EeseDharmaSanātana Library
2काण्ड 19 · सूक्त 2
Atharvaveda Śaunaka Kand 19, Sukta 2.
5 shlokशं त॒ आपो॑ हैमव॒तीः शमु॑ ते सन्तू॒त्स्याः ।
शं ते॑ सनि॒ष्यदा॒ आपः॒ शमु॑ ते सन्तु व॒र्ष्याः ॥१॥
śaṃ ta॒ āpo॑ haimava॒tīḥ śamu॑ te santū॒tsyāḥ | śaṃ te॑ sani॒ṣyadā॒ āpaḥ॒ śamu॑ te santu va॒rṣyāḥ || १ ||
शं त॒ आपो॑ धन्व॒न्याः॒३ शं ते॑ सन्त्वनू॒प्याः ।
शं ते॑ खनि॒त्रिमा॒ आपः॒ शं याः कु॒म्भेभि॒राभृ॑ताः ॥२॥
śaṃ ta॒ āpo॑ dhanva॒nyāḥ॒३ śaṃ te॑ santvanū॒pyāḥ | śaṃ te॑ khani॒trimā॒ āpaḥ॒ śaṃ yāḥ ku॒mbhebhi॒rābhṛ॑tāḥ || २ ||
अ॒न॒भ्रयः॒ खन॑माना॒ विप्रा॑ गम्भी॒रे अ॒पसः॑ ।
भि॒षग्भ्यो॑ भि॒षक्त॑रा॒ आपो॒ अच्छा॑ वदामसि ॥३॥
a॒na॒bhrayaḥ॒ khana॑mānā॒ viprā॑ gambhī॒re a॒pasaḥ॑ | bhi॒ṣagbhyo॑ bhi॒ṣakta॑rā॒ āpo॒ acchā॑ vadāmasi || ३ ||
अ॒पामह॑ दि॒व्याऽनाम॒पां स्रो॑त॒स्याऽनाम्।
अ॒पामह॑ प्र॒णेज॒नेऽश्वा॑ भवथ वा॒जिनः॑ ॥४॥
a॒pāmaha॑ di॒vyā’nāma॒pāṃ sro॑ta॒syā’nām | a॒pāmaha॑ pra॒ṇeja॒ne’śvā॑ bhavatha vā॒jinaḥ॑ || ४ ||
ता अ॒पः शि॒वा अ॒पोऽय॑क्ष्मं॒कर॑णीर॒पः ।
यथै॒व तृ॑प्यते॒ मय॒स्तास्त॒ आ द॑त्त भेष॒जीः ॥५॥
tā a॒paḥ śi॒vā a॒po’ya॑kṣmaṃ॒kara॑ṇīra॒paḥ | yathai॒va tṛ॑pyate॒ maya॒stāsta॒ ā da॑tta bheṣa॒jīḥ || ५ ||