EeseDharmaSanātana Library
15काण्ड 19 · सूक्त 15
Atharvaveda Śaunaka Kand 19, Sukta 15.
6 shlokयत॑ इन्द्र॒ भया॑महे॒ ततो॑ नो॒ अभ॑यं कृधि ।
मघ॑वंछ॒ग्धि तव॒ त्वं न॑ ऊ॒तिभि॒र्वि द्विषो॒ वि मृधो॑ जहि ॥१॥
yata॑ indra॒ bhayā॑mahe॒ tato॑ no॒ abha॑yaṃ kṛdhi | magha॑vaṃcha॒gdhi tava॒ tvaṃ na॑ ū॒tibhi॒rvi dviṣo॒ vi mṛdho॑ jahi || १ ||
इन्द्रं॑ व॒यम॑नूरा॒धं ह॑वाम॒हेऽनु॑ राध्यास्म द्वि॒पदा॒ चतु॑ष्पदा ।
मा नः॒ सेना॒ अर॑रुषी॒रुप॑ गु॒र्विषू॑चीरिन्द्र द्रु॒हो वि ना॑शय ॥२॥
indraṃ॑ va॒yama॑nūrā॒dhaṃ ha॑vāma॒he’nu॑ rādhyāsma dvi॒padā॒ catu॑ṣpadā | mā naḥ॒ senā॒ ara॑ruṣī॒rupa॑ gu॒rviṣū॑cīrindra dru॒ho vi nā॑śaya || २ ||
इन्द्र॑स्त्रा॒तोत वृ॑त्र॒हा प॑र॒स्फानो॒ वरे॑ण्यः ।
स र॑क्षि॒ता च॑रम॒तः स म॑ध्य॒तः स प॒श्चात् स पु॒रस्ता॑न्नो अस्तु ॥३॥
indra॑strā॒tota vṛ॑tra॒hā pa॑ra॒sphāno॒ vare॑ṇyaḥ | sa ra॑kṣi॒tā ca॑rama॒taḥ sa ma॑dhya॒taḥ sa pa॒ścāt sa pu॒rastā॑nno astu || ३ ||
उ॒रुं नो॑ लो॒कमनु॑ नेषि वि॒द्वान्त्स्व॑१र्यज्ज्योति॒रभ॑यं स्व॒स्ति।
उ॒ग्रा त॑ इन्द्र॒ स्थवि॑रस्य बा॒हू उप॑ क्षयेम शर॒णा बृ॒हन्ता॑ ॥४॥
u॒ruṃ no॑ lo॒kamanu॑ neṣi vi॒dvāntsva॑१ryajjyoti॒rabha॑yaṃ sva॒sti | u॒grā ta॑ indra॒ sthavi॑rasya bā॒hū upa॑ kṣayema śara॒ṇā bṛ॒hantā॑ || ४ ||
अभ॑यं नः करत्य॒न्तरि॑क्ष॒मभ॑यं॒ द्यावा॑पृथि॒वी उ॒भे इ॒मे।
अभ॑यं प॒श्चादभ॑यं पु॒रस्ता॑दुत्त॒राद॑ध॒रादभ॑यं नो अस्तु ॥५॥
abha॑yaṃ naḥ karatya॒ntari॑kṣa॒mabha॑yaṃ॒ dyāvā॑pṛthi॒vī u॒bhe i॒me | abha॑yaṃ pa॒ścādabha॑yaṃ pu॒rastā॑dutta॒rāda॑dha॒rādabha॑yaṃ no astu || ५ ||
अभ॑यं मि॒त्रादभ॑यम॒मित्रा॒दभ॑यं ज्ञा॒तादभ॑यं पु॒रो यः ।
अभ॑यं॒ नक्त॒मभ॑यं॒ दिवा॑ नः॒ सर्वा॒ आशा॒ मम॑ मि॒त्रं भ॑वन्तु ॥६॥
abha॑yaṃ mi॒trādabha॑yama॒mitrā॒dabha॑yaṃ jñā॒tādabha॑yaṃ pu॒ro yaḥ | abha॑yaṃ॒ nakta॒mabha॑yaṃ॒ divā॑ naḥ॒ sarvā॒ āśā॒ mama॑ mi॒traṃ bha॑vantu || ६ ||