Kand 15 · Sukta 2

१-३२ atharvā | adhyātmaṃ, vrātyaḥ | १, ६, ९, १७, २५, ३० sāmnyanuṣṭup; २, १८, २६ sāmnī triṣṭup; ३ dvipadā’rṣī paṅktiḥ ४, २०, २८ dvipadā brāhmī gāyatrī; ५, १३ २१, २९, dvipadā’rcī gāyatrī; १४ sāmnī paṅktiḥ २२ āsurī gāyatrī; ७, १५, २३, ३१ padapaṅktiḥ; ८, १६, २४, ३२ tripadā prājāpatyā triṣṭup; १० ekapadā uṣṇik; ११ dvipadā’rṣī bhurik triṣṭup १२ ārṣī parā’nuṣṭup; १९ dvipadā virāḍārṣī paṅktiḥ; २७ nicṛdārṣī paṅktiḥ | sa uda॑tiṣṭha॒t sa prācīṃ॒ diśa॒manu॒ vya’calat || १ ||

taṃ bṛ॒hacca॑ rathaṃta॒raṃ cā॑di॒tyāśca॒ viśve॑ ca de॒vā a॑nu॒vya॒’ calan || २ ||

bṛ॒ha॒te ca॒ vai sa ra॑thaṃta॒rāya॑ cādi॒tyebhya॑śca॒ viśve॑bhyaśca de॒vebhya॒ ā vṛ॑ścate॒ ya e॒vaṃ vi॒dvāṃsaṃ॒ vrātya॑mupa॒vada॑ti || ३ ||

bṛ॒ha॒taśca॒ vai sa ra॑thaṃta॒rasya॑ cādi॒tyānāṃ॑ ca॒ viśve॑ṣāṃ ca de॒vānāṃ॑ priyaṃ dhāma॑ bhavati॒ tasya॒ prācyāṃ॑ di॒śi || ४ ||

śra॒ddhā puṃ॑śca॒lī mi॒tro mā॑ga॒dho vi॒jñānaṃ॒ vāso’ha॑ru॒ṣṇīṣaṃ॒ rātrī॒ keśā॒ hari॑tau prava॒rtau ka॑lma॒lirma॒ṇiḥ || ५ ||

bhū॒taṃ ca॑ bhavi॒ṣyacca॑ pariṣka॒ndau mano॑ vipa॒tham || ६ ||

mā॒ta॒riśvā॑ ca॒ pava॑mānaśca vipathavā॒hau vātaḥ॒ sāra॑thī re॒ṣmā pra॑to॒daḥ || ७ ||

kī॒rtiśca॒ yaśa॑śca puraḥsa॒rāvainaṃ॑ kī॒rtirga॑ccha॒tyā yaśo॑ gacchati॒ ya e॒vaṃ veda॑ || ८ ||

sa uda॑tiṣṭha॒t sa dakṣi॑ṇāṃ॒ diśa॒manu॒ vya’calat || ९ ||

taṃ ya॑jñāya॒jñiyaṃ॑ ca vāmade॒vyaṃ ca॑ ya॒jñaśca॒ yaja॑mānaśca pa॒śava॑ścānu॒vya’calan || १० ||

ya॒jñā॒ya॒jñiyā॑ya ca॒ vai sa vā॑made॒vyāya॑ ca ya॒jñāya॑ ca॒ yaja॑mānāya ca pa॒śubhya॒ścā vṛ॑ścate॒ ya e॒vaṃ vi॒dvāṃsaṃ॒ vrātya॑mupa॒vada॑ti || ११ ||

ya॒jñā॒ya॒jñiya॑sya ca॒ vai sa vā॑made॒vyasya॑ ca ya॒jñasya॑ ca॒ yaja॑mānasya ca paśū॒nāṃ ca॑ pri॒yaṃ dhāma॑ bhavati॒ tasya॒ dakṣi॑ṇāyāṃ di॒śi || १२ ||

u॒ṣāḥ puṃ॑śca॒lī mantro॑ māga॒dho vi॒jñānaṃ॒ vāso’ha॑ru॒ṣṇīṣaṃ॒ rātrī॒ keśā॒ hari॑tau prava॒rtau ka॑lma॒lirma॒ṇiḥ || १३ ||

a॒mā॒vā॒syā’ ca paurṇamā॒sī ca॑ pariṣka॒ndau mano॑ vipa॒tham || १४ ||

mā॒ta॒riśvā॑ ca॒ pava॑mānaśca vipathavā॒hau vā॒taḥ sāra॑thī re॒ṣmā pra॑to॒daḥ || १५ ||

kī॒rtiśca॒ yaśa॑śca puraḥsa॒rāvainaṃ॑ kī॒rtirga॑ccha॒tyā yaśo॑ gacchati॒ ya e॒vaṃ veda॑ || १६ sa uda॑tiṣṭha॒t sa pra॒tīcīṃ॒ diśa॒manu॒ vya’calat || १७ ||

taṃ vai॑rū॒paṃ ca॑ vairā॒jaṃ cāpa॑śca॒ varu॑ṇaśca॒ rājā॑nu॒vya’calan || १८ ||

vai॒rū॒pāya॑ ca॒ vai sa vai॑rā॒jāya॑ cā॒dbhyaśca॒ varu॑ṇāya ca॒ rājña॒ ā vṛ॑ścate॒ ya e॒vaṃ vi॒dvāṃsaṃ॒ vrātya॑mupa॒vada॑ti || १९ ||

vai॒rū॒pasya॑ ca॒ vai sa vai॑rā॒jasya॑ cā॒pāṃ ca॒ varu॑ṇasya ca॒ rājñaḥ॑ pri॒yaṃ dhāma॑ bhavati॒ tasya॑ pra॒tīcyāṃ॑ di॒śī || २० ||

i॒rā puṃ॑śca॒lī haso॑ māga॒dho vi॒jñānaṃ॒ vāso’ha॑ru॒ṣṇīṣaṃ॒ rātrī॒ keśā॒ hari॑tau prava॒rtau ka॑lma॒lirma॒ṇiḥ || २१ ||

aha॑śca॒ rātrī॑ ca pariṣka॒ndau mano॑ vipa॒tham || २२ ||

mā॒ta॒riśvā॑ ca॒ pava॑mānaśca vipathavā॒hau vātaḥ॒ sāra॑thī re॒ṣmā pra॑to॒daḥ || २३ ||

kī॒rtiśca॒ yaśa॑śca puraḥsa॒rāvainaṃ॑ kī॒rtirga॑ccha॒tyā yaśo॑ gacchati॒ ya e॒vaṃ veda॑ || २४ ||

sa uda॑tiṣṭha॒t sa udī॑cīṃ॒ diśa॒manu॒ vya’ calat || २५ ||

taṃ śyai॒taṃ ca॑ naudha॒saṃ ca॑ sapta॒rṣaya॑śca॒ soma॑śca॒ rājā॑nu॒vya’calan || २६ ||

śyai॒tāya॑ ca॒ vai sa nau॑dha॒sāya॑ ca sapta॒rṣibhya॑śca॒ somā॑ya ca॒ rājña॒ ā vṛ॑ścate॒ ya e॒vaṃ vi॒dvāṃsaṃ॑ vrātya॑mupa॒vada॑ti || २७ ||

śyai॒tasya॑ ca॒ vai sa nau॑dha॒sasya॑ ca saptarṣī॒ṇāṃ ca॒ soma॑sya ca॒ rājñaḥ॑ pri॒yaṃ dhāma॑ bhavati॒ tasyodī॑cyāṃ di॒śi || २८ ||

vi॒dyut puṃ॑śca॒lī sta॑nayi॒tnurmā॑ga॒dho vi॒jñānaṃ॒ vāso’ha॑ru॒ṣṇīṣaṃ॒ rātrī॒ keśā॒ hari॑tau prava॒rtau ka॑lma॒lirma॒ṇiḥ || २९ ||

śru॒taṃ ca॒ viśru॑taṃ ca pariṣka॒ndau mano॑ vipa॒tham || ३० ||

mā॒ta॒riśvā॑ ca॒ pava॑mānaśca vipathavā॒hau vātaḥ॒ sāra॑thī re॒ṣmā pra॑to॒daḥ || ३१ ||

kī॒rtiśca॒ yaśa॑śca puraḥsa॒rāvainaṃ kī॒rtirga॑ccha॒tyā yaśo॑ gacchati॒ ya e॒vaṃ veda॑ || ३२ ||