EeseDharmaSanātana Library
13काण्ड 19 · सूक्त 13
Atharvaveda Śaunaka Kand 19, Sukta 13.
11 shlokइन्द्र॑स्य बा॒हू स्थवि॑रौ॒ वृषा॑णौ चि॒त्रा इ॒मा वृ॑ष॒भौ पा॑रयि॒ष्णू।
तौ यो॑क्षे प्रथ॒मो योग॒ आग॑ते॒ याभ्यां॑ जि॒तमसु॑राणां॒ स्व॑१र्यत् ॥१॥
indra॑sya bā॒hū sthavi॑rau॒ vṛṣā॑ṇau ci॒trā i॒mā vṛ॑ṣa॒bhau pā॑rayi॒ṣṇū | tau yo॑kṣe pratha॒mo yoga॒ āga॑te॒ yābhyāṃ॑ ji॒tamasu॑rāṇāṃ॒ sva॑१ryat || १ ||
आ॒शुः शिशा॑नो वृष॒भो न भी॒मो घ॑नाघ॒नः क्षोभ॑णश्चर्षणी॒नाम्।
सं॒क्रन्द॑नोऽनिमि॒ष ए॑कवी॒रः श॒तं सेना॑ अजयत् सा॒कमिन्द्रः॑ ॥२॥
ā॒śuḥ śiśā॑no vṛṣa॒bho na bhī॒mo gha॑nāgha॒naḥ kṣobha॑ṇaścarṣaṇī॒nām | saṃ॒kranda॑no’nimi॒ṣa e॑kavī॒raḥ śa॒taṃ senā॑ ajayat sā॒kamindraḥ॑ || २ ||
सं॒क्रन्द॑नेनानिमि॒षेण॑ जि॒ष्णुना॑ऽयो॒ध्येन॑ दुश्च्यव॒नेन॑ धृ॒ष्णुना॑ ।
तदिन्द्रे॑ण जयत॒ तत् स॑हध्वं॒ युधो॑ नर॒ इषु॑हस्तेन॒ वृष्णा॑ ॥३॥
saṃ॒kranda॑nenānimi॒ṣeṇa॑ ji॒ṣṇunā॑’yo॒dhyena॑ duścyava॒nena॑ dhṛ॒ṣṇunā॑ | tadindre॑ṇa jayata॒ tat sa॑hadhvaṃ॒ yudho॑ nara॒ iṣu॑hastena॒ vṛṣṇā॑ || ३ ||
स इषु॑हस्तैः॒ स नि॑ष॒ङ्गिभि॑र्व॒शी संस्र॑ष्टा॒ स युध॒ इन्द्रो॑ ग॒णेन॑ ।
सं॒सृ॒ष्ट॒जित् सो॑म॒पा बा॑हुश॒र्ध्यु॑१ग्रध॑न्वा॒ प्रति॑हिताभि॒रस्ता॑ ॥४॥
sa iṣu॑hastaiḥ॒ sa ni॑ṣa॒ṅgibhi॑rva॒śī saṃsra॑ṣṭā॒ sa yudha॒ indro॑ ga॒ṇena॑ | saṃ॒sṛ॒ṣṭa॒jit so॑ma॒pā bā॑huśa॒rdhyu॑१gradha॑nvā॒ prati॑hitābhi॒rastā॑ || ४ ||
ब॒ल॒वि॒ज्ञा॒यः स्थवि॑रः॒ प्रवी॑रः॒ सह॑स्वान् वा॒जी सह॑मान उ॒ग्रः ।
अ॒भिवी॑रो अ॒भिष॑त्वा सहो॒जिज्जैत्र॑मिन्द्र॒ रथ॒मा ति॑ष्ठ गो॒विद॑म् ॥५॥
ba॒la॒vi॒jñā॒yaḥ sthavi॑raḥ॒ pravī॑raḥ॒ saha॑svān vā॒jī saha॑māna u॒graḥ | a॒bhivī॑ro a॒bhiṣa॑tvā saho॒jijjaitra॑mindra॒ ratha॒mā ti॑ṣṭha go॒vida॑m || ५ ||
इ॒मं वी॒रमनु॑ हर्षध्वमु॒ग्रमिन्द्रं॑ सखायो॒ अनु॒ सं र॑भध्वम्।
ग्रा॒म॒जितं॑ गो॒जितं॒ वज्र॑बाहुं॒ जय॑न्त॒मज्म॑ प्रमृ॒णन्त॒मोज॑सा ॥६॥
i॒maṃ vī॒ramanu॑ harṣadhvamu॒gramindraṃ॑ sakhāyo॒ anu॒ saṃ ra॑bhadhvam | grā॒ma॒jitaṃ॑ go॒jitaṃ॒ vajra॑bāhuṃ॒ jaya॑nta॒majma॑ pramṛ॒ṇanta॒moja॑sā || ६ ||
अ॒भि गो॒त्राणि॒ सह॑सा॒ गाह॑मानोऽदा॒य उ॒ग्रः श॒तम॑न्यु॒रिन्द्रः॑ ।
दु॒श्च्य॒व॒नः पृ॑तना॒षाड॑यो॒ध्यो३ऽस्माकं॒ सेना॑ अवतु॒ प्र यु॒त्सु ॥७॥
a॒bhi go॒trāṇi॒ saha॑sā॒ gāha॑māno’dā॒ya u॒graḥ śa॒tama॑nyu॒rindraḥ॑ | du॒ścya॒va॒naḥ pṛ॑tanā॒ṣāḍa॑yo॒dhyo३’smākaṃ॒ senā॑ avatu॒ pra yu॒tsu || ७ ||
बृह॑स्पते॒ परि॑ दीया॒ रथे॑न रक्षो॒हामित्राँ॑ अप॒बाध॑मानः ।
प्र॒भ॒ञ्जंछत्रू॑न् प्रमृ॒णन्न॒मित्रा॑न॒स्माक॑मेध्यवि॒ता त॒नूना॑म् ॥८॥
bṛha॑spate॒ pari॑ dīyā॒ rathe॑na rakṣo॒hāmitrām̐॑ apa॒bādha॑mānaḥ | pra॒bha॒ñjaṃchatrū॑n pramṛ॒ṇanna॒mitrā॑na॒smāka॑medhyavi॒tā ta॒nūnā॑m || ८ ||
इन्द्र॑ एषां ने॒ता बृह॒स्पति॒र्दक्षि॑णा य॒ज्ञः पु॒र ए॑तु॒ सोमः॑ ।
दे॒व॒से॒नाना॑मभिभञ्जती॒नां जय॑न्तीनां म॒रुतो॑ यन्तु॒ मध्ये॑ ॥९॥
indra॑ eṣāṃ ne॒tā bṛha॒spati॒rdakṣi॑ṇā ya॒jñaḥ pu॒ra e॑tu॒ somaḥ॑ | de॒va॒se॒nānā॑mabhibhañjatī॒nāṃ jaya॑ntīnāṃ ma॒ruto॑ yantu॒ madhye॑ || ९ ||
इन्द्र॑स्य॒ वृष्णो॒ वरु॑णस्य॒ राज्ञ॑ आदि॒त्यानां॑ म॒रुतां॒ शर्ध॑ उ॒ग्रम्।
म॒हाम॑नसां भुवनच्य॒वानां॒ घोषो॑ दे॒वानां॒ जय॑ता॒मुद॑स्थात् ॥१०॥
indra॑sya॒ vṛṣṇo॒ varu॑ṇasya॒ rājña॑ ādi॒tyānāṃ॑ ma॒rutāṃ॒ śardha॑ u॒gram | ma॒hāma॑nasāṃ bhuvanacya॒vānāṃ॒ ghoṣo॑ de॒vānāṃ॒ jaya॑tā॒muda॑sthāt || १० ||
अ॒स्माक॒मिन्द्रः॒ समृ॑तेषु ध्व॒जेष्व॒स्माक॒ या इष॑व॒स्ता ज॑यन्तु ।
अ॒स्माकं॑ वी॒रा उत्त॑रे भवन्त्व॒स्मान् दे॑वासोऽवता॒ हवे॑षु ॥११॥
a॒smāka॒mindraḥ॒ samṛ॑teṣu dhva॒jeṣva॒smāka॒ yā iṣa॑va॒stā ja॑yantu | a॒smākaṃ॑ vī॒rā utta॑re bhavantva॒smān de॑vāso’vatā॒ have॑ṣu || ११ ||