EeseDharmaSanātana Library
31काण्ड 19 · सूक्त 31
Atharvaveda Śaunaka Kand 19, Sukta 31.
14 shlok११ , १३ पञ्चपदा शक्वरी, १४ विराडास्तारपङ्क्तिः।
औदु॑म्बरेण म॒णिना॒ पुष्टि॑कामाय वे॒धसा ।
प॒शूणां॒ सर्वे॑षां स्फा॒तिं गो॒ष्ठे मे॑ सवि॒ता क॑रत् ॥१॥
११ , १३ pañcapadā śakvarī, १४ virāḍāstārapaṅktiḥ | audu॑mbareṇa ma॒ṇinā॒ puṣṭi॑kāmāya ve॒dhasā | pa॒śūṇāṃ॒ sarve॑ṣāṃ sphā॒tiṃ go॒ṣṭhe me॑ savi॒tā ka॑rat || १ ||
यो नो॑ अ॒ग्निर्गार्ह॑पत्यः पशू॒नाम॑धि॒पा अस॑त्।
औदु॑म्बरो॒ वृषा॑ म॒णिः सं मा॑ सृजतु पु॒ष्ट्या ॥२॥
yo no॑ a॒gnirgārha॑patyaḥ paśū॒nāma॑dhi॒pā asa॑t | audu॑mbaro॒ vṛṣā॑ ma॒ṇiḥ saṃ mā॑ sṛjatu pu॒ṣṭyā || २ ||
क॒री॒षिणीं॒ फल॑वतीं स्व॒धामिरां॑ च नो गृ॒हे।
औदु॑म्बरस्य॒ तेज॑सा धा॒ता पु॒ष्टिं द॑धातु मे ॥३॥
ka॒rī॒ṣiṇīṃ॒ phala॑vatīṃ sva॒dhāmirāṃ॑ ca no gṛ॒he | audu॑mbarasya॒ teja॑sā dhā॒tā pu॒ṣṭiṃ da॑dhātu me || ३ ||
यद् द्वि॒पाच्च॒ चतु॑ष्पाच्च॒ यान्यन्ना॑नि॒ ये रसाः॑ ।
गृ॒ह्णे॒३हं॑ त्वेषां॑ भू॒मानं॒ बिभ्र॒दौदु॑म्बरं म॒णिम् ॥४॥
yad dvi॒pācca॒ catu॑ṣpācca॒ yānyannā॑ni॒ ye rasāḥ॑ | gṛ॒hṇe॒३haṃ॑ tveṣāṃ॑ bhū॒mānaṃ॒ bibhra॒daudu॑mbaraṃ ma॒ṇim || ४ ||
पु॒ष्टिं प॑शू॒नां परि॑ जग्रभा॒हं चतु॑ष्पदां द्वि॒पदां॒ यच्च॑ धा॒न्यम्।
पयः॑ पशू॒नां रस॒मोष॑धीनां॒ बृह॒स्पतिः॑ सवि॒ता मे॒ नि य॑च्छात् ॥५॥
pu॒ṣṭiṃ pa॑śū॒nāṃ pari॑ jagrabhā॒haṃ catu॑ṣpadāṃ dvi॒padāṃ॒ yacca॑ dhā॒nyam | payaḥ॑ paśū॒nāṃ rasa॒moṣa॑dhīnāṃ॒ bṛha॒spatiḥ॑ savi॒tā me॒ ni ya॑cchāt || ५ ||
अ॒हं प॑शू॒नाम॑धि॒पा अ॑सानि॒ मयि॑ पु॒ष्टं पु॑ष्ट॒पति॑र्दधातु ।
मह्य॒मौदु॑म्बरो म॒णिर्द्रवि॑णानि॒ नि य॑च्छतु ॥६॥
a॒haṃ pa॑śū॒nāma॑dhi॒pā a॑sāni॒ mayi॑ pu॒ṣṭaṃ pu॑ṣṭa॒pati॑rdadhātu | mahya॒maudu॑mbaro ma॒ṇirdravi॑ṇāni॒ ni ya॑cchatu || ६ ||
उप॒ मौदु॑म्बरो म॒णिः प्र॒जया॑ च॒ धने॑न च ।
इन्द्रे॑ण जिन्वि॒तो म॒णिरा मा॑गन्त्स॒ह वर्च॑सा ॥७॥
upa॒ maudu॑mbaro ma॒ṇiḥ pra॒jayā॑ ca॒ dhane॑na ca | indre॑ṇa jinvi॒to ma॒ṇirā mā॑gantsa॒ha varca॑sā || ७ ||
दे॒वो म॒णिः स॑पत्न॒हा ध॑न॒सा धन॑सातये ।
प॒शोरन्न॑स्य भू॒मानं॒ गवां॑ स्फा॒तिं नि य॑च्छतु ॥८॥
de॒vo ma॒ṇiḥ sa॑patna॒hā dha॑na॒sā dhana॑sātaye | pa॒śoranna॑sya bhū॒mānaṃ॒ gavāṃ॑ sphā॒tiṃ ni ya॑cchatu || ८ ||
यथाग्रे॒ त्वं व॑नस्पते पु॒ष्ठ्या स॒ह ज॑ज्ञि॒षे।
ए॒वा धन॑स्य मे स्फा॒तिमा द॑धातु॒ सर॑स्वती ॥९॥
yathāgre॒ tvaṃ va॑naspate pu॒ṣṭhyā sa॒ha ja॑jñi॒ṣe | e॒vā dhana॑sya me sphā॒timā da॑dhātu॒ sara॑svatī || ९ ||
आ मे॒ धनं॒ सर॑स्वती॒ पय॑स्फातिं च धा॒न्यऽम्।
सि॒नी॒वा॒ल्युपा॑ वहाद॒यं चौदु॑म्बरो म॒णिः ॥१०॥
ā me॒ dhanaṃ॒ sara॑svatī॒ paya॑sphātiṃ ca dhā॒nya’m | si॒nī॒vā॒lyupā॑ vahāda॒yaṃ caudu॑mbaro ma॒ṇiḥ || १० ||
त्वं म॑णी॒नाम॑धि॒पा वृषा॑सि॒ त्वयि॑ पु॒ष्टं पु॑ष्ट॒पति॑र्जजान ।
त्वयी॒मे वाजा॒ द्रवि॑णानि॒ सर्वौदु॑म्बरः॒ स त्वम॒स्मत् स॑हस्वा॒रादरा॑ति॒मम॑तिं॒ क्षुधं॑ च ॥११॥
tvaṃ ma॑ṇī॒nāma॑dhi॒pā vṛṣā॑si॒ tvayi॑ pu॒ṣṭaṃ pu॑ṣṭa॒pati॑rjajāna | tvayī॒me vājā॒ dravi॑ṇāni॒ sarvaudu॑mbaraḥ॒ sa tvama॒smat sa॑hasvā॒rādarā॑ti॒mama॑tiṃ॒ kṣudhaṃ॑ ca || ११ ||
ग्रा॒म॒णीर॑सि ग्राम॒णीरु॒त्थाया॒भिषि॑क्तो॒ऽभि मा॑ सिञ्च॒ वर्च॑सा ।
तेजो॑ऽसि॒ तेजो॒ मयि॑ धार॒याधि॑ र॒यिर॑सि र॒यिं मे॑ धेहि ॥१२॥
grā॒ma॒ṇīra॑si grāma॒ṇīru॒tthāyā॒bhiṣi॑kto॒’bhi mā॑ siñca॒ varca॑sā | tejo॑’si॒ tejo॒ mayi॑ dhāra॒yādhi॑ ra॒yira॑si ra॒yiṃ me॑ dhehi || १२ ||
पु॒ष्टिर॑सि पु॒ष्ट्या मा॒ सम॑ङ्ग्धि गृहमे॒धी गृ॒हप॑तिं मा कृणु ।
औदु॑म्बरः॒ स त्वम॒स्मासु॑ धेहि र॒यिं च॑ नः॒ सर्व॑वीरं॒ नि य॑च्छ रा॒यस्पोषा॑य॒ प्रति॑ मुञ्चे अ॒हं त्वाम् ॥१३॥
pu॒ṣṭira॑si pu॒ṣṭyā mā॒ sama॑ṅgdhi gṛhame॒dhī gṛ॒hapa॑tiṃ mā kṛṇu | audu॑mbaraḥ॒ sa tvama॒smāsu॑ dhehi ra॒yiṃ ca॑ naḥ॒ sarva॑vīraṃ॒ ni ya॑ccha rā॒yaspoṣā॑ya॒ prati॑ muñce a॒haṃ tvām || १३ ||
अ॒यमौदु॑म्बरो म॒णिर्वी॒रो वी॒राय॑ बध्यते ।
स नः॑ स॒निं मधु॑मतीं कृणोतु र॒यिं च॑ नः॒ सर्व॑वीरं॒ नि य॑च्छात् ॥१४॥
a॒yamaudu॑mbaro ma॒ṇirvī॒ro vī॒rāya॑ badhyate | sa naḥ॑ sa॒niṃ madhu॑matīṃ kṛṇotu ra॒yiṃ ca॑ naḥ॒ sarva॑vīraṃ॒ ni ya॑cchāt || १४ ||