EeseDharmaSanātana Library
11काण्ड 15 · सूक्त 11
Atharvaveda Śaunaka Kand 15, Sukta 11.
11 shlok३-६, ८, १० निचृदाऽर्ची बृहती (१० भुरिक्), ७,९ द्विपदा प्राजापत्या बृहती, ११ द्विपदाऽर्च्यनुष्टुप्।
तद् यस्यै॒वं वि॒द्वान् व्रात्योऽति॑थिर्गृ॒हाना॒गछे॑त् ॥१॥
३-६, ८, १० nicṛdā’rcī bṛhatī (१० bhurik), ७,९ dvipadā prājāpatyā bṛhatī, ११ dvipadā’rcyanuṣṭup | tad yasyai॒vaṃ vi॒dvān vrātyo’ti॑thirgṛ॒hānā॒gache॑t || १ ||
स्व॒यमे॑नमभ्यु॒देत्य॑ ब्रूया॒द् व्रात्य॒ क्वाऽवात्सी॒र्व्रात्यो॑द॒कं व्रात्य॑ त॒र्पय॑न्तु॒ व्रात्य॒ यथा॑ ते प्रि॒यं तथा॑स्तु॒
व्रात्य॒ यथा॑ ते॒ वश॒स्तथा॑स्तु॒ व्रात्य॒ यथा॑ ते निका॒मस्तथा॒स्त्विति॑ ॥२॥
sva॒yame॑namabhyu॒detya॑ brūyā॒d vrātya॒ kvā’vātsī॒rvrātyo॑da॒kaṃ vrātya॑ ta॒rpaya॑ntu॒ vrātya॒ yathā॑ te pri॒yaṃ tathā॑stu॒ vrātya॒ yathā॑ te॒ vaśa॒stathā॑stu॒ vrātya॒ yathā॑ te nikā॒mastathā॒stviti॑ || २ ||
यदे॑न॒माह॒ व्रात्य॒ क्वाऽवात्सी॒रिति॑ प॒थ ए॒व तेन॑ देव॒याना॒नव॑ रुन्द्धे ॥३॥
yade॑na॒māha॒ vrātya॒ kvā’vātsī॒riti॑ pa॒tha e॒va tena॑ deva॒yānā॒nava॑ runddhe || ३ ||
यदे॑न॒माह॒ व्रात्यो॑द॒कमित्य॒प ए॒व तेनाव॑ रुन्द्धे ॥४॥
yade॑na॒māha॒ vrātyo॑da॒kamitya॒pa e॒va tenāva॑ runddhe || ४ ||
यदे॑न॒माह॒ व्रात्य॑ त॒र्पय॒न्त्विति॑ प्रा॒णमे॒व तेन॒ वर्षी॑यांसं कुरुते ॥५॥
yade॑na॒māha॒ vrātya॑ ta॒rpaya॒ntviti॑ prā॒ṇame॒va tena॒ varṣī॑yāṃsaṃ kurute || ५ ||
यदे॑न॒माह॒ व्रात्य॒ यथा॑ ते प्रि॒यं तथा॒स्त्विति॑ प्रि॒यमे॒व तेनाव॑ रुन्द्धे ॥६॥
yade॑na॒māha॒ vrātya॒ yathā॑ te pri॒yaṃ tathā॒stviti॑ pri॒yame॒va tenāva॑ runddhe || ६ ||
ऐनं॑ प्रि॒यं ग॑च्छति प्रि॒यः प्रि॒यस्य॑ भवति॒ य ए॒वं वेद॑ ॥७॥
ainaṃ॑ pri॒yaṃ ga॑cchati pri॒yaḥ pri॒yasya॑ bhavati॒ ya e॒vaṃ veda॑ || ७ ||
यदे॑न॒माह॒ व्रात्य॒ यथा॑ ते॒ वश॒स्तथा॒स्त्विति॒ वश॑मे॒व तेनाव॑ रुन्द्धे ॥८॥
yade॑na॒māha॒ vrātya॒ yathā॑ te॒ vaśa॒stathā॒stviti॒ vaśa॑me॒va tenāva॑ runddhe || ८ ||
ऐनं॒ वशो॑ ग॑च्छति व॒शी व॒शिनां॑ भवति॒ य ए॒वं वेद॑ ॥९॥
ainaṃ॒ vaśo॑ ga॑cchati va॒śī va॒śināṃ॑ bhavati॒ ya e॒vaṃ veda॑ || ९ ||
यदे॑न॒माह॒ व्रात्य॒ यथा॑ ते निका॒मस्तथा॒स्त्विति॑ निका॒ममे॒व तेनाव॑ रुन्द्धे ॥१०॥
yade॑na॒māha॒ vrātya॒ yathā॑ te nikā॒mastathā॒stviti॑ nikā॒mame॒va tenāva॑ runddhe || १० ||
ऐनं॑ निका॒मो ग॑च्छति निका॒मे नि॑का॒मस्य॑ भवति॒ य ए॒वं वेद॑ ॥११॥
ainaṃ॑ nikā॒mo ga॑cchati nikā॒me ni॑kā॒masya॑ bhavati॒ ya e॒vaṃ veda॑ || ११ ||