EeseDharmaSanātana Library
20काण्ड 19 · सूक्त 20
Atharvaveda Śaunaka Kand 19, Sukta 20.
4 shlokअप॒ न्यधुः॒ पौरु॑षेयं व॒धं यमि॑न्द्रा॒ग्नी धा॒ता स॑वि॒ता बृह॒स्पतिः॑ ।
सोमो॒ राजा॒ वरु॑णो अ॒श्विना॑ य॒मः पू॒षास्मान् परि॑ पातु मृ॒त्योः ॥१॥
apa॒ nyadhuḥ॒ pauru॑ṣeyaṃ va॒dhaṃ yami॑ndrā॒gnī dhā॒tā sa॑vi॒tā bṛha॒spatiḥ॑ | somo॒ rājā॒ varu॑ṇo a॒śvinā॑ ya॒maḥ pū॒ṣāsmān pari॑ pātu mṛ॒tyoḥ || १ ||
या॑नि॑ च॒कार॒ भुव॑नस्य॒ यस्पतिः॑ प्र॒जाप॑तिर्मात॒रिश्वा॑ प्र॒जाभ्यः॑ ।
प्र॒दिशो॒ यानि॑ वस॒ते दिश॑श्च॒ तानि॑ मे॒ वर्मा॑णि बहु॒लानि॑ सन्तु ॥२॥
yā॑ni॑ ca॒kāra॒ bhuva॑nasya॒ yaspatiḥ॑ pra॒jāpa॑tirmāta॒riśvā॑ pra॒jābhyaḥ॑ | pra॒diśo॒ yāni॑ vasa॒te diśa॑śca॒ tāni॑ me॒ varmā॑ṇi bahu॒lāni॑ santu || २ ||
यत् ते त॒नूष्वन॑ह्यन्त दे॒वा द्युरा॑जयो दे॒हिनः॑ ।
इन्द्रो॒ यच्चक्रे वर्म॒ तद॒स्मान् पा॑तु वि॒श्वतः॑ ॥३॥
yat te ta॒nūṣvana॑hyanta de॒vā dyurā॑jayo de॒hinaḥ॑ | indro॒ yaccakre varma॒ tada॒smān pā॑tu vi॒śvataḥ॑ || ३ ||
वर्म॑ मे॒ द्यावा॑पृथि॒वी वर्माह॒र्वर्म॒ सूर्यः॑ ।
वर्म॑ मे॒ विश्वे॑ दे॒वाः क्र॒न् मा मा प्राप॑त् प्रतीचि॒का ॥४॥
varma॑ me॒ dyāvā॑pṛthi॒vī varmāha॒rvarma॒ sūryaḥ॑ | varma॑ me॒ viśve॑ de॒vāḥ kra॒n mā mā prāpa॑t pratīci॒kā || ४ ||