EeseDharmaSanātana Library
27काण्ड 19 · सूक्त 27
Atharvaveda Śaunaka Kand 19, Sukta 27.
15 shlokगोभि॑ष्ट्वा पात्वृष॒भो वृषा॑ त्वा पातु वा॒जिभिः॑ ।
वा॒युष्त्वा॒ ब्रह्म॑णा पा॒त्विन्द्र॑स्त्वा पात्विन्द्रि॒यैः ॥१॥
gobhi॑ṣṭvā pātvṛṣa॒bho vṛṣā॑ tvā pātu vā॒jibhiḥ॑ | vā॒yuṣtvā॒ brahma॑ṇā pā॒tvindra॑stvā pātvindri॒yaiḥ || १ ||
सोम॑स्त्वा पा॒त्वोष॑धीभि॒र्नक्ष॑त्रैः पातु॒ सूर्यः॑ ।
मा॒द्भ्यस्त्वा॑ च॒न्द्रो वृ॑त्र॒हा वातः॑ प्रा॒णेन॑ रक्षतु ॥२॥
soma॑stvā pā॒tvoṣa॑dhībhi॒rnakṣa॑traiḥ pātu॒ sūryaḥ॑ | mā॒dbhyastvā॑ ca॒ndro vṛ॑tra॒hā vātaḥ॑ prā॒ṇena॑ rakṣatu || २ ||
ति॒स्रो दिव॑स्ति॒स्रः पृ॑थि॒वीस्त्रीण्य॒न्तरि॑क्षाणि च॒तुरः॑ समु॒द्रान्।
त्रि॒वृतं॒ स्तोमं॑ त्रि॒वृत॒ आप॑ आहु॒स्तास्त्वा॑ रक्षन्तु त्रि॒वृता॑ त्रि॒वृद्भिः॑ ॥३॥
ti॒sro diva॑sti॒sraḥ pṛ॑thi॒vīstrīṇya॒ntari॑kṣāṇi ca॒turaḥ॑ samu॒drān | tri॒vṛtaṃ॒ stomaṃ॑ tri॒vṛta॒ āpa॑ āhu॒stāstvā॑ rakṣantu tri॒vṛtā॑ tri॒vṛdbhiḥ॑ || ३ ||
त्रीन्नाकां॒स्त्रीन्त्स॑मु॒द्रांस्त्रीन् ब्र॒ध्नांस्त्रीन् वै॑ष्ट॒पान्।
त्रीन् मा॑त॒रिश्व॑न॒स्त्रीन्त्सूर्या॑न् गो॒प्तॄन् क॑ल्पयामि ॥४॥
trīnnākāṃ॒strīntsa॑mu॒drāṃstrīn bra॒dhnāṃstrīn vai॑ṣṭa॒pān | trīn mā॑ta॒riśva॑na॒strīntsūryā॑n go॒ptṝn ka॑lpayāmi || ४ ||
घृ॒तेन॑ त्वा॒ समु॑क्षा॒म्यग्न॒ आज्ये॑न व॒र्धय॑न्।
अ॒ग्नेश्च॒न्द्रस्य॒ सूर्य॑स्य॒ मा प्रा॒णं मा॒यिनो॑ दभन् ॥५॥
ghṛ॒tena॑ tvā॒ samu॑kṣā॒myagna॒ ājye॑na va॒rdhaya॑n | a॒gneśca॒ndrasya॒ sūrya॑sya॒ mā prā॒ṇaṃ mā॒yino॑ dabhan || ५ ||
मा वः॑ प्रा॒णं मा वो॑ऽपा॒नं मा हरो॑ मा॒यिनो॑ दभन्।
भ्राज॑न्तो वि॒श्ववे॑दसो दे॒वा दैव्ये॑न धावत ॥६॥
mā vaḥ॑ prā॒ṇaṃ mā vo॑’pā॒naṃ mā haro॑ mā॒yino॑ dabhan | bhrāja॑nto vi॒śvave॑daso de॒vā daivye॑na dhāvata || ६ ||
प्रा॒नेना॒ग्निं सं सृ॑जति॒ वातः॑ प्रा॒णेन॑ संहि॑तः ।
प्रा॒णेन॑ वि॒श्वतो॑मुखं॒ सुर्यं॑ दे॒वा अ॑जनयन् ॥७॥
prā॒nenā॒gniṃ saṃ sṛ॑jati॒ vātaḥ॑ prā॒ṇena॑ saṃhi॑taḥ | prā॒ṇena॑ vi॒śvato॑mukhaṃ॒ suryaṃ॑ de॒vā a॑janayan || ७ ||
आयु॑षायुः॒कृतां॑ जी॒वायु॑ष्मान् जीव॒ मा मृ॑थाः ।
प्रा॒णेना॑त्म॒न्वतां जीव॒ मा मृ॒त्योरुद॑गा॒ वश॑म् ॥८॥
āyu॑ṣāyuḥ॒kṛtāṃ॑ jī॒vāyu॑ṣmān jīva॒ mā mṛ॑thāḥ | prā॒ṇenā॑tma॒nvatāṃ jīva॒ mā mṛ॒tyoruda॑gā॒ vaśa॑m || ८ ||
दे॒वानां॒ निहि॑तं नि॒धिं यमिन्द्रो॒ऽन्ववि॑न्दत् प॒थिभि॑र्देव॒यानैः॑ ।
आपो॒ हिर॑ण्यं जुगुपुस्त्रि॒वृद्भि॒स्तास्त्वा॑ रक्षन्तु त्रि॒वृता॑ त्रि॒वृद्भिः॑ ॥९॥
de॒vānāṃ॒ nihi॑taṃ ni॒dhiṃ yamindro॒’nvavi॑ndat pa॒thibhi॑rdeva॒yānaiḥ॑ | āpo॒ hira॑ṇyaṃ jugupustri॒vṛdbhi॒stāstvā॑ rakṣantu tri॒vṛtā॑ tri॒vṛdbhiḥ॑ || ९ ||
त्रय॑स्त्रिंशद् दे॒वता॒स्त्रीणि॑ च वी॒र्याऽणि प्रिया॒यमा॑णा जुगुपुर॒प्स्व॑१न्तः ।
अ॒स्मिंश्च॒न्द्रे अधि॒ यद्धिर॑ण्यं॒ तेना॒यं कृ॑णवद् वी॒र्या॑णि ॥१०॥
traya॑striṃśad de॒vatā॒strīṇi॑ ca vī॒ryā’ṇi priyā॒yamā॑ṇā jugupura॒psva॑१ntaḥ | a॒smiṃśca॒ndre adhi॒ yaddhira॑ṇyaṃ॒ tenā॒yaṃ kṛ॑ṇavad vī॒ryā॑ṇi || १० ||
ये दे॑वा दि॒व्येका॑दश॒ स्थ ते दे॑वासो ह॒विरि॒दं जु॑षध्वम् ॥११॥
ye de॑vā di॒vyekā॑daśa॒ stha te de॑vāso ha॒viri॒daṃ ju॑ṣadhvam || ११ ||
ये दे॑वा अ॒न्तरि॑क्ष॒ एका॑दश॒ स्थ ते दे॑वासो ह॒विरि॒दं जु॑षध्वम् ॥१२॥
ye de॑vā a॒ntari॑kṣa॒ ekā॑daśa॒ stha te de॑vāso ha॒viri॒daṃ ju॑ṣadhvam || १२ ||
ये दे॑वा पृथि॒व्यामेका॑दश॒ स्थ ते दे॑वासो ह॒विरि॒दं जु॑षध्वम् ॥१३॥
ye de॑vā pṛthi॒vyāmekā॑daśa॒ stha te de॑vāso ha॒viri॒daṃ ju॑ṣadhvam || १३ ||
अ॒स॒प॒त्नं पु॒रस्ता॑त् प॒श्चान्नो॒ अभ॑यं कृतम्।
स॒वि॒ता मा॑ दक्षिण॒त उ॑त्त॒रान्मा॒ शची॒पतिः॑ ॥१४॥
a॒sa॒pa॒tnaṃ pu॒rastā॑t pa॒ścānno॒ abha॑yaṃ kṛtam | sa॒vi॒tā mā॑ dakṣiṇa॒ta u॑tta॒rānmā॒ śacī॒patiḥ॑ || १४ ||
दि॒वो मा॑दि॒त्या र॑क्षन्तु॒ भूम्या॑ रक्षन्त्व॒ग्नयः॑ ।
इ॒न्द्रा॒ग्नी र॑क्षतां मा पु॒रस्ता॑द॒श्विना॑व॒भितः॒ शर्म॑ यच्छताम्।
ति॒र॒श्चीन॒घ्न्या र॑क्षतु जा॒तवे॑दा भूत॒कृतो॑ मे स॒र्वतः॑ सन्तु॒ वर्म॑ ॥१५॥
di॒vo mā॑di॒tyā ra॑kṣantu॒ bhūmyā॑ rakṣantva॒gnayaḥ॑ | i॒ndrā॒gnī ra॑kṣatāṃ mā pu॒rastā॑da॒śvinā॑va॒bhitaḥ॒ śarma॑ yacchatām | ti॒ra॒ścīna॒ghnyā ra॑kṣatu jā॒tave॑dā bhūta॒kṛto॑ me sa॒rvataḥ॑ santu॒ varma॑ || १५ ||