑ण द॒त्वती॒ रज्जुः॒ परे॑णाघा॒युर॑र्षतु ॥७॥
māśvā॑nāṃ bhadre॒ taska॑ro॒ mā nṛ॒ṇāṃ yā॑tudhā॒nyaḥ | pa॒ra॒mebhiḥ॑ pa॒thibhiḥ॑ ste॒no dhā॑vatu॒ taska॑raḥ | pare॑ṇa da॒tvatī॒ rajjuḥ॒ pare॑ṇāghā॒yura॑rṣatu || ७ ||
अध॑ रात्रि तृ॒ष्टधू॑ममशी॒र्षाण॒महिं॑ कृणु ।
हनू॒ वृक॑स्य ज॒म्भया॒स्तेन॒ तं द्रु॑प॒दे ज॑हि ॥८॥
adha॑ rātri tṛ॒ṣṭadhū॑mamaśī॒rṣāṇa॒mahiṃ॑ kṛṇu | hanū॒ vṛka॑sya ja॒mbhayā॒stena॒ taṃ dru॑pa॒de ja॑hi || ८ ||
त्वयि॑ रात्रि वसामसि स्वपि॒ष्याम॑सि जागृ॒हि।
गोभ्यो॑ नः॒ शर्म॑ य॒च्छाश्वे॑भ्यः॒ पुरु॑षेभ्यः ॥९॥
tvayi॑ rātri vasāmasi svapi॒ṣyāma॑si jāgṛ॒hi | gobhyo॑ naḥ॒ śarma॑ ya॒cchāśve॑bhyaḥ॒ puru॑ṣebhyaḥ || ९ ||