Kand 12 · Sukta 3

१३, १७ svarāḍārṣī paṅktiḥ, ३४ virāḍ garbhā, ३९ anuṣṭubgarbhā, ४४ parā bṛhatī, ५५-६० tryavasānā saptapadā śaṅkumatyatijāgataśākvarātiśākvaradhā-rtyagarbhātidhṛtiḥ (५५, ५७-६० kṛtiḥ), | pumā॑n puṃ॒so’dhi॑ tiṣṭha॒ carme॑hi॒ tatra॑ hvayasva yata॒mā pri॒yā te | yāva॑ntā॒vagre॑ pratha॒maṃ sa॑me॒yathu॒stad vāṃ॒ vayo॑ yama॒rājye॑ samā॒nam || १ ||

tāva॑d vāṃ॒ cakṣu॒stati॑ vī॒ryā’ṇi॒ tāva॒t teja॑stati॒dhā vāji॑nāni | a॒gniḥ śarī॑raṃ sacate ya॒daidho’dhā॑ pa॒kvānmi॑thunā॒ saṃ bha॑vāthaḥ || २ ||

sama॑smiṃllo॒ke samu॑ deva॒yāne॒ saṃ smā॑ sa॒metaṃ॑ yama॒rājye॑ṣu | pū॒tau pa॒vitrai॒rupa॒ taddhva॑yethāṃ॒ yadya॒d reto॒ adhi॑ vāṃ saṃba॒bhūva॑ || ३ ||

āpa॑sputrāso a॒bhi saṃ vi॑śadhvami॒maṃ jī॒vaṃ jī॑vadhanyāḥ sa॒metya॑ | tāsāṃ॑ bhajadhvama॒mṛtaṃ॒ yamā॒huryamo॑da॒naṃ paca॑ti vāṃ॒ jani॑trī || ४ ||

yaṃ vāṃ॑ pi॒tā paca॑ti॒ yaṃ ca॑ mā॒tā ri॒prānnirmu॑ktyai॒ śama॑lācca vā॒caḥ | sa o॑da॒naḥ śa॒tadhā॑raḥ sva॒rga u॒bhe vyā’pa nabha॑sī mahi॒tvā || ५ ||

u॒bhe nabha॑sī u॒bhayāṃ॑śca lo॒kān ye yajva॑nāma॒bhiji॑tāḥ sva॒rgāḥ | teṣāṃ॒ jyoti॑ṣmā॒n madhu॑mā॒n yo agre॒ tasmi॑n pu॒trairja॒rasi॒ saṃ śra॑yethām || ६ ||

prācīṃ॑prācīṃ pra॒diśa॒mā ra॑bhethāme॒taṃ lo॒kaṃ śra॒ddadhā॑nāḥ sacante | yad vāṃ॑ pa॒kvaṃ pari॑viṣṭama॒gnau tasya॒ gupta॑ye daṃpatī॒ saṃ śra॑yethām || ७ ||

dakṣi॑ṇāṃ॒ diśa॑ma॒bhi nakṣa॑māṇau pa॒ryāva॑rtethāma॒bhi pātra॑me॒tat | tasmi॑n vāṃ ya॒maḥ pi॒tṛbhiḥ॑ saṃvidā॒naḥ pa॒kvāya॒ śarma॑ bahu॒laṃ ni ya॑cchāt || ८ ||

pra॒tīcī॑ di॒śāmi॒yamid varaṃ॒ yasyāṃ॒ somo॑ adhi॒pā mṛ॑ḍi॒tā ca॑ | tasyāṃ॑ śrayethāṃ su॒kṛtaḥ॑ sacethā॒madhā॑ pa॒kvānmi॑thunā॒ saṃ bha॑vāthaḥ || ९ ||

utta॑raṃ rā॒ṣṭraṃ pra॒jayo॑tta॒rāva॑d di॒śāmudī॑cī kṛṇavanno॒ agra॑m | pāṅktaṃ॒ chandaḥ॒puru॑ṣo babhūva॒ viśvai॑rviśvā॒ṅgaiḥ sa॒ha saṃ bha॑vema || १० ||

dhru॒veyaṃ vi॒rāṇnamo॑ astva॒syai śi॒vā pu॒trebhya॑ u॒ta mahya॑mastu | sā no॑ devyadite viśvavāra॒ irya॑ iva go॒pā a॒bhi ra॑kṣa pa॒kvam || ११ ||

pi॒teva॑ pu॒trāna॒bhi saṃ sva॑jasva naḥ śi॒vā no॒ vātā॑ i॒va vā॑ntu॒ bhūmau॑ | yamo॑da॒naṃ paca॑to de॒vate॑ i॒ha taṃ na॒stapa॑ u॒ta sa॒tyaṃ ca॑ vettu || १२ ||

yadya॑t kṛ॒ṣṇaḥ śa॑ku॒na eha ga॒tvā tsara॒n viṣa॑ktaṃ॒ bila॑ āsa॒sāda॑ | yad vā॑ dā॒syā॒३rdraha॑stā sama॒ṅkta u॒lūkha॑laṃ॒ musa॑laṃ śumbhatāpaḥ || १३ ||

a॒yaṃ grāvā॑ pṛ॒thubu॑dhno vayo॒dhāḥ pū॒taḥ pa॒vitrai॒rapa॑ hantu॒ rakṣaḥ॑ | ā ro॑ha॒ carma॒ mahi॒ śarma॑ yaccha॒ mā daṃpa॑tī॒ pautra॑ma॒ghaṃ ni gā॑tām || १४ ||

vana॒spatiḥ॑ sa॒ha de॒vairna॒ āga॒n rakṣaḥ॑ piśā॒cām̐ a॑pa॒bādha॑mānaḥ | sa ucchra॑yātai॒ pra va॑dāti॒ vācaṃ॒ tena॑ lo॒kām̐ a॒bhi sarvā॑n jayema || १५ ||

sa॒pta medhā॑n pa॒śavaḥ॑ parya॑gṛhṇa॒n ya e॑ṣāṃ॒ jyoti॑ṣmāṃ u॒ta yaśca॒karśa॑ | traya॑striṃśad de॒vatā॒stāntsa॑cante॒ sa naḥ॑ sva॒rgama॒bhi ne॑ṣa lo॒kam || १६ ||

sva॒rgaṃ lo॒kama॒bhi no॑ nayāsi॒ saṃ jā॒yayā॑ sa॒ha pu॒traiḥ syā॑ma | gṛ॒hṇāmi॒ hasta॒manu॒ maitvatra॒ mā na॑stārī॒nnirṛ॑ti॒rmo arā॑tiḥ || १७ ||

grāhiṃ॑ pā॒pmāna॒mati॒ tāṃ a॑yāma॒ tamo॒ vya’sya॒ pra va॑dāsi va॒lgu | vā॒na॒spa॒tya udya॑to॒ mā ji॑hiṃsī॒rmā ta॑ṇḍu॒laṃ vi śa॑rīrdeva॒yanta॑m || १८ ||

vi॒śvavya॑cā ghṛ॒tapṛ॑ṣṭho bhavi॒ṣyantsayo॑nirlo॒kamupa॑ yāhye॒tam | va॒rṣavṛ॑ddha॒mupa॑ yaccha॒ śūrpaṃ॒ tuṣaṃ॑ pa॒lāvā॒napa॒ tad vi॑naktu || १९ ||

trayo॑ lo॒kāḥ saṃmi॑tā॒ brāhma॑ṇena॒ dyaure॒vāsau pṛ॑thi॒vya॑१ntari॑kṣam | aṃ॒śūn gṛ॑bhī॒tvānvāra॑bhethā॒mā pyā॑yantāṃ॒ puna॒rā ya॑ntu॒ śūrpa॑m || २० ||

pṛtha॑g rū॒pāṇi॑ bahu॒dhā pa॑śū॒nāmeka॑rūpo bhavasi॒ saṃ samṛ॑ddhyā | e॒tāṃ tvacaṃ॒ lohi॑nīṃ॒ tāṃ nu॑dasva॒ grāvā॑ śumbhāti mala॒ga i॑va॒ vastrā॑ || २१ ||

pṛ॒thi॒vīṃ tvā॑ pṛthi॒vyāmā ve॑śayāmi ta॒nūḥ sa॑mā॒nī vikṛ॑tā ta e॒ṣā | yadya॑d dyu॒ttaṃ li॑khi॒tamarpa॑ṇena॒ tena॒ mā su॑sro॒rbrahma॒ṇāpi॒ tad va॑pāmi || २२ ||

jani॑trīva॒ prati॑ haryāsi sū॒nuṃ saṃ tvā॑ dadhāmi pṛthi॒vīṃ pṛ॑thi॒vyā | u॒khā ku॒mbhī vedyāṃ॒ mā vya॑thiṣṭhā yajñāyu॒dhairājye॒nāti॑ṣaktā || २३ ||

a॒gniḥ paca॑n rakṣatu tvā pu॒rastā॒dindro॑ rakṣatu dakṣiṇa॒to ma॒rutvā॑n | varu॑ṇastvā dṛṃhāddha॒ruṇe॑ pra॒tīcyā॑ utta॒rāt tvā॒ somaḥ॒ saṃ da॑dātai || २४ ||

pū॒tāḥ pa॒vitraiḥ॑ pavante a॒bhrād divaṃ॑ ca॒ yanti॑ pṛthi॒vīṃ ca॑ lo॒kān | tā jī॑va॒lā jī॒vadha॑nyāḥ prati॒ṣṭhāḥ pātra॒ āsi॑ktāḥ॒ parya॒gniri॑ndhām || २५ ||

ā ya॑nti di॒vaḥ pṛ॑thi॒vīṃ sa॑cante॒ bhūmyāḥ॑ sacante॒ adhya॒ntari॑kṣam | śu॒ddhāḥ sa॒tīstā u॒ śumbha॑nta e॒va tā naḥ॑ sva॒rgama॒bhi lo॒kaṃ na॑yantu || २६ ||

u॒teva॑ pra॒bhvīru॒ta saṃmi॑tāsa u॒ta śu॒krāḥ śu॒ca॑yaścā॒mṛtā॑saḥ | tā o॑da॒naṃ daṃpa॑tibhyāṃ॒ praśi॑ṣṭā āpaḥ॒ śikṣa॑ntīḥ pacatā sunāthāḥ || २७ ||

saṃkhyā॑tā sto॒kāḥ pṛ॑thi॒vīṃ sa॑cante prāṇāpā॒naiḥ saṃmi॑tā॒ oṣa॑dhībhiḥ | asaṃ॑khyātā o॒pyamā॑nāḥ su॒varṇāḥ॒ sarvaṃ॒ vyā’puḥ॒ śuca॑yaḥ śuci॒tvam || २८ ||

udyo॑dhantya॒bhi va॑lganti ta॒ptāḥ phena॑masyanti bahu॒lāṃśca॑ bi॒ndūn | yoṣe॑va dṛ॒ṣṭvā pati॒mṛtvi॑yāyai॒taista॑ṇḍu॒lairbha॑vatā॒ samā॑paḥ || २९ ||

utthā॑paya॒ sīda॑to bu॒dhna e॑nāna॒dbhirā॒tmāna॑ma॒bhi saṃ spṛ॑śantām | amā॑si॒ pātrai॑ruda॒kaṃ yade॒tanmi॒tāsta॑ṇḍu॒lāḥ pra॒diśo॒ yadī॒māḥ || ३० ||

pra ya॑ccha॒ parśuṃ॑ tva॒rayā ha॑rau॒samahiṃ॑santa॒ oṣa॑dhīrdāntu॒ parva॑n | yāsāṃ॒ somaḥ॒ pari॑ rā॒jyaṃ ba॒bhūvāma॑nyutā no vī॒rudho॑ bhavantu || ३१ ||

navaṃ॑ ba॒rhiro॑da॒nāya॑ stṛṇīta pri॒yaṃ hṛ॒daścakṣu॑ṣo va॒lgva’stu | tasmi॑n de॒vāḥ sa॒ha dai॒vīrvi॑śantvi॒maṃ prāśna॑ntvṛ॒tubhi॑rni॒ṣadya॑ || ३२ ||

vana॑spate stī॒rṇamā sī॑da ba॒rhira॑gniṣṭo॒bhaiḥ saṃmi॑to de॒vatā॑bhiḥ | tvaṣṭre॑va rū॒paṃ sukṛ॑taṃ॒ svadhi॑tyai॒nā e॒hāḥ pari॒ pātre॑ dadṛśrām || ३३ ||

ṣa॒ṣṭyāṃ śa॒ratsu॑ nidhi॒pā a॒bhīcchā॒t svaḥ’ pa॒kvenā॒bhyaśnavātai | upai॑naṃ jīvān pi॒tara॑śca pu॒trā e॒taṃ sva॒rgaṃ ga॑ma॒yānta॑ma॒gneḥ || ३४ ||

dha॒rtā dhri॑yasva dha॒ruṇe॑ pṛthi॒vyā acyu॑taṃ tvā de॒vatā॑ścyāvayantu | taṃ tvā॒ daṃpa॑tī॒ jīva॑ntau jī॒vapu॑trā॒vud vā॑sayātaḥ॒ parya॑gni॒dhānā॑t || ३५ ||

sarvā॑ntsa॒māgā॑ abhi॒jitya॑ lo॒kān yāva॑ntaḥ॒ kāmāḥ॒ sama॑tītṛpa॒stān | vi gā॑hethāmā॒yava॑naṃ ca॒ darvi॒reka॑smi॒n pātre॒ adhyuddha॑rainam || ३६ ||

upa॑ stṛṇīhi pra॒thaya॑ pu॒rastā॑d ghṛ॒tena॒ pātra॑ma॒bhi ghā॑rayai॒tat | vā॒śrevo॒srā taru॑ṇaṃ stana॒syumi॒maṃ de॑vāso abhi॒hiṅkṛ॑ṇota || ३७ ||

upā॑starī॒raka॑ro lo॒kame॒tamu॒ruḥ pra॑thatā॒masa॑maḥ sva॒rgaḥ | tasmiṃ॑chrayātai mahi॒ṣaḥ su॑pa॒rṇo de॒vā e॑naṃ de॒vatā॑bhyaḥ॒ pra॑cyachān || ३८ ||

yadya॑jjā॒yā paca॑ti॒ tvat pa॒raḥpa॑raḥ॒ pati॑rvā jāye॒ tvat ti॒raḥ | saṃ tat sṛ॑jethāṃ sa॒ha vāṃ॒ tada॑stu saṃpā॒daya॑ntau sa॒ha lo॒meka॑m || ३९ ||

yāva॑nto a॒syāḥ pṛ॑thi॒vīṃ saca॑nte a॒smat pu॒trāḥ pari॒ ye saṃ॑babhū॒vuḥ | sarvāṃ॒stāṃ upa॒ pātre॑ hvayethāṃ॒ nābhiṃ॑ jānā॒nāḥ śiśa॑vaḥ sa॒māyā॑n || ४० ||

vaso॒ryā dhārā॒ madhu॑nā॒ prapī॑nā ghṛ॒tena॑ mi॒śrā a॒mṛta॑sya॒ nābha॑yaḥ | sarvā॒stā ava॑ rundhe sva॒rgaḥ ṣa॒ṣṭyāṃ śa॒ratsu॑ nidhi॒pā a॒bhīcchāt || ४१ ||

ni॒dhiṃ ni॑dhi॒pā a॒bhye’namicchā॒danī॑śvarā a॒bhitaḥ॑ santu॒ ye॒३nye | a॒smābhi॑rda॒tto nihi॑taḥ sva॒rgastri॒bhiḥ kāṇḍai॒strīntsva॒rgāna॑rukṣat || ४२ ||

a॒gnī rakṣa॑stapatu॒ yad vide॑vaṃ kra॒vyād pi॑śā॒ca i॒ha mā pra pā॑sta | nu॒dāma॑ ena॒mapa॑ rudhmo a॒smadā॑di॒tyā e॑na॒maṅgi॑rasaḥ sacantām || ४३ ||

ā॒di॒tyebhyo॒ aṅgi॑robhyo॒ madhvi॒daṃ ghṛ॒tena॑ mi॒śraṃ prati॑ vedayāmi | śu॒ddhaha॑stau brāhma॒ṇasyāni॑hatyai॒taṃ sva॒rgaṃ su॑kṛtā॒vapī॑tam || ४४ ||

i॒daṃ prāpa॑mutta॒maṃ kāṇḍa॑masya॒ yasmā॑llo॒kāt pa॑rame॒ṣṭhī sa॒māpa॑ | ā si॑ñca sa॒rpirghṛ॒tava॒t sama॑ṅgdhye॒ṣa bhā॒go aṅgi॑raso no॒ atra॑ || ४५ ||

sa॒tyāya॑ ca॒ tapa॑se de॒vatā॑bhyo ni॒dhiṃ śe॑va॒dhiṃ pari॑ dadma e॒tam | mā no॑ dyū॒te’va gā॒nmā sami॑tyāṃ॒ mā smā॒nyasmā॒ ut sṛ॑jatā pu॒rā mat || ४६ ||

a॒haṃ pa॑cāmya॒haṃ da॑dāmi॒ mamedu॒ karma॑nka॒ruṇe’dhi॑ jā॒yā | kaumā॑ro lo॒ko a॑janiṣṭa pu॒tro॒३nvāra॑bhethāṃ॒ vaya॑ utta॒rāva॑t || ४७ ||

na kilbi॑ṣa॒matra॒ nādhā॒ro asti॒ na yanmi॒traiḥ sa॒mama॑māna॒ eti॑ | anū॑naṃ॒ pātraṃ॒ nihi॑taṃ na e॒tat pa॒ktāraṃ॑ pa॒kvaḥ puna॒rā vi॑śāti || ४८ ||

pri॒yaṃ pri॒yāṇāṃ॑ kṛṇavāma॒ tama॒ste ya॑ntu yata॒me dvi॒ṣanti॑ | dhe॒nura॑na॒ḍvān vayo॑vaya ā॒yade॒va pauru॑ṣeya॒mapa॑ mṛ॒tyuṃ nu॑dantu || ४९ ||

sama॒gnayo॑ vidura॒nyo a॒nyaṃ ya oṣa॑dhīḥ॒ saca॑te॒ yaśca॒ sindhū॑n | yāva॑nto de॒vā di॒vyā॒३tapa॑nti॒ hira॑ṇyaṃ॒ jyotiḥ॒ paca॑to babhūva || ५० ||

e॒ṣā tva॒cāṃ puru॑ṣe॒ saṃ ba॑bhū॒vāna॑gnāḥ॒ sarve॑ pa॒śavo॒ ye a॒nye | kṣa॒treṇā॒tmānaṃ॒ pari॑ dhāpayātho’mo॒taṃ vāso॒ mukha॑moda॒nasya॑ || ५१ ||

yada॒kṣeṣu॒ vadā॒ yat sami॑tyāṃ॒ yad vā॒ vadā॒ anṛ॑taṃ vittakā॒myā | sa॒mā॒naṃ tantu॑ma॒bhi saṃ॒vasā॑nau॒ tasmi॒ntsarvaṃ॒ śama॑laṃ sādayāthaḥ || ५२ ||

va॒rṣaṃ va॑nu॒ṣvāpi॑ gaccha de॒vāṃstva॒co dhū॒maṃ paryut pā॑tayāsi | vi॒śvavya॑cā ghṛ॒tapṛ॑ṣṭho bhavi॒ṣyantsayo॑nirlo॒kamupa॑ yāhye॒tam || ५३ ||

ta॒nvaṃ sva॒rgo ba॑hu॒dhā vi ca॑kre॒ yathā॑ vi॒da ā॒tmanna॒nyava॑rṇām | apā॑jait kṛ॒ṣṇāṃ ruśa॑tīṃ punā॒no yā lohi॑nī॒ tāṃ te॑ a॒gnau ju॑homi || ५४ ||

prācyai॑ tvā di॒śe॒३gnaye’dhi॑pataye’si॒tāya॑ rakṣi॒tra ā॑di॒tyāyeṣu॑mate | e॒taṃ pari॑ dadma॒staṃ no॑ gopāya॒tāsmāka॒maitoḥ॑ | di॒ṣṭaṃ no॒ atra॑ ja॒rase॒ ni ne॑ṣajja॒rā mṛ॒tyave॒ pari॑ ṇo dadā॒tvatha॑ pa॒kvena॑ sa॒ha saṃ bha॑vema || ५५ ||

dakṣi॑ṇāyai tvā di॒śa indrā॒yādhi॑pataye॒ tira॑ścirājaye rakṣi॒tre ya॒māyeṣu॑mate | e॒taṃ pari॑ dadma॒staṃ no॑ gopāya॒tāsmāka॒maitoḥ॑ | di॒ṣṭaṃ no॒ atra॑ ja॒rase॒ ni ne॑ṣajja॒rā mṛ॒tyave॒ pari॑ ṇo dadā॒tvatha pa॒kvena॑ sa॒ha saṃ bha॑vema || ५६ ||

pra॒tīcyai॑ tvā di॒śe varu॑ṇā॒yādhi॑pataye॒ pṛdā॑kave rakṣi॒tre’nnā॒yeṣu॑mate | e॒taṃ pari॑ dadma॒staṃ no॑ gopāya॒tāsmāka॒maitoḥ॑ | di॒ṣṭaṃ no॒ atra॑ ja॒rase॒ ni ne॑ṣajja॒rā mṛ॒tyave॒ pari॑ ṇo dadā॒tvatha॑ pa॒kvena॑ sa॒ha saṃ bha॑vema || ५७ ||

udī॑cyai tvā di॒śe somā॒yādhi॑pataye sva॒jāya॑ rakṣi॒tre’śanyā iṣu॑matyai | e॒taṃ pari॑ dadma॒staṃ no॑ gopāya॒tāsmāka॒maitoḥ॑ | di॒ṣṭaṃ no॒ atra॑ ja॒rase॒ ni ne॑ṣajja॒rā mṛ॒tyave॒ pari॑ ṇo dadā॒tvatha॑ pa॒kvena॑ sa॒ha saṃ bha॑vema || ५८ ||

dhru॒vāyai॑ tvā di॒śe viṣṇa॒ve’dhi॑pataye ka॒lmāṣa॑grīvāya rakṣi॒tra oṣa॑dhībhya॒ iṣu॑matībhyaḥ | e॒taṃ pari॑ dadma॒staṃ no॑ gopāya॒tāsmāka॒maitoḥ॑ | di॒ṣṭaṃ no॒ atra॑ ja॒rase॒ ni ne॑ṣajja॒rā mṛ॒tyave॒ pari॑ ṇo dadā॒tvatha॑ pa॒kvena॑ sa॒ha saṃ bha॑vema || ५९ ||

ū॒rdhvāyai॑ tvā di॒śe bṛha॒spata॒ye’dhi॑pataye śvi॒trāya॑ rakṣi॒tre va॒rṣāyeṣu॑mate | e॒taṃ pari॑ dadma॒staṃ no॑ gopāya॒tāsmāka॒maitoḥ॑ | di॒ṣṭaṃ no॒ atra॑ ja॒rase॒ ni ne॑ṣajja॒rā mṛ॒tyave॒ pari॑ ṇo dadā॒tvatha pa॒kvena॑ sa॒ha saṃ bha॑vema || ६० ||