EeseDharmaSanātana Library
24काण्ड 19 · सूक्त 24
Atharvaveda Śaunaka Kand 19, Sukta 24.
8 shlokयेन॑ दे॒वं स॑वि॒तारं॒ परि॑ दे॒वा अधा॑रयन्।
तेने॒मं ब्र॑ह्मणस्पते॒ परि॑ रा॒ष्ट्राय॑ धत्तन ॥१॥
yena॑ de॒vaṃ sa॑vi॒tāraṃ॒ pari॑ de॒vā adhā॑rayan | tene॒maṃ bra॑hmaṇaspate॒ pari॑ rā॒ṣṭrāya॑ dhattana || १ ||
परी॒ममिन्द्र॒मायु॑षे म॒हे क्ष॒त्राय॑ धत्तन ।
यथै॑नं ज॒रसे॑ न॒यां ज्योक् क्ष॒त्रेऽधि॑ जागरत् ॥२॥
parī॒mamindra॒māyu॑ṣe ma॒he kṣa॒trāya॑ dhattana | yathai॑naṃ ja॒rase॑ na॒yāṃ jyok kṣa॒tre’dhi॑ jāgarat || २ ||
परी॒मं सोम॒मायु॑षे म॒हे श्रोत्रा॑य धत्तन ।
यथै॑नं ज॒रसे॒ नयां ज्योक् क्ष॒त्रेऽधि॑ जागरत् ॥३॥
parī॒maṃ soma॒māyu॑ṣe ma॒he śrotrā॑ya dhattana | yathai॑naṃ ja॒rase॒ nayāṃ jyok kṣa॒tre’dhi॑ jāgarat || ३ ||
परि॑ धत्त ध॒त्त नो॒ वर्च॑से॒मं ज॒रामृ॑त्युं कृणुत दी॒र्घमायुः॑ ।
बृह॒स्पतिः॒ प्राय॑च्छ॒द् वास॑ ए॒तत् सोमा॑य॒ राज्ञे॒ परि॑धात॒वा उ॑ ॥४॥
pari॑ dhatta dha॒tta no॒ varca॑se॒maṃ ja॒rāmṛ॑tyuṃ kṛṇuta dī॒rghamāyuḥ॑ | bṛha॒spatiḥ॒ prāya॑ccha॒d vāsa॑ e॒tat somā॑ya॒ rājñe॒ pari॑dhāta॒vā u॑ || ४ ||
ज॒रां सु ग॑च्छ॒ परि॑ धत्स्व॒ वासो॒ भवा॑ गृष्टी॒नाम॑भिशस्ति॒पा उ॑ ।
श॒तं च॒ जीव॑ श॒रदः॑ पुरू॒ची रा॒यश्च॒ पोष॑मुप॒संव्य॑यस्व ॥५॥
ja॒rāṃ su ga॑ccha॒ pari॑ dhatsva॒ vāso॒ bhavā॑ gṛṣṭī॒nāma॑bhiśasti॒pā u॑ | śa॒taṃ ca॒ jīva॑ śa॒radaḥ॑ purū॒cī rā॒yaśca॒ poṣa॑mupa॒saṃvya॑yasva || ५ ||
परी॒दं वासो॑ अधिथाः स्व॒स्तयेऽभू॑र्वापी॒नाम॑भिशस्ति॒पा उ॑ ।
श॒तं च॒ जीव॑ श॒रदः॑ पुरू॒चीर्वसू॑नि॒ चारु॒र्वि भ॑जासि॒ जीव॑न् ॥६॥
parī॒daṃ vāso॑ adhithāḥ sva॒staye’bhū॑rvāpī॒nāma॑bhiśasti॒pā u॑ | śa॒taṃ ca॒ jīva॑ śa॒radaḥ॑ purū॒cīrvasū॑ni॒ cāru॒rvi bha॑jāsi॒ jīva॑n || ६ ||
योगे॑योगे त॒वस्त॑रं वाजे॑वाजे हवामहे ।
सखा॑य॒ इन्द्र॑मू॒तये॑ ॥७॥
yoge॑yoge ta॒vasta॑raṃ vāje॑vāje havāmahe | sakhā॑ya॒ indra॑mū॒taye॑ || ७ ||
हिर॑ण्यवर्णो अ॒जरः॑ सु॒वीरो॑ ज॒रामृ॑त्युः प्र॒जया॒ सं वि॑शस्व ।
तद॒ग्निरा॑ह॒ तदु॒ सोम॑ आह॒ बृह॒स्पतिः॑ सवि॒ता तदिन्द्रः॑ ॥८॥
hira॑ṇyavarṇo a॒jaraḥ॑ su॒vīro॑ ja॒rāmṛ॑tyuḥ pra॒jayā॒ saṃ vi॑śasva | tada॒gnirā॑ha॒ tadu॒ soma॑ āha॒ bṛha॒spatiḥ॑ savi॒tā tadindraḥ॑ || ८ ||