EeseDharmaSanātana Library
30काण्ड 19 · सूक्त 30
Atharvaveda Śaunaka Kand 19, Sukta 30.
5 shlokयत् ते॑ दर्भ ज॒रामृ॑त्युः श॒तं वर्म॑सु॒ वर्म॑ ते ।
तेने॒मं व॒र्मिणं॑ कृ॒त्वा स॒पत्नां॑ जहि वी॒र्यैः ॥१॥
yat te॑ darbha ja॒rāmṛ॑tyuḥ śa॒taṃ varma॑su॒ varma॑ te | tene॒maṃ va॒rmiṇaṃ॑ kṛ॒tvā sa॒patnāṃ॑ jahi vī॒ryaiḥ || १ ||
श॒तं ते॑ दर्भ॒ वर्मा॑णि स॒हस्रं॑ वी॒र्या॑णि ते ।
तम॒स्मै विश्वे॒ त्वां दे॒वा ज॒रसे॒ भर्त॒वा अ॑दुः ॥२॥
śa॒taṃ te॑ darbha॒ varmā॑ṇi sa॒hasraṃ॑ vī॒ryā॑ṇi te | tama॒smai viśve॒ tvāṃ de॒vā ja॒rase॒ bharta॒vā a॑duḥ || २ ||
त्वामा॑हुर्देव॒वर्म॒ त्वां द॑र्भ॒ ब्रह्म॑ण॒स्पति॑म्।
त्वामिन्द्र॑स्याहु॒र्वर्म॒ त्वं रा॒ष्ट्राणि॑ रक्षसि ॥३॥
tvāmā॑hurdeva॒varma॒ tvāṃ da॑rbha॒ brahma॑ṇa॒spati॑m | tvāmindra॑syāhu॒rvarma॒ tvaṃ rā॒ṣṭrāṇi॑ rakṣasi || ३ ||
स॒प॒त्न॒क्षय॑णं दर्भ द्विष॒तस्तप॑नं हृ॒दः ।
म॒णिं क्ष॒त्रस्य॒ वर्ध॑नं तनू॒पानं॑ कृणोमि ते ॥४॥
sa॒pa॒tna॒kṣaya॑ṇaṃ darbha dviṣa॒tastapa॑naṃ hṛ॒daḥ | ma॒ṇiṃ kṣa॒trasya॒ vardha॑naṃ tanū॒pānaṃ॑ kṛṇomi te || ४ ||
यत् स॑मु॒द्रो अ॒भ्यक्र॑न्दत् प॒र्जन्यो॑ वि॒द्युता॑ स॒ह।
ततो॑ हिर॒ण्ययो॑ बि॒न्दुस्ततो॑ द॒र्भो अ॑जायत ॥५॥
yat sa॑mu॒dro a॒bhyakra॑ndat pa॒rjanyo॑ vi॒dyutā॑ sa॒ha | tato॑ hira॒ṇyayo॑ bi॒ndustato॑ da॒rbho a॑jāyata || ५ ||