EeseDharmaSanātana Library
18काण्ड 19 · सूक्त 18
Atharvaveda Śaunaka Kand 19, Sukta 18.
10 shlokअ॒ग्निं ते वसु॑वन्तमृच्छन्तु ।ये मा॑घा॒यवः॒ प्राच्या॑ दि॒शोऽभि॒दासा॑त् ॥१॥
a॒gniṃ te vasu॑vantamṛcchantu | ye mā॑ghā॒yavaḥ॒ prācyā॑ di॒śo’bhi॒dāsā॑t || १ ||
वा॒युं ते॒३ऽन्तरि॑क्षवन्तमृछन्तु । ये मा॑घा॒यवः॑ ए॒तस्या॑ दि॒शोऽभि॒दासा॑त् ॥२॥
vā॒yuṃ te॒३’ntari॑kṣavantamṛchantu | ye mā॑ghā॒yavaḥ॑ e॒tasyā॑ di॒śo’bhi॒dāsā॑t || २ ||
सोमं॒ ते रु॒द्रव॑न्तमृछन्तु । ये मा॑घा॒यवो॒ दक्षि॑णाया दि॒शोऽभि॒दासा॑त् ॥३॥
somaṃ॒ te ru॒drava॑ntamṛchantu | ye mā॑ghā॒yavo॒ dakṣi॑ṇāyā di॒śo’bhi॒dāsā॑t || ३ ||
वरु॑णं॒ त आ॑दि॒त्यव॑न्तमृच्छन्तु ।ये मा॑घा॒यव॑ ए॒तस्या॑ दि॒शोऽभि॒दासा॑त् ॥४॥
varu॑ṇaṃ॒ ta ā॑di॒tyava॑ntamṛcchantu | ye mā॑ghā॒yava॑ e॒tasyā॑ di॒śo’bhi॒dāsā॑t || ४ ||
सूर्यं॒ ते द्यावा॑पृथि॒वीव॑न्तमृच्छन्तु । ये मा॑घा॒यव॑ प्र॒तीच्याः॑ दि॒शोऽभि॒दासा॑त् ॥५॥
sūryaṃ॒ te dyāvā॑pṛthi॒vīva॑ntamṛcchantu | ye mā॑ghā॒yava॑ pra॒tīcyāḥ॑ di॒śo’bhi॒dāsā॑t || ५ ||
अ॒पस्त ओष॑धीमतीरृछन्तु । ये मा॑घा॒यव॑ ए॒तस्या॑ दि॒शोऽभि॒दासा॑त् ॥६॥
a॒pasta oṣa॑dhīmatīrṛchantu | ye mā॑ghā॒yava॑ e॒tasyā॑ di॒śo’bhi॒dāsā॑t || ६ ||
वि॒श्वक॑र्माणं॒ ते स॑प्तऋ॒षिव॑न्तमृच्छन्तु । ये मा॑घा॒यव॒ उदी॑च्या दि॒शोऽभि॒दासा॑त् ॥७॥
vi॒śvaka॑rmāṇaṃ॒ te sa॑ptaṛ॒ṣiva॑ntamṛcchantu | ye mā॑ghā॒yava॒ udī॑cyā di॒śo’bhi॒dāsā॑t || ७ ||
इन्द्रं॒ ते म॒रुत्व॑न्तमृच्छन्तु । ये मा॑घा॒यव॑ ए॒तस्या॑ दि॒शोऽभि॒दासा॑त् ॥८॥
indraṃ॒ te ma॒rutva॑ntamṛcchantu | ye mā॑ghā॒yava॑ e॒tasyā॑ di॒śo’bhi॒dāsā॑t || ८ ||
प्र॒जाप॑तिं॒ ते प्र॒जन॑नवन्तमृच्छन्तु । ये मा॑घा॒यवो॑ ध्रु॒वाया॑ दि॒शोऽभि॒दासा॑त् ॥९॥
pra॒jāpa॑tiṃ॒ te pra॒jana॑navantamṛcchantu | ye mā॑ghā॒yavo॑ dhru॒vāyā॑ di॒śo’bhi॒dāsā॑t || ९ ||
बृह॒स्पतिं॒ ते वि॒श्वदे॑ववन्तमृच्छन्तु । ये मा॑घा॒यव॑ ऊ॒र्ध्वाया॑ दि॒शोऽभि॒दासा॑त् ॥१०॥
bṛha॒spatiṃ॒ te vi॒śvade॑vavantamṛcchantu | ye mā॑ghā॒yava॑ ū॒rdhvāyā॑ di॒śo’bhi॒dāsā॑t || १० ||