EeseDharmaSanātana Library
17काण्ड 15 · सूक्त 17
Atharvaveda Śaunaka Kand 15, Sukta 17.
10 shlok४ साम्नी उष्णिक्, ६ याजुषी त्रिष्टुप्, ८ त्रिपदा प्रतिष्ठाऽर्ची पङ्क्तिः,
९ द्विपदा साम्नी त्रिष्टुप्, १० साम्नी अनुष्टुप्।
तस्य॒ व्रात्य॑स्य । योऽस्य प्रथ॒मो व्या॒नः सेयं भूमिः॑ ॥१॥
४ sāmnī uṣṇik, ६ yājuṣī triṣṭup, ८ tripadā pratiṣṭhā’rcī paṅktiḥ, ९ dvipadā sāmnī triṣṭup, १० sāmnī anuṣṭup | tasya॒ vrātya॑sya | yo’sya pratha॒mo vyā॒naḥ seyaṃ bhūmiḥ॑ || १ ||
तस्य॒ व्रात्य॑स्य । योऽस्य द्वि॒तीयो॑ व्या॒नस्तद॒न्तरि॑क्षम् ॥२॥
tasya॒ vrātya॑sya | yo’sya dvi॒tīyo॑ vyā॒nastada॒ntari॑kṣam || २ ||
तस्य॒ व्रात्य॑स्य । योऽस्य तृ॒तीयो॑ व्या॒नः सा द्यौः ॥३॥
tasya॒ vrātya॑sya | yo’sya tṛ॒tīyo॑ vyā॒naḥ sā dyauḥ || ३ ||
तस्य॒ व्रात्य॑स्य ।योऽस्य चतु॒र्थो व्या॒नस्तानि॒ नक्ष॑त्राणि ॥४॥
tasya॒ vrātya॑sya | yo’sya catu॒rtho vyā॒nastāni॒ nakṣa॑trāṇi || ४ ||
तस्य॒ व्रात्य॑स्य । योऽस्य पञ्च॒मो व्या॒नस्त ऋ॒तवः॑ ॥५॥
tasya॒ vrātya॑sya | yo’sya pañca॒mo vyā॒nasta ṛ॒tavaḥ॑ || ५ ||
तस्य॒ व्रात्य॑स्य । योऽस्य ष॒ष्ठो व्या॒नस्त आ॑र्त॒वाः ॥६॥
tasya॒ vrātya॑sya | yo’sya ṣa॒ṣṭho vyā॒nasta ā॑rta॒vāḥ || ६ ||
तस्य॒ व्रात्य॑स्य । योऽस्य सप्त॒मो व्या॒नः स सं॑वत्स॒रः ॥७॥
tasya॒ vrātya॑sya | yo’sya sapta॒mo vyā॒naḥ sa saṃ॑vatsa॒raḥ || ७ ||
तस्य॒ व्रात्य॑स्य । स॒मा॒नमर्थं॒ परि॑ यन्ति दे॒वाः सं॑वत्स॒रं वा ए॒तदृ॒तवो॑ऽनु॒परि॑यन्ति॒ व्रात्यं॑ च ॥८॥
tasya॒ vrātya॑sya | sa॒mā॒namarthaṃ॒ pari॑ yanti de॒vāḥ saṃ॑vatsa॒raṃ vā e॒tadṛ॒tavo॑’nu॒pari॑yanti॒ vrātyaṃ॑ ca || ८ ||
तस्य॒ व्रात्य॑स्य । यदा॑दि॒त्यम॑भिसंवि॒शन्त्य॑मावा॒स्यां चै॒व तत् पौ॑र्णमा॒सीं च॑ ॥९॥
tasya॒ vrātya॑sya | yadā॑di॒tyama॑bhisaṃvi॒śantya॑māvā॒syāṃ cai॒va tat pau॑rṇamā॒sīṃ ca॑ || ९ ||
तस्य॒ व्रात्य॑स्य । एकं॒ तदे॑षाममृत॒त्वमित्याहु॑तिरे॒व ॥१०॥
tasya॒ vrātya॑sya | ekaṃ॒ tade॑ṣāmamṛta॒tvamityāhu॑tire॒va || १० ||