EeseDharmaSanātana Library
32काण्ड 19 · सूक्त 32
Atharvaveda Śaunaka Kand 19, Sukta 32.
10 shlokश॒तका॑ण्डो दुश्च्यव॒नः स॒हस्र॑पर्ण उत्ति॒रः ।
द॒र्भो य उ॒ग्र ओष॑धि॒स्तं ते॑ बध्ना॒म्यायु॑षे ॥१॥
śa॒takā॑ṇḍo duścyava॒naḥ sa॒hasra॑parṇa utti॒raḥ | da॒rbho ya u॒gra oṣa॑dhi॒staṃ te॑ badhnā॒myāyu॑ṣe || १ ||
नास्य॒ केशा॒न् प्र वप॑न्ति॒ नोर॑सि॒ ताड॒मा घ्न॑ते ।
यस्मा॑ अछिन्नप॒र्णेन॑ द॒र्भेण॒ शर्म॑ यच्छति ॥२॥
nāsya॒ keśā॒n pra vapa॑nti॒ nora॑si॒ tāḍa॒mā ghna॑te | yasmā॑ achinnapa॒rṇena॑ da॒rbheṇa॒ śarma॑ yacchati || २ ||
दि॒वि ते॒ तूल॑मोषधे पृथि॒व्याम॑सि॒ निष्ठि॑तः ।
त्वया॑ स॒हस्र॑काण्डे॒नायुः॒ प्र व॑र्धयामहे ॥३॥
di॒vi te॒ tūla॑moṣadhe pṛthi॒vyāma॑si॒ niṣṭhi॑taḥ | tvayā॑ sa॒hasra॑kāṇḍe॒nāyuḥ॒ pra va॑rdhayāmahe || ३ ||
ति॒स्रो दि॒वो अत्य॑तृणत् ति॒स्र इ॒माः पृ॑थि॒वीरु॒त॑।
त्व॑याहं दु॒र्हार्दो॑ जि॒ह्वां नि तृ॑णद्मि॒ वचां॑सि ॥४॥
ti॒sro di॒vo atya॑tṛṇat ti॒sra i॒māḥ pṛ॑thi॒vīru॒ta॑ | tva॑yāhaṃ du॒rhārdo॑ ji॒hvāṃ ni tṛ॑ṇadmi॒ vacāṃ॑si || ४ ||
त्वम॑सि॒ सह॑मानो॒ऽहम॑स्मि॒ सह॑स्वान्।
उ॒भौ सह॑स्वन्तौ भू॒त्वा स॒पत्ना॑न्सहिषीवहि ॥५॥
tvama॑si॒ saha॑māno॒’hama॑smi॒ saha॑svān | u॒bhau saha॑svantau bhū॒tvā sa॒patnā॑nsahiṣīvahi || ५ ||
सह॑स्व नो अ॒भिमा॑तिं॒ सह॑स्व पृतनाय॒तः ।
सह॑स्व॒ सर्वा॑न् दु॒र्हार्दः॑ सु॒हार्दो॑ मे ब॒हून् कृ॑धि ॥६॥
saha॑sva no a॒bhimā॑tiṃ॒ saha॑sva pṛtanāya॒taḥ | saha॑sva॒ sarvā॑n du॒rhārdaḥ॑ su॒hārdo॑ me ba॒hūn kṛ॑dhi || ६ ||
द॒र्भेण॑ दे॒वजा॑तेन दि॒वि ष्ट॒म्भेन॒ शश्व॒दित्।
तेना॒हं शश्व॑तो॒ जनाँ॒ अस॑नं॒ सन॑वानि च ॥७॥
da॒rbheṇa॑ de॒vajā॑tena di॒vi ṣṭa॒mbhena॒ śaśva॒dit | tenā॒haṃ śaśva॑to॒ janām॒̐ asa॑naṃ॒ sana॑vāni ca || ७ ||
प्रि॒यं मा॑ दर्भ कृणु ब्रह्मराज॒न्याऽभ्यां शू॒द्राय॒ चार्या॑य च ।
यस्मै॑ च का॒मया॑महे॒ सर्व॑स्मै च वि॒पश्य॑ते ॥८॥
pri॒yaṃ mā॑ darbha kṛṇu brahmarāja॒nyā’bhyāṃ śū॒drāya॒ cāryā॑ya ca | yasmai॑ ca kā॒mayā॑mahe॒ sarva॑smai ca vi॒paśya॑te || ८ ||
यो जाय॑मानः पृथि॒वीमदृं॑ह॒द् यो अस्त॑भ्नाद॒न्तरि॑क्षं॒ दिवं॑ च ।
यं बिभ्र॑तं न॒नु पा॒प्मा वि॑वेद॒ स नो॒ऽयं द॒र्भो वरु॑णो दि॒वा कः॑ ॥९॥
yo jāya॑mānaḥ pṛthi॒vīmadṛṃ॑ha॒d yo asta॑bhnāda॒ntari॑kṣaṃ॒ divaṃ॑ ca | yaṃ bibhra॑taṃ na॒nu pā॒pmā vi॑veda॒ sa no॒’yaṃ da॒rbho varu॑ṇo di॒vā kaḥ॑ || ९ ||
स॒प॒त्न॒हा श॒तका॑ण्डः॒ सह॑स्वा॒नोष॑धीनां प्रथ॒मः सं ब॑भूव ।
स नो॒ऽयं द॒र्भः परि॑ पातु वि॒श्वत॒स्तेन॑ साक्षीय॒ पृत॑नाः पृतन्य॒तः ॥१०॥
sa॒pa॒tna॒hā śa॒takā॑ṇḍaḥ॒ saha॑svā॒noṣa॑dhīnāṃ pratha॒maḥ saṃ ba॑bhūva | sa no॒’yaṃ da॒rbhaḥ pari॑ pātu vi॒śvata॒stena॑ sākṣīya॒ pṛta॑nāḥ pṛtanya॒taḥ || १० ||