EeseDharmaSanātana Library
4काण्ड 12 · सूक्त 4
Atharvaveda Śaunaka Kand 12, Sukta 4.
53 shlokददा॒मीत्ये॒व ब्रू॑या॒दनु॑ चैना॒मभु॑त्सत ।
व॒शां ब्र॒ह्मभ्यो॒ याच॑द्भ्य॒स्तत् प्र॒जाव॒दप॑त्यवत् ॥१॥
dadā॒mītye॒va brū॑yā॒danu॑ cainā॒mabhu॑tsata | va॒śāṃ bra॒hmabhyo॒ yāca॑dbhya॒stat pra॒jāva॒dapa॑tyavat || १ ||
प्र॒जया॒ स वि क्री॑णीते प॒शुभि॒श्चोप॑ दस्यति ।
य आ॑र्षे॒येभ्यो॒ याच॑द्भ्यो दे॒वानां॒ गां न दित्स॑ति ॥२॥
pra॒jayā॒ sa vi krī॑ṇīte pa॒śubhi॒ścopa॑ dasyati | ya ā॑rṣe॒yebhyo॒ yāca॑dbhyo de॒vānāṃ॒ gāṃ na ditsa॑ti || २ ||
कू॒टया॑स्य॒ सं शी॑र्यन्ते श्लो॒णया॑ का॒टम॑र्दति ।
ब॒ण्डया॑ दह्यन्ते गृ॒हाः का॒णया॑ दीयते॒ स्वम् ॥३॥
kū॒ṭayā॑sya॒ saṃ śī॑ryante ślo॒ṇayā॑ kā॒ṭama॑rdati | ba॒ṇḍayā॑ dahyante gṛ॒hāḥ kā॒ṇayā॑ dīyate॒ svam || ३ ||
वि॒लो॒हि॒तो अ॑धि॒ष्ठाना॑च्छ॒क्नो वि॑न्दति॒ गोप॑तिम्।
तथा॑ व॒शायाः॒ संवि॑द्यं दुरद॒भ्ना ह्यु॑१च्यसे॑ ॥४॥
vi॒lo॒hi॒to a॑dhi॒ṣṭhānā॑ccha॒kno vi॑ndati॒ gopa॑tim | tathā॑ va॒śāyāḥ॒ saṃvi॑dyaṃ durada॒bhnā hyu॑१cyase॑ || ४ ||
प॒दोर॑स्या अधि॒ष्ठाना॑द् वि॒क्लिन्दु॒र्नाम॑ विन्दति ।
अ॒ना॒म॒नात् सं शी॑र्यन्ते॒ या मुखे॑नोप॒जिघ्र॑ति ॥५॥
pa॒dora॑syā adhi॒ṣṭhānā॑d vi॒klindu॒rnāma॑ vindati | a॒nā॒ma॒nāt saṃ śī॑ryante॒ yā mukhe॑nopa॒jighra॑ti || ५ ||
यो अ॑स्याः॒ कर्णा॑वास्कु॒नोत्या स दे॒वेषु॑ वृश्चते ।
लक्ष्म॑ कुर्व॒ इति॒ मन्य॑ते॒ कनी॑यः कृणुते॒ स्वम् ॥६॥
yo a॑syāḥ॒ karṇā॑vāsku॒notyā sa de॒veṣu॑ vṛścate | lakṣma॑ kurva॒ iti॒ manya॑te॒ kanī॑yaḥ kṛṇute॒ svam || ६ ||
यद॑स्याः॒ कस्मै॑ चि॒द् भोगा॑य॒ बाला॒न् कश्चि॑त् प्रकृ॒न्तति॑ ।
ततः॑ किशो॒रा म्रि॑यन्ते व॒त्सांश्च॒ घातु॑को॒ वृकः॑ ॥७॥
yada॑syāḥ॒ kasmai॑ ci॒d bhogā॑ya॒ bālā॒n kaści॑t prakṛ॒ntati॑ | tataḥ॑ kiśo॒rā mri॑yante va॒tsāṃśca॒ ghātu॑ko॒ vṛkaḥ॑ || ७ ||
यद॑स्या गोप॑तौ स॒त्या लोम॒ ध्वाङ्क्षो॒ अजी॑हिडत्।
ततः॑ कुमा॒रा म्रि॑यन्ते॒ यक्ष्मो॑ विन्दत्यनाम॒नात् ॥८॥
yada॑syā gopa॑tau sa॒tyā loma॒ dhvāṅkṣo॒ ajī॑hiḍat | tataḥ॑ kumā॒rā mri॑yante॒ yakṣmo॑ vindatyanāma॒nāt || ८ ||
यद॑स्याः॒ पल्पू॑लनं॒ शकृ॑द् दा॒सी स॒मस्य॑ति ।
ततोऽप॑रूपं जायते॒ तस्मा॒दव्ये॑ष्य॒देन॑सः ॥९॥
yada॑syāḥ॒ palpū॑lanaṃ॒ śakṛ॑d dā॒sī sa॒masya॑ti | tato’pa॑rūpaṃ jāyate॒ tasmā॒davye॑ṣya॒dena॑saḥ || ९ ||
जाय॑माना॒भि जा॑यते दे॒वान्त्सब्रा॑ह्मणान् व॒शा।
तस्मा॑द् ब्र॒ह्मभ्यो॒ देयै॒षा तदा॑हुः॒ स्वस्य॒ गोप॑नम् ॥१०॥
jāya॑mānā॒bhi jā॑yate de॒vāntsabrā॑hmaṇān va॒śā | tasmā॑d bra॒hmabhyo॒ deyai॒ṣā tadā॑huḥ॒ svasya॒ gopa॑nam || १० ||
य ए॑नां व॒निमा॒यन्ति॒ तेषां॑ दे॒वकृ॑ता व॒शा।
ब्र॒ह्म॒ज्येयं॒ तद॑ब्रुव॒न् य ए॑नां निप्रिया॒यते॑ ॥११॥
ya e॑nāṃ va॒nimā॒yanti॒ teṣāṃ॑ de॒vakṛ॑tā va॒śā | bra॒hma॒jyeyaṃ॒ tada॑bruva॒n ya e॑nāṃ nipriyā॒yate॑ || ११ ||
य आ॑र्षे॒येभ्यो॒ याच॑द्भ्यो दे॒वानां॒ गां न दित्स॑ति ।
आ स दे॒वेषु॑ वृश्चते ब्राह्म॒णानां॑ च म॒न्यवे॑ ॥१२॥
ya ā॑rṣe॒yebhyo॒ yāca॑dbhyo de॒vānāṃ॒ gāṃ na ditsa॑ti | ā sa de॒veṣu॑ vṛścate brāhma॒ṇānāṃ॑ ca ma॒nyave॑ || १२ ||
यो अ॑स्य॒ स्याद् व॑शाभो॒गो अ॒न्यामि॑च्छेत॒ तर्हि॒ सः ।
हिंस्ते॒ अद॑त्ता॒ पुरु॑षं याचि॒तां च॒ न दित्स॑ति ॥१३॥
yo a॑sya॒ syād va॑śābho॒go a॒nyāmi॑ccheta॒ tarhi॒ saḥ | hiṃste॒ ada॑ttā॒ puru॑ṣaṃ yāci॒tāṃ ca॒ na ditsa॑ti || १३ ||
यथा॑ शेव॒धिर्निहि॑तो ब्राह्म॒णानां॒ तथा॑ व॒शा।
तामे॒तद॒च्छाय॑न्ति यस्मि॒न् कस्मिंश्च॒ जाय॑ते ॥१४॥
yathā॑ śeva॒dhirnihi॑to brāhma॒ṇānāṃ॒ tathā॑ va॒śā | tāme॒tada॒cchāya॑nti yasmi॒n kasmiṃśca॒ jāya॑te || १४ ||
स्वमे॒तद॒च्छाय॑न्ति॒ यद् व॒शां ब्रा॑ह्म॒णा अ॒भि।
यथै॑नान॒न्यस्मि॑न् जिनी॒यादे॒वास्या॑ नि॒रोध॑नम् ॥१५॥
svame॒tada॒cchāya॑nti॒ yad va॒śāṃ brā॑hma॒ṇā a॒bhi | yathai॑nāna॒nyasmi॑n jinī॒yāde॒vāsyā॑ ni॒rodha॑nam || १५ ||
चरे॑दे॒वा त्रै॑हाय॒णा दवि॑ज्ञातगदा स॒ती।
व॒शां च॑ वि॒द्यान्ना॑रद ब्राह्म॒णास्तर्ह्ये॒ष्याः ॥१६॥
care॑de॒vā trai॑hāya॒ṇā davi॑jñātagadā sa॒tī | va॒śāṃ ca॑ vi॒dyānnā॑rada brāhma॒ṇāstarhye॒ṣyāḥ || १६ ||
य ए॑ना॒मव॑शा॒माह॑ दे॒वानां॒ निहि॑तं नि॒धिम्।
उ॒भौ तस्मै॑ भवाश॒र्वौ प॑रि॒क्रम्येषु॑मस्यतः ॥१७॥
ya e॑nā॒mava॑śā॒māha॑ de॒vānāṃ॒ nihi॑taṃ ni॒dhim | u॒bhau tasmai॑ bhavāśa॒rvau pa॑ri॒kramyeṣu॑masyataḥ || १७ ||
यो अ॑स्या॒ ऊधो॒ न वेदाथो॑ अस्या॒ स्तना॑नु॒त।
उ॒भये॑नै॒वास्मै॑ दुहे॒ दातुं॒ चे दश॑कद् व॒शाम् ॥१८॥
yo a॑syā॒ ūdho॒ na vedātho॑ asyā॒ stanā॑nu॒ta | u॒bhaye॑nai॒vāsmai॑ duhe॒ dātuṃ॒ ce daśa॑kad va॒śām || १८ ||
दु॒र॒द॒भ्नैन॒मा श॑ये याचि॒तां च॒ न दित्स॑ति ।
नास्मै॒ कामाः॒ समृ॑ध्यन्ते॒ यामद॑त्त्वा॒ चिकी॑र्षति ॥१९॥
du॒ra॒da॒bhnaina॒mā śa॑ye yāci॒tāṃ ca॒ na ditsa॑ti | nāsmai॒ kāmāḥ॒ samṛ॑dhyante॒ yāmada॑ttvā॒ cikī॑rṣati || १९ ||
दे॒वा व॒शाम॑याच॒न् मुखं॑ कृ॒त्वा ब्राह्म॑णम्।
तेषां॒ सर्वे॑षा॒मद॑द॒द्धेडं॒ न्येऽति॒ मानु॑षः ॥२०॥
de॒vā va॒śāma॑yāca॒n mukhaṃ॑ kṛ॒tvā brāhma॑ṇam | teṣāṃ॒ sarve॑ṣā॒mada॑da॒ddheḍaṃ॒ nye’ti॒ mānu॑ṣaḥ || २० ||
हेडं॑ पशू॒नां न्येऽति ब्राह्म॒णेभ्योऽद॑दद् व॒शाम्।
दे॒वानां॒ निहि॑तं भा॒गं मर्त्य॒श्चेन्नि॑प्रिया॒यते॑ ॥२१॥
heḍaṃ॑ paśū॒nāṃ nye’ti brāhma॒ṇebhyo’da॑dad va॒śām | de॒vānāṃ॒ nihi॑taṃ bhā॒gaṃ martya॒ścenni॑priyā॒yate॑ || २१ ||
यद॒न्ये श॒तं याचे॑युर्ब्राह्म॒णा गोप॑तिं व॒शाम्।
अथै॑नां दे॒वा अ॑ब्रुवन्ने॒वं ह॑ वि॒दुषो॑ व॒शा ॥२२॥
yada॒nye śa॒taṃ yāce॑yurbrāhma॒ṇā gopa॑tiṃ va॒śām | athai॑nāṃ de॒vā a॑bruvanne॒vaṃ ha॑ vi॒duṣo॑ va॒śā || २२ ||
य ए॒वं वि॒दुषेऽद॒त्त्वाथा॒न्येभ्यो॒ दद॑द् व॒शाम्।
दु॒र्गा तस्मा॑ अधि॒ष्ठाने॑ पृथि॒वी स॒हदे॑वता ॥२३॥
ya e॒vaṃ vi॒duṣe’da॒ttvāthā॒nyebhyo॒ dada॑d va॒śām | du॒rgā tasmā॑ adhi॒ṣṭhāne॑ pṛthi॒vī sa॒hade॑vatā || २३ ||
दे॒वा व॒शाम॑याच॒न् यस्मि॒न्नग्रे॒ अजा॑यत ।
तामे॒तां वि॑द्या॒न्नार॑दः स॒ह दे॒वैरुदा॑जत ॥२४॥
de॒vā va॒śāma॑yāca॒n yasmi॒nnagre॒ ajā॑yata | tāme॒tāṃ vi॑dyā॒nnāra॑daḥ sa॒ha de॒vairudā॑jata || २४ ||
अ॒न॒प॒त्यमल्प॑पशुं व॒शा कृ॑णोति॒ पूरु॑षम्।
ब्रा॒ह्म॒णैश्च॑ याचि॒तामथै॑नां निप्रिया॒यते॑ ॥२५॥
a॒na॒pa॒tyamalpa॑paśuṃ va॒śā kṛ॑ṇoti॒ pūru॑ṣam | brā॒hma॒ṇaiśca॑ yāci॒tāmathai॑nāṃ nipriyā॒yate॑ || २५ ||
अ॒ग्नीषोमा॑भ्यां॒ कामा॑य मि॒त्राय॒ वरु॑णाय च ।
तेभ्यो॑ याचन्ति ब्राह्म॒णास्तेष्वा वृ॑श्च॒तेऽद॑दत् ॥२६॥
a॒gnīṣomā॑bhyāṃ॒ kāmā॑ya mi॒trāya॒ varu॑ṇāya ca | tebhyo॑ yācanti brāhma॒ṇāsteṣvā vṛ॑śca॒te’da॑dat || २६ ||
याव॑दस्या॒ गोप॑ति॒र्नोप॑शृणु॒यादृचः॑ स्व॒यम्।
चरे॑दस्य॒ ताव॒द् गोषु॒ नास्य॑ श्रु॒त्वा गृ॒हे व॑सेत् ॥२७॥
yāva॑dasyā॒ gopa॑ti॒rnopa॑śṛṇu॒yādṛcaḥ॑ sva॒yam | care॑dasya॒ tāva॒d goṣu॒ nāsya॑ śru॒tvā gṛ॒he va॑set || २७ ||
यो अ॑स्या॒ ऋच॑ उप॒श्रुत्याथ॒ गोष्वची॑चरत्।
आयु॑श्च॒ तस्य॒ भूतिं॑ च दे॒वा वृ॑श्चन्ति हीडि॒ताः ॥२८॥
yo a॑syā॒ ṛca॑ upa॒śrutyātha॒ goṣvacī॑carat | āyu॑śca॒ tasya॒ bhūtiṃ॑ ca de॒vā vṛ॑ścanti hīḍi॒tāḥ || २८ ||
व॒शा चर॑न्ती बहु॒धा दे॒वानां॒ निहि॑तो नि॒धिः ।
आ॒विष्कृ॑णुष्व रू॒पाणि॑ य॒दा स्थाम॒ जिघां॑सति ॥२९॥
va॒śā cara॑ntī bahu॒dhā de॒vānāṃ॒ nihi॑to ni॒dhiḥ | ā॒viṣkṛ॑ṇuṣva rū॒pāṇi॑ ya॒dā sthāma॒ jighāṃ॑sati || २९ ||
आ॒विरा॒त्मानं॑ कृणुते य॒दा स्थाम॒ जिघांसति ।
अथो॑ ह ब्र॒ह्मभ्यो॑ व॒शा या॒ञ्च्याय॑ कृणुते॒ मनः॑ ॥३०॥
ā॒virā॒tmānaṃ॑ kṛṇute ya॒dā sthāma॒ jighāṃsati | atho॑ ha bra॒hmabhyo॑ va॒śā yā॒ñcyāya॑ kṛṇute॒ manaḥ॑ || ३० ||
मन॑सा॒ सं क॑ल्पयति॒ तद् दे॒वां अपि॑ गच्छति ।
ततो॑ ह ब्र॒ह्माणो॑ व॒शामु॑प॒प्रय॑न्ति॒ याचि॑तुम् ॥३१॥
mana॑sā॒ saṃ ka॑lpayati॒ tad de॒vāṃ api॑ gacchati | tato॑ ha bra॒hmāṇo॑ va॒śāmu॑pa॒praya॑nti॒ yāci॑tum || ३१ ||
स्व॒धा॒का॒रेण॑ पि॒तृभ्यो॑ य॒ज्ञेन॑ दे॒वता॑भ्यः ।
दाने॑न राज॒न्योऽ व॒शाया॑ मा॒तुर्हेडं॒ न ग॑च्छति ॥३२॥
sva॒dhā॒kā॒reṇa॑ pi॒tṛbhyo॑ ya॒jñena॑ de॒vatā॑bhyaḥ | dāne॑na rāja॒nyo’ va॒śāyā॑ mā॒turheḍaṃ॒ na ga॑cchati || ३२ ||
व॒शा मा॒ता रा॑ज॒न्यऽस्य॒ तथा॒ संभू॑तमग्र॒शः ।
तस्या॑ आहु॒रन॑र्पणं॒ यद् ब्र॒ह्मभ्यः॑ प्रदी॒यते॑ ॥३३॥
va॒śā mā॒tā rā॑ja॒nya’sya॒ tathā॒ saṃbhū॑tamagra॒śaḥ | tasyā॑ āhu॒rana॑rpaṇaṃ॒ yad bra॒hmabhyaḥ॑ pradī॒yate॑ || ३३ ||
यथाज्यं॒ प्रगृ॑हीतमालु॒म्पेत् स्रु॒चो अ॒ग्नये॑ ।
ए॒वा ह॑ ब्र॒ह्मभ्यो॑ व॒शा म॒ग्नय॒ आ वृ॑श्च॒तेऽद॑दत् ॥३४॥
yathājyaṃ॒ pragṛ॑hītamālu॒mpet sru॒co a॒gnaye॑ | e॒vā ha॑ bra॒hmabhyo॑ va॒śā ma॒gnaya॒ ā vṛ॑śca॒te’da॑dat || ३४ ||
पु॒रो॒डाश॑वत्सा सु॒दुघा॑ लो॒के॑ऽस्मा॒ उप॑ तिष्ठति ।
सास्मै॒ सर्वा॒न् कामा॑न् व॒शा प्र॑द॒दुषे॑ दुहे ॥३५॥
pu॒ro॒ḍāśa॑vatsā su॒dughā॑ lo॒ke॑’smā॒ upa॑ tiṣṭhati | sāsmai॒ sarvā॒n kāmā॑n va॒śā pra॑da॒duṣe॑ duhe || ३५ ||
सर्वा॒न् कामा॑न् यम॒राज्ये॑ व॒शा प्र॑द॒दुषे॑ दुहे ।
अथा॑हु॒र्नार॑कं लो॒कं नि॑रुन्धा॒नस्य॑ याचि॒ताम् ॥३६॥
sarvā॒n kāmā॑n yama॒rājye॑ va॒śā pra॑da॒duṣe॑ duhe | athā॑hu॒rnāra॑kaṃ lo॒kaṃ ni॑rundhā॒nasya॑ yāci॒tām || ३६ ||
प्र॒वी॒यमा॑ना चरति क्रु॒द्धा गोप॑तये व॒शा।
वे॒हतं मा॒ मन्य॑मानो मृ॒त्योः पाशे॑षु बध्यताम् ॥३७॥
pra॒vī॒yamā॑nā carati kru॒ddhā gopa॑taye va॒śā | ve॒hataṃ mā॒ manya॑māno mṛ॒tyoḥ pāśe॑ṣu badhyatām || ३७ ||
यो वे॒हतं॒ मन्य॑मानो॒ऽमा च॒ पच॑ते व॒शाम्।
अप्य॑स्य पु॒त्रान् पौत्रां॑श्च या॒चय॑ते॒ बृह॒स्पतिः॑ ॥३८॥
yo ve॒hataṃ॒ manya॑māno॒’mā ca॒ paca॑te va॒śām | apya॑sya pu॒trān pautrāṃ॑śca yā॒caya॑te॒ bṛha॒spatiḥ॑ || ३८ ||
म॒हदे॒षाव॑ तपति॒ चर॑न्ती॒ गोषु॒ गौरपि॑ ।
अथो॑ ह॒ गोप॑तये व॒शाद॑दुषे वि॒षं दु॑हे ॥३९॥
ma॒hade॒ṣāva॑ tapati॒ cara॑ntī॒ goṣu॒ gaurapi॑ | atho॑ ha॒ gopa॑taye va॒śāda॑duṣe vi॒ṣaṃ du॑he || ३९ ||
प्रि॒यं प॑शू॒नां भ॑वति॒ यद् ब्र॒ह्मभ्यः॑ प्रदी॒यते॑ ।
अथो॑ व॒शाया॒स्तत् प्रि॒यं यद् दे॑व॒त्रा ह॒विः स्यात् ॥४०॥
pri॒yaṃ pa॑śū॒nāṃ bha॑vati॒ yad bra॒hmabhyaḥ॑ pradī॒yate॑ | atho॑ va॒śāyā॒stat pri॒yaṃ yad de॑va॒trā ha॒viḥ syāt || ४० ||
या व॒शा उ॒दक॑ल्पयन् दे॒वा य॒ज्ञादु॒देत्य॑ ।
तासां॑ विलि॒प्त्यं भी॒मामु॒दाकु॑रुत नार॒दः ॥४१॥
yā va॒śā u॒daka॑lpayan de॒vā ya॒jñādu॒detya॑ | tāsāṃ॑ vili॒ptyaṃ bhī॒māmu॒dāku॑ruta nāra॒daḥ || ४१ ||
तां दे॒वा अ॑मीमांसन्त व॒शेया३मव॒शेति॑ ।
ताम॑ब्रवीन्नार॒द ए॒षा व॒शानां॑ व॒शत॒मेति॑ ॥४२॥
tāṃ de॒vā a॑mīmāṃsanta va॒śeyā३mava॒śeti॑ | tāma॑bravīnnāra॒da e॒ṣā va॒śānāṃ॑ va॒śata॒meti॑ || ४२ ||
कति॒ नु व॒शा ना॑रद॒ यास्त्वं वेत्थ मनुष्य॒जाः ।
तास्त्वा॑ पृच्छामि वि॒द्वांसं॒ कस्या॒ नाश्नी॑या॒दब्रा॑ह्मणः ॥४३॥
kati॒ nu va॒śā nā॑rada॒ yāstvaṃ vettha manuṣya॒jāḥ | tāstvā॑ pṛcchāmi vi॒dvāṃsaṃ॒ kasyā॒ nāśnī॑yā॒dabrā॑hmaṇaḥ || ४३ ||
वि॒लि॒प्त्या बृ॑हस्पते॒ या च॑ सू॒तव॑शा व॒शा।
तस्या॒ नाश्नी॑या॒दब्रा॑ह्मणो॒ या आ॒शंसे॑त॒ भूत्या॑म् ॥४४॥
vi॒li॒ptyā bṛ॑haspate॒ yā ca॑ sū॒tava॑śā va॒śā | tasyā॒ nāśnī॑yā॒dabrā॑hmaṇo॒ yā ā॒śaṃse॑ta॒ bhūtyā॑m || ४४ ||
नम॑स्ते अस्तु नारदानु॒ष्ठु वि॒दुषे॑ व॒शा।
क॒त॒मासां॑ भी॒मत॑मा॒ यामद॑त्त्वा परा॒भवे॑त् ॥४५॥
nama॑ste astu nāradānu॒ṣṭhu vi॒duṣe॑ va॒śā | ka॒ta॒māsāṃ॑ bhī॒mata॑mā॒ yāmada॑ttvā parā॒bhave॑t || ४५ ||
वि॒लि॒प्ती या बृ॑हस्प॒तेऽथो॑ सू॒तव॑शा व॒शा।
तस्या॒ नाश्नी॑या॒दब्रा॑ह्मणो॒ य आ॒शंसे॑त॒ भूत्या॑म् ॥४६॥
vi॒li॒ptī yā bṛ॑haspa॒te’tho॑ sū॒tava॑śā va॒śā | tasyā॒ nāśnī॑yā॒dabrā॑hmaṇo॒ ya ā॒śaṃse॑ta॒ bhūtyā॑m || ४६ ||
त्रीणि॒ वै व॑शाजा॒तानि॑ विलि॒प्ती सू॒तव॑शा व॒शा।
ताः प्र यच्छेद् ब्र॒ह्मभ्यः॒ सोऽनाव्र॒स्कः प्र॒जाप॑तौ ॥४७॥
trīṇi॒ vai va॑śājā॒tāni॑ vili॒ptī sū॒tava॑śā va॒śā | tāḥ pra yacched bra॒hmabhyaḥ॒ so’nāvra॒skaḥ pra॒jāpa॑tau || ४७ ||
ए॒तद् वो॑ ब्राह्मणा ह॒विरिति॑ मन्वीत याचि॒तः ।
व॒शां चेदे॑नं॒ याचे॑यु॒र्या भी॒माद॑दुषो गृ॒हे ॥४८॥
e॒tad vo॑ brāhmaṇā ha॒viriti॑ manvīta yāci॒taḥ | va॒śāṃ cede॑naṃ॒ yāce॑yu॒ryā bhī॒māda॑duṣo gṛ॒he || ४८ ||
दे॒वा व॒शां पर्य॑वद॒न् न नो॑ऽदा॒दिति॑ हीडि॒ताः ।
ए॒ताभि॑रृ॒ग्भिर्भे॒दं तस्मा॒द् वै स परा॑भवत् ॥४९॥
de॒vā va॒śāṃ parya॑vada॒n na no॑’dā॒diti॑ hīḍi॒tāḥ | e॒tābhi॑rṛ॒gbhirbhe॒daṃ tasmā॒d vai sa parā॑bhavat || ४९ ||
उ॒तैनां॑ भे॒दो नाद॑दाद् व॒शामिन्द्रे॑ण याचि॒तः ।
तस्मा॒त् तं दे॒वा आग॒सोऽवृ॑श्चन्नहमुत्त॒रे ॥५०॥
u॒taināṃ॑ bhe॒do nāda॑dād va॒śāmindre॑ṇa yāci॒taḥ | tasmā॒t taṃ de॒vā āga॒so’vṛ॑ścannahamutta॒re || ५० ||
ये व॒शाया॒ अदा॑नाय॒ वद॑न्ति परिरा॒पिणः॑ ।
इन्द्र॑स्य म॒न्यवे॑ जा॒ल्मा आ वृ॑श्चन्ते॒ अचि॑त्त्या ॥५१॥
ye va॒śāyā॒ adā॑nāya॒ vada॑nti parirā॒piṇaḥ॑ | indra॑sya ma॒nyave॑ jā॒lmā ā vṛ॑ścante॒ aci॑ttyā || ५१ ||
ये गोप॑तिं परा॒णीयाथा॒हुर्मा द॑दा॒ इति॑ ।
रु॒द्रस्या॒स्तां ते हे॒तिं परि॑ य॒न्त्यचि॑त्त्या ॥५२॥
ye gopa॑tiṃ parā॒ṇīyāthā॒hurmā da॑dā॒ iti॑ | ru॒drasyā॒stāṃ te he॒tiṃ pari॑ ya॒ntyaci॑ttyā || ५२ ||
यदि॑ हु॒तं यद्यहु॑ताम॒मा च॒ पच॑ते व॒शाम्।
दे॒वान्त्सब्रा॑ह्मणानृ॒त्वा जि॒ह्मो लो॒कान्निरृ॑च्छति ॥५३॥
yadi॑ hu॒taṃ yadyahu॑tāma॒mā ca॒ paca॑te va॒śām | de॒vāntsabrā॑hmaṇānṛ॒tvā ji॒hmo lo॒kānnirṛ॑cchati || ५३ ||