EeseDharmaSanātana Library
5काण्ड 12 · सूक्त 5
Atharvaveda Śaunaka Kand 12, Sukta 5.
73 shlok३ चतुष्पदा स्वराडुष्णिक्, ४ आसुर्यनुष्टुप्, ५ साम्नी पङ्क्तिः।
श्रमे॑ण॒ तप॑सा सृ॒ष्टा ब्रह्म॑णा वि॒त्तर्ते श्रि॒ता ॥१॥
३ catuṣpadā svarāḍuṣṇik, ४ āsuryanuṣṭup, ५ sāmnī paṅktiḥ | śrame॑ṇa॒ tapa॑sā sṛ॒ṣṭā brahma॑ṇā vi॒ttarte śri॒tā || १ ||
स॒त्येनावृ॑ता श्रि॒या प्रावृ॑ता॒ यश॑सा॒ परी॑वृता ॥२॥
sa॒tyenāvṛ॑tā śri॒yā prāvṛ॑tā॒ yaśa॑sā॒ parī॑vṛtā || २ ||
स्व॒धया॒ परि॑हिता श्र॒द्धया॒ पर्यू॑ढा दी॒क्षया॑ गु॒प्ता य॒ज्ञे प्रति॑ष्ठिता लो॒को नि॒धन॑म् ॥३॥
sva॒dhayā॒ pari॑hitā śra॒ddhayā॒ paryū॑ḍhā dī॒kṣayā॑ gu॒ptā ya॒jñe prati॑ṣṭhitā lo॒ko ni॒dhana॑m || ३ ||
ब्रह्म॑ पदवा॒यं ब्रा॑ह्म॒णोऽधि॑पतिः ॥४॥
brahma॑ padavā॒yaṃ brā॑hma॒ṇo’dhi॑patiḥ || ४ ||
तामा॒ददा॑नस्य ब्रह्मग॒वीं जि॑न॒तो ब्रा॑ह्म॒णं क्ष॒त्रिय॑स्य ॥५॥
tāmā॒dadā॑nasya brahmaga॒vīṃ ji॑na॒to brā॑hma॒ṇaṃ kṣa॒triya॑sya || ५ ||
अप॑ क्रामति सू॒नृता॑ वी॒र्यं॑१ पुण्या॑ ल॒क्ष्मीः ॥६॥
apa॑ krāmati sū॒nṛtā॑ vī॒ryaṃ॑१ puṇyā॑ la॒kṣmīḥ || ६ ||
(2)
(७-११) ७-९ आर्च्यनुष्टुप् (७ भुरिक्), १० उष्णिक्, (७-१७ एकपदा), ११ आर्ची निचृत्पङ्क्तिः।
ओज॑श्च॒ तेज॑श्च॒ सह॑श्च॒ बलं॑ च॒ वाक् चे॑न्द्रि॒यं च॒ श्रीश्च॒ धर्म॑श्च ॥७॥
(2) (७-११) ७-९ ārcyanuṣṭup (७ bhurik), १० uṣṇik, (७-१७ ekapadā), ११ ārcī nicṛtpaṅktiḥ | oja॑śca॒ teja॑śca॒ saha॑śca॒ balaṃ॑ ca॒ vāk ce॑ndri॒yaṃ ca॒ śrīśca॒ dharma॑śca || ७ ||
ब्रह्म॑ च क्ष॒त्रं च॑ रा॒ष्ट्रं च॒ विश॑श्च॒ त्विषि॑श्च॒ यश॑श्च॒ वर्च॑श्च॒ द्रवि॑णं च ॥८॥
brahma॑ ca kṣa॒traṃ ca॑ rā॒ṣṭraṃ ca॒ viśa॑śca॒ tviṣi॑śca॒ yaśa॑śca॒ varca॑śca॒ dravi॑ṇaṃ ca || ८ ||
आयु॑श्च रू॒पं च॒ नाम॑ च की॒र्तिश्च॑ प्रा॒णश्चा॑पा॒नश्च॒ चक्षु॑श्च॒ श्रोत्रं॑ च ॥९॥
āyu॑śca rū॒paṃ ca॒ nāma॑ ca kī॒rtiśca॑ prā॒ṇaścā॑pā॒naśca॒ cakṣu॑śca॒ śrotraṃ॑ ca || ९ ||
पय॑श्च॒ रस॒श्चान्नं॑ चा॒न्नाद्यं॑ च॒र्तं च॑ स॒त्यं चे॒ष्टं च॑ पू॒र्तं च॑ प्र॒जा च॑ प॒शव॑श्च ॥१०॥
paya॑śca॒ rasa॒ścānnaṃ॑ cā॒nnādyaṃ॑ ca॒rtaṃ ca॑ sa॒tyaṃ ce॒ṣṭaṃ ca॑ pū॒rtaṃ ca॑ pra॒jā ca॑ pa॒śava॑śca || १० ||
तानि॒ सर्वा॒ण्यप॑ क्रामन्ति ब्रह्मग॒वीमा॒ददा॑नस्य जिन॒तो ब्रा॑ह्म॒णं क्ष॒त्रिय॑स्य ॥११॥
tāni॒ sarvā॒ṇyapa॑ krāmanti brahmaga॒vīmā॒dadā॑nasya jina॒to brā॑hma॒ṇaṃ kṣa॒triya॑sya || ११ ||
(3)
(१२-२७) १२ विराड् विषमा गायत्री, १३ आसुर्यनुष्टुप्, १४, २५ साम्नी उष्णिक्, १५ गायत्री, १६-१७,
१९-२० प्राजापत्याऽनुष्टुप्, १८ याजुषी जगती, २१,२५ साम्न्यनुष्टुप्, २२ साम्नी बृहती, २३ याजुषी त्रिष्टुप्,
२४ आसुरी गायत्री, २७ आर्च्युष्णिक्।
सैषा भी॒मा ब्र॑ह्मग॒व्य॑१घवि॑षा सा॒क्षात् कृ॒त्या कूल्ब॑ज॒मावृ॑ता ॥१२॥
(3) (१२-२७) १२ virāḍ viṣamā gāyatrī, १३ āsuryanuṣṭup, १४, २५ sāmnī uṣṇik, १५ gāyatrī, १६-१७, १९-२० prājāpatyā’nuṣṭup, १८ yājuṣī jagatī, २१,२५ sāmnyanuṣṭup, २२ sāmnī bṛhatī, २३ yājuṣī triṣṭup, २४ āsurī gāyatrī, २७ ārcyuṣṇik | saiṣā bhī॒mā bra॑hmaga॒vya॑१ghavi॑ṣā sā॒kṣāt kṛ॒tyā kūlba॑ja॒māvṛ॑tā || १२ ||
सर्वा॑ण्यस्यां घो॒राणि॒ सर्वे॑ च मृ॒त्यवः॑ ॥१३॥
sarvā॑ṇyasyāṃ gho॒rāṇi॒ sarve॑ ca mṛ॒tyavaḥ॑ || १३ ||
सर्वा॑ण्यस्यां क्रू॒राणि॒ सर्वे॑ पुरुषव॒धाः ॥१४॥
sarvā॑ṇyasyāṃ krū॒rāṇi॒ sarve॑ puruṣava॒dhāḥ || १४ ||
सा ब्र॑ह्म॒ज्यं दे॑वपी॒युं ब्र॑ह्मग॒व्याऽदी॒यमा॑ना मृ॒त्योः पद्वी॑श॒ आ द्य॑ति ॥१५॥
sā bra॑hma॒jyaṃ de॑vapī॒yuṃ bra॑hmaga॒vyā’dī॒yamā॑nā mṛ॒tyoḥ padvī॑śa॒ ā dya॑ti || १५ ||
मे॒निः श॒तव॑धा॒ हि सा ब्र॑ह्म॒ज्यस्य॒ क्षिति॒र्हि सा ॥१६॥
me॒niḥ śa॒tava॑dhā॒ hi sā bra॑hma॒jyasya॒ kṣiti॒rhi sā || १६ ||
तस्मा॒द् वै ब्रा॑ह्म॒णानां॒ गौर्दु॑रा॒धर्षा॑ विजान॒ता ॥१७॥
tasmā॒d vai brā॑hma॒ṇānāṃ॒ gaurdu॑rā॒dharṣā॑ vijāna॒tā || १७ ||
वज्रो॒ धाव॑न्ती वैश्वान॒र उद्वी॑ता ॥१८॥
vajro॒ dhāva॑ntī vaiśvāna॒ra udvī॑tā || १८ ||
हे॒तिः श॒फानु॑त्खि॒दन्ती॑ महादे॒वो॒३ऽपेक्ष॑माणा ॥१९॥
he॒tiḥ śa॒phānu॑tkhi॒dantī॑ mahāde॒vo॒३’pekṣa॑māṇā || १९ ||
क्षु॒रप॑वि॒रीक्ष॑माणा॒ वाश्य॑माना॒भि स्फू॑र्जति ॥२०॥
kṣu॒rapa॑vi॒rīkṣa॑māṇā॒ vāśya॑mānā॒bhi sphū॑rjati || २० ||
मृ॒त्युर्हि॑ङ्कृण्व॒त्यु॑१ग्रो दे॒वः पुच्छं॑ प॒र्यस्य॑न्ती ॥२१॥
mṛ॒tyurhi॑ṅkṛṇva॒tyu॑१gro de॒vaḥ pucchaṃ॑ pa॒ryasya॑ntī || २१ ||
स॒र्व॒ज्या॒निः कर्णौ॑ वरीव॒र्जय॑न्ती राजय॒क्ष्मो मेह॑न्ती ॥२२॥
sa॒rva॒jyā॒niḥ karṇau॑ varīva॒rjaya॑ntī rājaya॒kṣmo meha॑ntī || २२ ||
मे॒निर्दु॒ह्यमा॑ना शीर्ष॒क्तिर्दु॒ग्धा ॥२३॥
me॒nirdu॒hyamā॑nā śīrṣa॒ktirdu॒gdhā || २३ ||
से॒दिरु॑प॒तिष्ठ॑न्ती मिथोयो॒धः परा॑मृष्टा ॥२४॥
se॒diru॑pa॒tiṣṭha॑ntī mithoyo॒dhaḥ parā॑mṛṣṭā || २४ ||
श॒र॒व्या॒३ मुखे॑ऽपिन॒ह्यमा॑न॒ ऋति॑र्ह॒न्यमा॑ना ॥२५॥
śa॒ra॒vyā॒३ mukhe॑’pina॒hyamā॑na॒ ṛti॑rha॒nyamā॑nā || २५ ||
अ॒घवि॑षा नि॒पत॑न्ती॒ तमो॒ निप॑तिता ॥२६॥
a॒ghavi॑ṣā ni॒pata॑ntī॒ tamo॒ nipa॑titā || २६ ||
अ॒नु॒गच्छ॑न्ती प्रा॒णानुप॑ दासयति ब्रह्मग॒वी ब्र॑ह्म॒ज्यस्य॑ ॥२७॥
a॒nu॒gaccha॑ntī prā॒ṇānupa॑ dāsayati brahmaga॒vī bra॑hma॒jyasya॑ || २७ ||
(4)
(२८-३८) आसुरी गायत्री, २९, ३७ आसुर्यनुष्टुप्, ३० साम्न्यनुष्टुप्, ३१ याजषी त्रिष्टुप्, ३२ साम्नी गायत्री,
३३-३४ साम्नी बृहती, ३५ भुरिक्साम्न्यनुष्टुप्, ३६ साम्न्युष्णिक्, ३८ प्रतिष्ठा गायत्री।
वैरं॑ विकृ॒त्यमा॑ना॒ पौत्रा॑द्यं विभा॒ज्यमा॑ना ॥२८॥
(4) (२८-३८) āsurī gāyatrī, २९, ३७ āsuryanuṣṭup, ३० sāmnyanuṣṭup, ३१ yājaṣī triṣṭup, ३२ sāmnī gāyatrī, ३३-३४ sāmnī bṛhatī, ३५ bhuriksāmnyanuṣṭup, ३६ sāmnyuṣṇik, ३८ pratiṣṭhā gāyatrī | vairaṃ॑ vikṛ॒tyamā॑nā॒ pautrā॑dyaṃ vibhā॒jyamā॑nā || २८ ||
दे॒व॒हे॒तिर्ह्रि॒यमा॑णा॒ व्यृद्धिर्हृ॒ता ॥२९॥
de॒va॒he॒tirhri॒yamā॑ṇā॒ vyṛddhirhṛ॒tā || २९ ||
पा॒प्माधि॑धी॒यमा॑ना॒ पारु॑ष्यमवधी॒यमाना ॥३०॥
pā॒pmādhi॑dhī॒yamā॑nā॒ pāru॑ṣyamavadhī॒yamānā || ३० ||
वि॒षं प्र॒यस्य॑न्ती त॒क्मा प्रय॑स्ता ॥३१॥
vi॒ṣaṃ pra॒yasya॑ntī ta॒kmā praya॑stā || ३१ ||
अ॒घं प॒च्यमा॑ना दु॒ष्वप्न्यं॑ प॒क्वा ॥३२॥
a॒ghaṃ pa॒cyamā॑nā du॒ṣvapnyaṃ॑ pa॒kvā || ३२ ||
मू॒ल॒बर्ह॑णी पर्याक्रि॒यमा॑णा॒ क्षितिः॑ प॒र्याकृ॑ता ॥३३॥
mū॒la॒barha॑ṇī paryākri॒yamā॑ṇā॒ kṣitiḥ॑ pa॒ryākṛ॑tā || ३३ ||
असं॑ज्ञा ग॒न्धेन॒ शुगु॑द्ध्रि॒यमा॑णाशीवि॒ष उद्धृ॑ता ॥३४॥
asaṃ॑jñā ga॒ndhena॒ śugu॑ddhri॒yamā॑ṇāśīvi॒ṣa uddhṛ॑tā || ३४ ||
अभू॑तिरुपह्रि॒यमा॑णा॒ परा॑भूति॒रुप॑हृता ॥३५॥
abhū॑tirupahri॒yamā॑ṇā॒ parā॑bhūti॒rupa॑hṛtā || ३५ ||
श॒र्व क्रु॒द्धः पि॒श्यमा॑ना॒ शिमि॑दा पिशि॒ता ॥३६॥
śa॒rva kru॒ddhaḥ pi॒śyamā॑nā॒ śimi॑dā piśi॒tā || ३६ ||
अव॑र्तिर॒श्यमा॑ना॒ निरृ॑तिरशि॒ता ॥३७॥
ava॑rtira॒śyamā॑nā॒ nirṛ॑tiraśi॒tā || ३७ ||
अ॒शि॒ता लो॒काच्छि॑नत्ति ब्रह्मग॒वी ब्र॑ह्म॒ज्यम॒स्माच्चा॒मुष्मा॑च्च ॥३८॥
a॒śi॒tā lo॒kācchi॑natti brahmaga॒vī bra॑hma॒jyama॒smāccā॒muṣmā॑cca || ३८ ||
(5)
(३९-४६) ३९ साम्नी पङ्क्तिः, ४० याजुष्यनुष्टुप्, ४१, ४६ भुरिक् साम्न्यनुष्टुप्, ४२ आसुरी बृहती,
४३ साम्नी बृहती, ४४ पिपीलिकमध्याऽनुष्टुप्, ४५ आर्ची बृहती।
तस्या॑ आ॒हन॑नं कृ॒त्या मे॒निरा॒शस॑नं वल॒ग ऊब॑ध्यम् ॥३९॥
(5) (३९-४६) ३९ sāmnī paṅktiḥ, ४० yājuṣyanuṣṭup, ४१, ४६ bhurik sāmnyanuṣṭup, ४२ āsurī bṛhatī, ४३ sāmnī bṛhatī, ४४ pipīlikamadhyā’nuṣṭup, ४५ ārcī bṛhatī | tasyā॑ ā॒hana॑naṃ kṛ॒tyā me॒nirā॒śasa॑naṃ vala॒ga ūba॑dhyam || ३९ ||
अ॒स्व॒गता॒ परि॑ह्णुता ॥४०॥
a॒sva॒gatā॒ pari॑hṇutā || ४० ||
अ॒ग्निः क्र॒व्याद् भू॒त्वा ब्र॑ह्मग॒वी ब्र॑ह्म॒ज्यं प्र॒विश्या॑त्ति ॥४१॥
a॒gniḥ kra॒vyād bhū॒tvā bra॑hmaga॒vī bra॑hma॒jyaṃ pra॒viśyā॑tti || ४१ ||
सर्वा॒स्याङ्गा॒ पर्वा॒ मूला॑नि वृश्चति ॥४२॥
sarvā॒syāṅgā॒ parvā॒ mūlā॑ni vṛścati || ४२ ||
छि॒नत्त्य॑स्य पितृब॒न्धु परा॑ भावयति मातृब॒न्धु ॥४३॥
chi॒nattya॑sya pitṛba॒ndhu parā॑ bhāvayati mātṛba॒ndhu || ४३ ||
वि॒वा॒हां ज्ञा॒तीन्त्सर्वा॒नपि॑ क्षापयति ब्रह्मग॒वी ब्र॑ह्म॒ज्यस्य॑ क्ष॒त्रिये॒णापु॑नर्दीयमाना ॥४४॥
vi॒vā॒hāṃ jñā॒tīntsarvā॒napi॑ kṣāpayati brahmaga॒vī bra॑hma॒jyasya॑ kṣa॒triye॒ṇāpu॑nardīyamānā || ४४ ||
अ॒वा॒स्तुमे॑न॒मस्व॑ग॒मप्र॑जसं करोत्यपरापर॒णो भ॑वति क्षी॒यते॑ ॥४५॥
a॒vā॒stume॑na॒masva॑ga॒mapra॑jasaṃ karotyaparāpara॒ṇo bha॑vati kṣī॒yate॑ || ४५ ||
य ए॒वं वि॒दुषो॑ ब्राह्म॒णस्य॑ क्ष॒त्रियो॒ गामा॑द॒त्ते ॥४६॥
ya e॒vaṃ vi॒duṣo॑ brāhma॒ṇasya॑ kṣa॒triyo॒ gāmā॑da॒tte || ४६ ||
(6)
(४७-६१) ४७, ४९, ५१-५३, ५७-५९, ६१ प्राजापत्याऽनुष्टुप्, ४८ आर्च्यनुष्टुप्, ५० साम्नी बृहती,
५४-५५ प्राजापत्योष्णिक्, ५६ आसुरी गायत्री, ६० गायत्री।
क्षि॒प्रं वै तस्या॒हन॑ने॒ गृध्राः॑ कुर्वत ऐल॒बम् ॥४७॥
(6) (४७-६१) ४७, ४९, ५१-५३, ५७-५९, ६१ prājāpatyā’nuṣṭup, ४८ ārcyanuṣṭup, ५० sāmnī bṛhatī, ५४-५५ prājāpatyoṣṇik, ५६ āsurī gāyatrī, ६० gāyatrī | kṣi॒praṃ vai tasyā॒hana॑ne॒ gṛdhrāḥ॑ kurvata aila॒bam || ४७ ||
क्षि॒प्रं वै तस्या॒दह॑नं॒ परि॑ नृत्यन्ति के॒शनी॑राघ्ना॒नाः पा॒णिनोर॑सि कुर्वा॒णाः पा॒पमै॑ल॒बम् ॥४८॥
kṣi॒praṃ vai tasyā॒daha॑naṃ॒ pari॑ nṛtyanti ke॒śanī॑rāghnā॒nāḥ pā॒ṇinora॑si kurvā॒ṇāḥ pā॒pamai॑la॒bam || ४८ ||
क्षि॒प्रं वै तस्य॒ वास्तु॑षु॒ वृकाः॑ कुर्वत ऐल॒बम् ॥४९॥
kṣi॒praṃ vai tasya॒ vāstu॑ṣu॒ vṛkāḥ॑ kurvata aila॒bam || ४९ ||
क्षि॒प्रं वै तस्य॑ पृच्छन्ति॒ यत् तदासी॑३दि॒दं नु ता३दिति॑ ॥५०॥
kṣi॒praṃ vai tasya॑ pṛcchanti॒ yat tadāsī॑३di॒daṃ nu tā३diti॑ || ५० ||
छि॒न्ध्या च्छि॑न्धि॒ प्र छि॒न्ध्यपि॑ क्षापय क्षा॒पय॑ ॥५१॥
chi॒ndhyā cchi॑ndhi॒ pra chi॒ndhyapi॑ kṣāpaya kṣā॒paya॑ || ५१ ||
आ॒ददा॑नमाङ्गिरसि ब्रह्म॒ज्यमुप॑ दासय ॥५२॥
ā॒dadā॑namāṅgirasi brahma॒jyamupa॑ dāsaya || ५२ ||
वै॒श्व॒दे॒वी ह्यु॑१च्यसे॑ कृ॒त्या कूल्ब॑ज॒मावृ॑ता ॥५३॥
vai॒śva॒de॒vī hyu॑१cyase॑ kṛ॒tyā kūlba॑ja॒māvṛ॑tā || ५३ ||
ओष॑न्ती स॒मोष॑न्ती॒ ब्रह्म॑णो॒ वज्रः॑ ॥५४॥
oṣa॑ntī sa॒moṣa॑ntī॒ brahma॑ṇo॒ vajraḥ॑ || ५४ ||
क्षु॒रप॑विर्मृ॒त्युर्भू॒त्वा वि धा॑व॒ त्वम् ॥५५॥
kṣu॒rapa॑virmṛ॒tyurbhū॒tvā vi dhā॑va॒ tvam || ५५ ||
आ द॑त्से जिन॒तां वर्च॑ इ॒ष्टं पू॒र्तं चा॒शिषः॑ ॥५६॥
ā da॑tse jina॒tāṃ varca॑ i॒ṣṭaṃ pū॒rtaṃ cā॒śiṣaḥ॑ || ५६ ||
आ॒दाय॑ जी॒तं जी॒ताय॑ लो॒के॒३ऽमुष्मि॒न् प्र य॑च्छसि ॥५७॥
ā॒dāya॑ jī॒taṃ jī॒tāya॑ lo॒ke॒३’muṣmi॒n pra ya॑cchasi || ५७ ||
अघ्न्ये॑ पद॒वीर्भ॑व ब्राह्म॒णस्या॒भिश॑स्त्या ॥५८॥
aghnye॑ pada॒vīrbha॑va brāhma॒ṇasyā॒bhiśa॑styā || ५८ ||
मे॒निः श॑र॒व्याऽ भवा॒घाद॒घवि॑षा भव ॥५९॥
me॒niḥ śa॑ra॒vyā’ bhavā॒ghāda॒ghavi॑ṣā bhava || ५९ ||
अघ्न्ये॒ प्र शिरो॑ जहि ब्रह्म॒ज्यस्य॑ कृ॒ताग॑सो देवपी॒योर॑रा॒धसः॑ ॥६०॥
aghnye॒ pra śiro॑ jahi brahma॒jyasya॑ kṛ॒tāga॑so devapī॒yora॑rā॒dhasaḥ॑ || ६० ||
त्वया॒ प्रमू॑र्णं मृदि॒तम॒ग्निर्द॑हतु दु॒श्चित॑म् ॥६१॥
tvayā॒ pramū॑rṇaṃ mṛdi॒tama॒gnirda॑hatu du॒ścita॑m || ६१ ||
(7)
(६२-७३) ६२-६४, ६६,६८-७० प्राजापत्याऽनुष्टुप्, ६५ गायत्री, ६७ प्राजापत्या गायत्री, ७१ आसुरी पङ्क्तिः,
७२ प्राजापत्या त्रिष्टुप् ७३ आसुर्युष्णिक्।
वृ॒श्च प्र वृ॑श्च॒ सं वृ॑श्च॒ दह॒ प्र द॑ह॒ सं द॑ह ॥६२॥
(7) (६२-७३) ६२-६४, ६६,६८-७० prājāpatyā’nuṣṭup, ६५ gāyatrī, ६७ prājāpatyā gāyatrī, ७१ āsurī paṅktiḥ, ७२ prājāpatyā triṣṭup ७३ āsuryuṣṇik | vṛ॒śca pra vṛ॑śca॒ saṃ vṛ॑śca॒ daha॒ pra da॑ha॒ saṃ da॑ha || ६२ ||
ब्र॒ह्म॒ज्यं दे॑व्यघ्न्य॒ आ मूला॑दनु॒संद॑ह ॥६३॥
bra॒hma॒jyaṃ de॑vyaghnya॒ ā mūlā॑danu॒saṃda॑ha || ६३ ||
यथाया॑द् यमसाद॒नात् पा॑पलो॒कान् प॑रा॒वतः॑ ॥६४॥
yathāyā॑d yamasāda॒nāt pā॑palo॒kān pa॑rā॒vataḥ॑ || ६४ ||
ए॒वा त्वं दे॑व्यघ्न्ये ब्रह्म॒ज्यस्य॑ कृ॒ताग॑सो देवपी॒योर॑रा॒धसः॑ ॥६५॥
e॒vā tvaṃ de॑vyaghnye brahma॒jyasya॑ kṛ॒tāga॑so devapī॒yora॑rā॒dhasaḥ॑ || ६५ ||
वज्रे॑ण श॒तप॑र्वणा ती॒क्ष्णेन॑ क्षु॒रभृ॑ष्टिना ॥६६॥
vajre॑ṇa śa॒tapa॑rvaṇā tī॒kṣṇena॑ kṣu॒rabhṛ॑ṣṭinā || ६६ ||
प्र स्क॒न्धान् प्र शिरो॑ जहि ॥६७॥
pra ska॒ndhān pra śiro॑ jahi || ६७ ||
लोमा॑न्यस्य॒ सं छि॑न्धि॒ त्वच॑मस्य॒ वि वे॑ष्टय ॥६८॥
lomā॑nyasya॒ saṃ chi॑ndhi॒ tvaca॑masya॒ vi ve॑ṣṭaya || ६८ ||
मां॒सान्य॑स्य शातय॒ स्नावा॑न्यस्य॒ सं वृ॑ह ॥६९॥
māṃ॒sānya॑sya śātaya॒ snāvā॑nyasya॒ saṃ vṛ॑ha || ६९ ||
अस्थी॑न्यस्य पीडय म॒ज्जान॑मस्य॒ निर्ज॑हि ॥७०॥
asthī॑nyasya pīḍaya ma॒jjāna॑masya॒ nirja॑hi || ७० ||
सर्वा॒स्याङ्गा॒ पर्वा॑णि॒ वि श्र॑थय ॥७१॥
sarvā॒syāṅgā॒ parvā॑ṇi॒ vi śra॑thaya || ७१ ||
अ॒ग्निरे॑नं क्र॒व्यात् पृ॑थि॒व्या नु॑दता॒मुदो॑षतु वा॒युर॒न्तरि॑क्षान्मह॒तो व॑रि॒म्णः ॥७२॥
a॒gnire॑naṃ kra॒vyāt pṛ॑thi॒vyā nu॑datā॒mudo॑ṣatu vā॒yura॒ntari॑kṣānmaha॒to va॑ri॒mṇaḥ || ७२ ||
सूर्य॑ एनं दि॒वः प्र णु॑दतां॒ न्योऽषतु ॥७३॥
sūrya॑ enaṃ di॒vaḥ pra ṇu॑datāṃ॒ nyo’ṣatu || ७३ ||