EeseDharmaSanātana Library
33काण्ड 19 · सूक्त 33
Atharvaveda Śaunaka Kand 19, Sukta 33.
5 shlokस॒ह॒स्रा॒र्घः श॒तका॑ण्डः॒ पय॑स्वान॒पाम॒ग्निर्वी॒रुधां॑ राज॒सूय॑म्।
स नो॒ऽयं द॒र्भः परि॑ पातु वि॒श्वतो॑ दे॒वो म॒णिरायु॑षा॒ सं सृ॑जाति नः ॥१॥
sa॒ha॒srā॒rghaḥ śa॒takā॑ṇḍaḥ॒ paya॑svāna॒pāma॒gnirvī॒rudhāṃ॑ rāja॒sūya॑m | sa no॒’yaṃ da॒rbhaḥ pari॑ pātu vi॒śvato॑ de॒vo ma॒ṇirāyu॑ṣā॒ saṃ sṛ॑jāti naḥ || १ ||
घृ॒तादुल्लु॑प्तो॒ मधु॑मा॒न् पय॑स्वान् भूमिदृं॒होऽच्यु॑तश्च्यावयि॒ष्णुः ।
नु॒दन्त्स॒पत्ना॒नध॑रांश्च कृ॒ण्वन् दर्भा रो॑ह मह॒तामि॑न्द्रि॒येण॑ ॥२॥
ghṛ॒tādullu॑pto॒ madhu॑mā॒n paya॑svān bhūmidṛṃ॒ho’cyu॑taścyāvayi॒ṣṇuḥ | nu॒dantsa॒patnā॒nadha॑rāṃśca kṛ॒ṇvan darbhā ro॑ha maha॒tāmi॑ndri॒yeṇa॑ || २ ||
त्वं भूमि॒मत्ये॒ष्योज॑सा॒ त्वं वेद्यां॑ सीदसि॒ चारु॑रध्व॒रे।
त्वां प॒वित्र॒मृष॑योऽभरन्त॒ त्वं पुनीहि दुरि॒तान्य॒स्मत् ॥३॥
tvaṃ bhūmi॒matye॒ṣyoja॑sā॒ tvaṃ vedyāṃ॑ sīdasi॒ cāru॑radhva॒re | tvāṃ pa॒vitra॒mṛṣa॑yo’bharanta॒ tvaṃ punīhi duri॒tānya॒smat || ३ ||
ती॒क्ष्णो राजा॑ विषास॒ही र॑क्षो॒हा वि॒श्वच॑र्षणिः ।
ओजो॑ दे॒वानां॒ बल॑मु॒ग्रमे॒तत् तं ते॑ बध्नामि ज॒रसे॑ स्व॒स्तये॑ ॥४॥
tī॒kṣṇo rājā॑ viṣāsa॒hī ra॑kṣo॒hā vi॒śvaca॑rṣaṇiḥ | ojo॑ de॒vānāṃ॒ bala॑mu॒grame॒tat taṃ te॑ badhnāmi ja॒rase॑ sva॒staye॑ || ४ ||
द॒र्भेण॒ त्वं कृ॑णवद् वी॒र्याऽणि द॒र्भं बिभ्र॑दा॒त्मना॒ मा व्य॑थिष्ठाः ।
अति॑ष्ठाया॒ वर्च॒साधा॒न्यान्त्सूर्य॑ इ॒वा भा॑हि प्र॒दिश॒श्चत॑स्रः ॥५॥
da॒rbheṇa॒ tvaṃ kṛ॑ṇavad vī॒ryā’ṇi da॒rbhaṃ bibhra॑dā॒tmanā॒ mā vya॑thiṣṭhāḥ | ati॑ṣṭhāyā॒ varca॒sādhā॒nyāntsūrya॑ i॒vā bhā॑hi pra॒diśa॒ścata॑sraḥ || ५ ||