EeseDharmaSanātana Library
34काण्ड 19 · सूक्त 34
Atharvaveda Śaunaka Kand 19, Sukta 34.
10 shlokजा॒ङ्गि॒डोऽसि जङ्गि॒डो रक्षि॑तासि जङ्गि॒डः ।
द्वि॒पाच्चतु॑ष्पाद॒स्माकं॒ सर्वं॑ रक्षतु जङ्गि॒डः ॥१॥
jā॒ṅgi॒ḍo’si jaṅgi॒ḍo rakṣi॑tāsi jaṅgi॒ḍaḥ | dvi॒pāccatu॑ṣpāda॒smākaṃ॒ sarvaṃ॑ rakṣatu jaṅgi॒ḍaḥ || १ ||
या गृत्स्य॑स्त्रिपञ्चा॒शीः श॒तं कृ॑त्या॒कृत॑श्च॒ ये।
सर्वा॑न् विनक्तु॒ तेज॑सोऽर॒सां ज॑ङ्गि॒डस्क॑रत् ॥२॥
yā gṛtsya॑stripañcā॒śīḥ śa॒taṃ kṛ॑tyā॒kṛta॑śca॒ ye | sarvā॑n vinaktu॒ teja॑so’ra॒sāṃ ja॑ṅgi॒ḍaska॑rat || २ ||
अ॒र॒सं कृ॒त्रिमं॑ ना॒दम॑र॒साः स॒प्त विस्र॑सः ।
अपे॒तो ज॑ङ्गि॒डाम॑ति॒मिषु॒मस्ते॑व शातय ॥३॥
a॒ra॒saṃ kṛ॒trimaṃ॑ nā॒dama॑ra॒sāḥ sa॒pta visra॑saḥ | ape॒to ja॑ṅgi॒ḍāma॑ti॒miṣu॒maste॑va śātaya || ३ ||
कृ॒त्या॒दूष॑ण ए॒वायमथो॑ अराति॒दूष॑णः ।
अथो॒ सह॑स्वां जङ्गि॒डः प्र ण आयूं॑षि तारिषत् ॥४॥
kṛ॒tyā॒dūṣa॑ṇa e॒vāyamatho॑ arāti॒dūṣa॑ṇaḥ | atho॒ saha॑svāṃ jaṅgi॒ḍaḥ pra ṇa āyūṃ॑ṣi tāriṣat || ४ ||
स ज॑ङ्गि॒डस्य॑ महि॒मा परि॑ णः पातु वि॒श्वतः॑ ।
विष्क॑न्धं॒ येन॑ सा॒सह॒ संस्क॑न्ध॒मोज॒ ओज॑सा ॥५॥
sa ja॑ṅgi॒ḍasya॑ mahi॒mā pari॑ ṇaḥ pātu vi॒śvataḥ॑ | viṣka॑ndhaṃ॒ yena॑ sā॒saha॒ saṃska॑ndha॒moja॒ oja॑sā || ५ ||
त्रिष्ट्वा॑ दे॒वा अ॑जनय॒न् निष्ठि॑तं॒ भूम्या॒मधि॑ ।
तमु॒ त्वाङ्गि॑रा॒ इति॑ ब्राह्म॒णाः पू॒र्व्या वि॑दुः ॥६॥
triṣṭvā॑ de॒vā a॑janaya॒n niṣṭhi॑taṃ॒ bhūmyā॒madhi॑ | tamu॒ tvāṅgi॑rā॒ iti॑ brāhma॒ṇāḥ pū॒rvyā vi॑duḥ || ६ ||
न त्वा॒ पूर्वा॒ ओष॑धयो॒ न त्वा॑ तरन्ति॒ या नवाः॑ ।
विबा॑ध उ॒ग्रो ज॑ङ्गि॒डः प॑रि॒पाणः॑ सुम॒ङ्गलः॑ ॥७॥
na tvā॒ pūrvā॒ oṣa॑dhayo॒ na tvā॑ taranti॒ yā navāḥ॑ | vibā॑dha u॒gro ja॑ṅgi॒ḍaḥ pa॑ri॒pāṇaḥ॑ suma॒ṅgalaḥ॑ || ७ ||
अथो॑पदान भगवो॒ जाङ्गि॒डामि॑तवीर्य ।
पु॒रा त॑ उ॒ग्रा ग्र॑सत॒ उपेन्द्रो॑ वी॒र्यं ददौ ॥८॥
atho॑padāna bhagavo॒ jāṅgi॒ḍāmi॑tavīrya | pu॒rā ta॑ u॒grā gra॑sata॒ upendro॑ vī॒ryaṃ dadau || ८ ||
उ॒ग्र इत् ते॑ वनस्पत॒ इन्द्र॑ ओ॒ज्मान॒माद॑धौ ।
अमी॑वाः॒ सर्वा॑श्चा॒तयं॑ ज॒हि रक्षां॑स्योषधे ॥९॥
u॒gra it te॑ vanaspata॒ indra॑ o॒jmāna॒māda॑dhau | amī॑vāḥ॒ sarvā॑ścā॒tayaṃ॑ ja॒hi rakṣāṃ॑syoṣadhe || ९ ||
आश॑रीकं॒ विश॑रीकं ब॒लासं॑ पृष्ट्याम॒यम्।
त॒क्मानं॑ वि॒श्वशा॑रदमर॒सां ज॑ङ्गि॒डस्क॑रत् ॥१०॥
āśa॑rīkaṃ॒ viśa॑rīkaṃ ba॒lāsaṃ॑ pṛṣṭyāma॒yam | ta॒kmānaṃ॑ vi॒śvaśā॑radamara॒sāṃ ja॑ṅgi॒ḍaska॑rat || १० ||