EeseDharmaSanātana Library
44काण्ड 19 · सूक्त 44
Atharvaveda Śaunaka Kand 19, Sukta 44.
10 shlokआयु॑षोऽसि प्र॒तर॑णं॒ विप्रं॑ भेष॒जमु॑च्यसे ।
तदा॑ञ्जन॒ त्वं शं॑ताते॒ शमापो॒ अभ॑यं कृतम् ॥१॥
āyu॑ṣo’si pra॒tara॑ṇaṃ॒ vipraṃ॑ bheṣa॒jamu॑cyase | tadā॑ñjana॒ tvaṃ śaṃ॑tāte॒ śamāpo॒ abha॑yaṃ kṛtam || १ ||
यो ह॑रि॒मा जा॒यान्यो॑ऽङ्गभे॒दो वि॒सल्प॑कः ।
सर्वं॑ ते॒ यक्ष्म॒मङ्गे॑भ्यो ब॒हिर्नि॑र्ह॒न्त्वाञ्ज॑नम् ॥२॥
yo ha॑ri॒mā jā॒yānyo॑’ṅgabhe॒do vi॒salpa॑kaḥ | sarvaṃ॑ te॒ yakṣma॒maṅge॑bhyo ba॒hirni॑rha॒ntvāñja॑nam || २ ||
आञ्ज॑नं पृथि॒व्यां जा॒तं भ॒द्रं पु॑रुष॒जीव॑नम्।
कृ॒णोत्वप्र॑मायुकं॒ रथ॑जूति॒मना॑गसम् ॥३॥
āñja॑naṃ pṛthi॒vyāṃ jā॒taṃ bha॒draṃ pu॑ruṣa॒jīva॑nam | kṛ॒ṇotvapra॑māyukaṃ॒ ratha॑jūti॒manā॑gasam || ३ ||
प्राण॑ प्रा॒णं त्रा॑य॒स्वासो॒ अस॑वे मृड ।
निरृ॑ते॒ निरृ॑त्या नः॒ पाशे॑भ्यो मुञ्च ॥४॥
prāṇa॑ prā॒ṇaṃ trā॑ya॒svāso॒ asa॑ve mṛḍa | nirṛ॑te॒ nirṛ॑tyā naḥ॒ pāśe॑bhyo muñca || ४ ||
सिन्धो॒र्गर्भो॑ऽसि वि॒द्युतां॒ पुष्प॑म्।
वातः॑ प्रा॒णः सूर्य॒श्चक्षु॑र्दि॒वस्पयः॑ ॥५॥
sindho॒rgarbho॑’si vi॒dyutāṃ॒ puṣpa॑m | vātaḥ॑ prā॒ṇaḥ sūrya॒ścakṣu॑rdi॒vaspayaḥ॑ || ५ ||
देवा॑ञ्जन॒ त्रैक॑कुदं॒ परि॑ मा पाहि वि॒श्वतः॑ ।
न त्वा॑ तर॒न्त्योष॑धयो॒ बाह्याः॑ पर्व॒तीया॑ उ॒त ॥६॥
devā॑ñjana॒ traika॑kudaṃ॒ pari॑ mā pāhi vi॒śvataḥ॑ | na tvā॑ tara॒ntyoṣa॑dhayo॒ bāhyāḥ॑ parva॒tīyā॑ u॒ta || ६ ||
वी॒३दं मध्य॒मवा॑सृपद् रक्षो॒हामी॑व॒चात॑नः ।
अमी॑वाः॒ सर्वा॑श्चा॒तय॑न् ना॒शय॑दभि॒भा इ॒तः ॥७॥
vī॒३daṃ madhya॒mavā॑sṛpad rakṣo॒hāmī॑va॒cāta॑naḥ | amī॑vāḥ॒ sarvā॑ścā॒taya॑n nā॒śaya॑dabhi॒bhā i॒taḥ || ७ ||
ब॒ह्वि॒३दं रा॑जन् वरु॒णानृ॑तमाह॒ पूरु॑षः ।
तस्मा॑त् सहस्रवीर्य मु॒ञ्च नः॒ पर्यंह॑सः ॥८॥
ba॒hvi॒३daṃ rā॑jan varu॒ṇānṛ॑tamāha॒ pūru॑ṣaḥ | tasmā॑t sahasravīrya mu॒ñca naḥ॒ paryaṃha॑saḥ || ८ ||
यदापो॑ अ॒घ्न्या इति॒ वरु॒णेति॒ यदू॑चि॒म।
तस्मा॑त् सहस्रवीर्य मु॒ञ्च नः॒ पर्यंह॑सः ॥९॥
yadāpo॑ a॒ghnyā iti॒ varu॒ṇeti॒ yadū॑ci॒ma | tasmā॑t sahasravīrya mu॒ñca naḥ॒ paryaṃha॑saḥ || ९ ||
मि॒त्रश्च॑ त्वा॒ वरु॑णश्चानु॒प्रेय॑तुराञ्जन ।
तौ त्वा॑नु॒गत्य॑ दू॒रं भो॒गाय॒ पुन॒रोह॑तुः ॥१०॥
mi॒traśca॑ tvā॒ varu॑ṇaścānu॒preya॑turāñjana | tau tvā॑nu॒gatya॑ dū॒raṃ bho॒gāya॒ puna॒roha॑tuḥ || १० ||