EeseDharmaSanātana Library
42काण्ड 19 · सूक्त 42
Atharvaveda Śaunaka Kand 19, Sukta 42.
4 shlokब्रह्म॒ होता॒ ब्रह्म॑ य॒ज्ञा ब्रह्म॑णा॒ स्वर॑वो मि॒ताः ।
अ॒ध्व॒र्युर्ब्रह्म॑णो जा॒तो ब्रह्म॑णो॒ऽन्तर्हि॑तं ह॒विः ॥१॥
brahma॒ hotā॒ brahma॑ ya॒jñā brahma॑ṇā॒ svara॑vo mi॒tāḥ | a॒dhva॒ryurbrahma॑ṇo jā॒to brahma॑ṇo॒’ntarhi॑taṃ ha॒viḥ || १ ||
ब्रह्म॒ स्रुचो॑ घृ॒तव॑ती॒र्ब्रह्म॑णा॒ वेदि॒रुद्धि॑ता ।
ब्रह्म॑ य॒ज्ञस्य॒ तत्त्वं॑ च ऋ॒त्विजो॒ ये ह॑वि॒ष्कृतः॑ ।
श॒मि॒ताय॒ स्वाहा॑ ॥२॥
brahma॒ sruco॑ ghṛ॒tava॑tī॒rbrahma॑ṇā॒ vedi॒ruddhi॑tā | brahma॑ ya॒jñasya॒ tattvaṃ॑ ca ṛ॒tvijo॒ ye ha॑vi॒ṣkṛtaḥ॑ | śa॒mi॒tāya॒ svāhā॑ || २ ||
अं॒हो॒मुचे॒ प्र भ॑रे मनी॒षामा सु॒त्राव्णे॑ सुम॒तिमा॑वृणा॒नः ।
इ॒दमि॑न्द्र॒ प्रति॑ ह॒व्यं गृ॑भाय स॒त्याः स॑न्तु॒ यज॑मानस्य॒ कामाः॑ ॥३॥
aṃ॒ho॒muce॒ pra bha॑re manī॒ṣāmā su॒trāvṇe॑ suma॒timā॑vṛṇā॒naḥ | i॒dami॑ndra॒ prati॑ ha॒vyaṃ gṛ॑bhāya sa॒tyāḥ sa॑ntu॒ yaja॑mānasya॒ kāmāḥ॑ || ३ ||
अं॒हो॒मुचं॑ वृष॒भं य॒ज्ञिया॑नां वि॒राज॑न्तं प्रथ॒मम॑ध्व॒राणा॑म्।
अ॒पां नपा॑तम॒श्विना॑ हुवे॒ धिय॑ इन्द्रि॒येण॑ त इन्द्रि॒यं द॑त्त॒मोजः॑ ॥४॥
aṃ॒ho॒mucaṃ॑ vṛṣa॒bhaṃ ya॒jñiyā॑nāṃ vi॒rāja॑ntaṃ pratha॒mama॑dhva॒rāṇā॑m | a॒pāṃ napā॑tama॒śvinā॑ huve॒ dhiya॑ indri॒yeṇa॑ ta indri॒yaṃ da॑tta॒mojaḥ॑ || ४ ||