EeseDharmaSanātana Library
6काण्ड 11 · सूक्त 6
Atharvaveda Śaunaka Kand 11, Sukta 6.
23 shlokअ॒ग्निं ब्रू॑मो॒ वन॒स्पती॒नोष॑धीरु॒त वी॒रुधः॑ ।
इन्द्रं॒ बृह॒स्पतिं॒ सूर्यं॒ ते नो॑ मुञ्च॒न्त्वंह॑सः ॥१॥
a॒gniṃ brū॑mo॒ vana॒spatī॒noṣa॑dhīru॒ta vī॒rudhaḥ॑ | indraṃ॒ bṛha॒spatiṃ॒ sūryaṃ॒ te no॑ muñca॒ntvaṃha॑saḥ || १ ||
ब्रू॒मो राजा॑नं॒ वरु॑णं मि॒त्रं विष्णु॒मथो॒ भग॑म्।
अंशं॒ विव॑स्वन्तं ब्रूम॒स्ते नो॑ मुञ्च॒न्त्वंह॑सः ॥२॥
brū॒mo rājā॑naṃ॒ varu॑ṇaṃ mi॒traṃ viṣṇu॒matho॒ bhaga॑m | aṃśaṃ॒ viva॑svantaṃ brūma॒ste no॑ muñca॒ntvaṃha॑saḥ || २ ||
ब्रू॒मो दे॒वं स॑वि॒तारं॑ धा॒तार॑मु॒त पू॒षण॑म्।
त्वष्टा॑रमग्रि॒यं ब्रू॑म॒स्ते नो॑ मुञ्च॒न्त्वंह॑सः ॥३॥
brū॒mo de॒vaṃ sa॑vi॒tāraṃ॑ dhā॒tāra॑mu॒ta pū॒ṣaṇa॑m | tvaṣṭā॑ramagri॒yaṃ brū॑ma॒ste no॑ muñca॒ntvaṃha॑saḥ || ३ ||
ग॒न्ध॒र्वा॒प्स॒रसो॑ ब्रूमो अ॒श्विना॒ ब्रह्म॑ण॒स्पति॑म्।
अ॒र्य॒मा नाम॒ यो दे॒वस्ते नो॑ मुञ्च॒न्त्वंह॑सः ॥४॥
ga॒ndha॒rvā॒psa॒raso॑ brūmo a॒śvinā॒ brahma॑ṇa॒spati॑m | a॒rya॒mā nāma॒ yo de॒vaste no॑ muñca॒ntvaṃha॑saḥ || ४ ||
अ॒हो॒रा॒त्रे इ॒दं ब्रू॑मः सूर्याचन्द्र॒मसा॑वु॒भा।
विश्वा॑नादि॒त्यान् ब्रू॑म॒स्ते नो॑ मुञ्च॒न्त्वंह॑सः ॥५॥
a॒ho॒rā॒tre i॒daṃ brū॑maḥ sūryācandra॒masā॑vu॒bhā | viśvā॑nādi॒tyān brū॑ma॒ste no॑ muñca॒ntvaṃha॑saḥ || ५ ||
वातं॑ ब्रूमः प॒र्जन्य॑म॒न्तरि॑क्ष॒मथो॒ दिशः॑ ।
आशा॑श्च॒ सर्वा॑ ब्रूम॒स्ते नो॑ मुञ्च॒न्त्वंह॑सः ॥६॥
vātaṃ॑ brūmaḥ pa॒rjanya॑ma॒ntari॑kṣa॒matho॒ diśaḥ॑ | āśā॑śca॒ sarvā॑ brūma॒ste no॑ muñca॒ntvaṃha॑saḥ || ६ ||
मु॒ञ्चन्तु॑ मा शप॒थ्याऽदहोरा॒त्रे अथो॑ उ॒षाः ।
सोमो॑ मा दे॒वो मु॑ञ्चतु॒ यमा॒हुश्च॒न्द्रमा॒ इति॑ ॥७॥
mu॒ñcantu॑ mā śapa॒thyā’dahorā॒tre atho॑ u॒ṣāḥ | somo॑ mā de॒vo mu॑ñcatu॒ yamā॒huśca॒ndramā॒ iti॑ || ७ ||
पार्थि॑वा दि॒व्यः प॒शव॑ आर॒ण्या उ॒त ये मृ॒गाः ।
श॒कुन्ता॑न् प॒क्षिणो॑ ब्रूम॒स्ते नो॑ मुञ्च॒न्त्वंह॑सः ॥८॥
pārthi॑vā di॒vyaḥ pa॒śava॑ āra॒ṇyā u॒ta ye mṛ॒gāḥ | śa॒kuntā॑n pa॒kṣiṇo॑ brūma॒ste no॑ muñca॒ntvaṃha॑saḥ || ८ ||
भ॒वा॒श॒र्वावि॒दं ब्रू॑मो रु॒द्रं प॑शु॒पति॑श्च॒ यः ।
इषू॒र्या ए॑षां संवि॒द्म ता नः॑ सन्तु॒ सदा॑ शि॒वाः ॥९॥
bha॒vā॒śa॒rvāvi॒daṃ brū॑mo ru॒draṃ pa॑śu॒pati॑śca॒ yaḥ | iṣū॒ryā e॑ṣāṃ saṃvi॒dma tā naḥ॑ santu॒ sadā॑ śi॒vāḥ || ९ ||
दिवं॑ ब्रूमो॒ नक्ष॑त्राणि॒ भूमिं॑ य॒क्षाणि॒ पर्व॑तान्।
स॒मु॒द्रा न॒द्योऽ वेश॒न्तास्ते नो॑ मुञ्च॒न्त्वंह॑सः ॥१०॥
divaṃ॑ brūmo॒ nakṣa॑trāṇi॒ bhūmiṃ॑ ya॒kṣāṇi॒ parva॑tān | sa॒mu॒drā na॒dyo’ veśa॒ntāste no॑ muñca॒ntvaṃha॑saḥ || १० ||
स॒प्त॒र्षीन् वा इ॒दं ब्रू॑मो॒ऽपो दे॒वीः प्र॒जाप॑तिम्।
पि॒तॄन् य॒मश्रे॑ष्ठान् ब्रूम॒स्ते नो॑ मुञ्च॒न्त्वंह॑सः ॥११॥
sa॒pta॒rṣīn vā i॒daṃ brū॑mo॒’po de॒vīḥ pra॒jāpa॑tim | pi॒tṝn ya॒maśre॑ṣṭhān brūma॒ste no॑ muñca॒ntvaṃha॑saḥ || ११ ||
ये दे॒वा दि॑वि॒षदो॑ अन्तरिक्ष॒सद॑श्च॒ ये।
पृ॒थि॒व्यां श॒क्रा ये श्रि॒तास्ते नो॑ मुञ्च॒न्त्वंह॑सः ॥१२॥
ye de॒vā di॑vi॒ṣado॑ antarikṣa॒sada॑śca॒ ye | pṛ॒thi॒vyāṃ śa॒krā ye śri॒tāste no॑ muñca॒ntvaṃha॑saḥ || १२ ||
आ॒दि॒त्या रु॒द्रा वस॑वो दि॒वि दे॒वा अथ॑र्वाणः।
अङ्गि॑रसो मनी॒षिण॒स्ते नो॑ मुञ्च॒न्त्वंह॑सः ॥१३॥
ā॒di॒tyā ru॒drā vasa॑vo di॒vi de॒vā atha॑rvāṇaḥ | aṅgi॑raso manī॒ṣiṇa॒ste no॑ muñca॒ntvaṃha॑saḥ || १३ ||
य॒ज्ञं ब्रू॑मो॒ यज॑मान॒मृचः॒ सामा॑नि भेष॒जा।
यजूं॑षि॒ होत्रा॑ ब्रूम॒स्ते नो॑ मुञ्च॒न्त्वंह॑सः ॥१४॥
ya॒jñaṃ brū॑mo॒ yaja॑māna॒mṛcaḥ॒ sāmā॑ni bheṣa॒jā | yajūṃ॑ṣi॒ hotrā॑ brūma॒ste no॑ muñca॒ntvaṃha॑saḥ || १४ ||
पञ्च॑ रा॒ज्यानि॑ वी॒रुधां॒ सोम॑श्रेष्ठानि ब्रूमः ।
द॒र्भो भङ्गो यवः॒ सह॒स्ते नो॑ मुञ्च॒न्त्वंह॑सः ॥१५॥
pañca॑ rā॒jyāni॑ vī॒rudhāṃ॒ soma॑śreṣṭhāni brūmaḥ | da॒rbho bhaṅgo yavaḥ॒ saha॒ste no॑ muñca॒ntvaṃha॑saḥ || १५ ||
अ॒राया॑न् ब्रूमो॒ रक्षां॑सि स॒र्पान् पु॑ण्यज॒नान् पि॒तृन्।
मृ॒त्यूनेक॑शतं ब्रूम॒स्ते नो॑ मुञ्च॒न्त्वंह॑सः ॥१६॥
a॒rāyā॑n brūmo॒ rakṣāṃ॑si sa॒rpān pu॑ṇyaja॒nān pi॒tṛn | mṛ॒tyūneka॑śataṃ brūma॒ste no॑ muñca॒ntvaṃha॑saḥ || १६ ||
ऋ॒तून् ब्रू॑म ऋतु॒पती॑नार्त॒वानु॒त हा॑य॒नान्।
समाः॑ संवत्स॒रान् मासां॒स्ते नो॑ मुञ्च॒न्त्वंह॑सः ॥१७॥
ṛ॒tūn brū॑ma ṛtu॒patī॑nārta॒vānu॒ta hā॑ya॒nān | samāḥ॑ saṃvatsa॒rān māsāṃ॒ste no॑ muñca॒ntvaṃha॑saḥ || १७ ||
एत॑ देवा दक्षिण॒तः प॒श्चात् प्राञ्च॑ उ॒देत॑ ।
पु॒रस्ता॑दुत्त॒राच्छ॒क्रा विश्वे॑ दे॒वाः स॒मेत्य॒ ते नो॑ मुञ्च॒न्त्वंह॑सः ॥१८॥
eta॑ devā dakṣiṇa॒taḥ pa॒ścāt prāñca॑ u॒deta॑ | pu॒rastā॑dutta॒rāccha॒krā viśve॑ de॒vāḥ sa॒metya॒ te no॑ muñca॒ntvaṃha॑saḥ || १८ ||
विश्वा॑न् दे॒वानि॒दं ब्रू॑मः स॒त्यसं॑धानृता॒वृधः॑ ।
विश्वा॑भिः॒ पत्नी॑भिः स॒ह ते नो॑ मुञ्च॒न्त्वंह॑सः ॥१९॥
viśvā॑n de॒vāni॒daṃ brū॑maḥ sa॒tyasaṃ॑dhānṛtā॒vṛdhaḥ॑ | viśvā॑bhiḥ॒ patnī॑bhiḥ sa॒ha te no॑ muñca॒ntvaṃha॑saḥ || १९ ||
सर्वा॑न् दे॒वानि॒दं ब्रू॑मः स॒त्यसं॑धानृता॒वृधः॑ ।
सर्वा॑भिः॒ पत्नी॑भिः स॒ह ते नो॑ मुञ्च॒न्त्वंह॑सः ॥२०॥
sarvā॑n de॒vāni॒daṃ brū॑maḥ sa॒tyasaṃ॑dhānṛtā॒vṛdhaḥ॑ | sarvā॑bhiḥ॒ patnī॑bhiḥ sa॒ha te no॑ muñca॒ntvaṃha॑saḥ || २० ||
भू॒तं ब्रू॑मो भूत॒पतिं॑ भू॒ताना॑मु॒त यो व॒शी।
भू॒तानि॒ सर्वा॑ सं॒गत्य॒ ते नो॑ मुञ्च॒न्त्वंह॑सः ॥२१॥
bhū॒taṃ brū॑mo bhūta॒patiṃ॑ bhū॒tānā॑mu॒ta yo va॒śī | bhū॒tāni॒ sarvā॑ saṃ॒gatya॒ te no॑ muñca॒ntvaṃha॑saḥ || २१ ||
या दे॒वीः पञ्च॑ प्र॒दिशो॒ ये दे॒वा द्वाद॑श॒र्तवः॑ ।
सं॒व॒त्स॒रस्य॒ ये दंष्ट्रा॒स्ते नः॑ सन्तु॒ सदा॑ शि॒वाः ॥२२॥
yā de॒vīḥ pañca॑ pra॒diśo॒ ye de॒vā dvāda॑śa॒rtavaḥ॑ | saṃ॒va॒tsa॒rasya॒ ye daṃṣṭrā॒ste naḥ॑ santu॒ sadā॑ śi॒vāḥ || २२ ||
यन्मात॑ली रथक्री॒तम॒मृतं॒ वेद॑ भेष॒जम्।
तदिन्द्रो॑ अ॒प्सु प्रावे॑शय॒त् तदापो॑ दत्त भेष॒जम् ॥२३॥
yanmāta॑lī rathakrī॒tama॒mṛtaṃ॒ veda॑ bheṣa॒jam | tadindro॑ a॒psu prāve॑śaya॒t tadāpo॑ datta bheṣa॒jam || २३ ||