EeseDharmaSanātana Library
10काण्ड 11 · सूक्त 10
Atharvaveda Śaunaka Kand 11, Sukta 10.
27 shlokउत् ति॑ष्ठत॒ सं न॑ह्यध्व॒मुदा॑राः के॒तुभिः॑ स॒ह।
सर्पा॒ इत॑रजना॒ रक्षां॑स्य॒मित्रा॒ननु॑ धावत ॥१॥
ut ti॑ṣṭhata॒ saṃ na॑hyadhva॒mudā॑rāḥ ke॒tubhiḥ॑ sa॒ha | sarpā॒ ita॑rajanā॒ rakṣāṃ॑sya॒mitrā॒nanu॑ dhāvata || १ ||
ई॒शां वो॑ वेद॒ राज्यं॒ त्रिषं॑धे अरु॒णैः के॒तुभिः॑ स॒ह।
ये अ॒न्तरि॑क्षे॒ ये दि॒वि पृ॑थि॒व्यां ये च॑ मान॒वाः।
त्रिषं॑धे॒स्ते चेत॑सि दु॒र्णामा॑न॒ उपा॑सताम् ॥२॥
ī॒śāṃ vo॑ veda॒ rājyaṃ॒ triṣaṃ॑dhe aru॒ṇaiḥ ke॒tubhiḥ॑ sa॒ha | ye a॒ntari॑kṣe॒ ye di॒vi pṛ॑thi॒vyāṃ ye ca॑ māna॒vāḥ | triṣaṃ॑dhe॒ste ceta॑si du॒rṇāmā॑na॒ upā॑satām || २ ||
अयो॑मुखाः सू॒चीमु॑खा॒ अथो॑ विकङ्क॒तीमु॑खाः ।
क्र॒व्यादो॒ वात॑रंहसः॒ आ स॑जन्त्व॒मित्रा॒न् वज्रे॑ण॒ त्रिषं॑धिना ॥३॥
ayo॑mukhāḥ sū॒cīmu॑khā॒ atho॑ vikaṅka॒tīmu॑khāḥ | kra॒vyādo॒ vāta॑raṃhasaḥ॒ ā sa॑jantva॒mitrā॒n vajre॑ṇa॒ triṣaṃ॑dhinā || ३ ||
अ॒न्तर्धे॑हि जातवेद॒ आदि॑त्य॒ कुण॑पं ब॒हु।
त्रिषं॑धेरि॒यं सेना॒ सुहि॑तास्तु मे॒ वशे॑ ॥४॥
a॒ntardhe॑hi jātaveda॒ ādi॑tya॒ kuṇa॑paṃ ba॒hu | triṣaṃ॑dheri॒yaṃ senā॒ suhi॑tāstu me॒ vaśe॑ || ४ ||
उत् ति॑ष्ठ॒ त्वं दे॑वज॒नार्बु॑दे॒ सेन॑या स॒ह।
अ॒यं ब॒लिर्व॒ आहु॑त॒स्त्रिषं॑धे॒राहु॑तिः प्रि॒या ॥५॥
ut ti॑ṣṭha॒ tvaṃ de॑vaja॒nārbu॑de॒ sena॑yā sa॒ha | a॒yaṃ ba॒lirva॒ āhu॑ta॒striṣaṃ॑dhe॒rāhu॑tiḥ pri॒yā || ५ ||
शि॒ति॒प॒दी सं द्य॑तु शर॒व्ये॒३यं चतु॑ष्पदी ।
कृत्ये॒ऽमित्रे॑भ्यो भव॒ त्रिषं॑धेः स॒ह सेन॑या ॥६॥
śi॒ti॒pa॒dī saṃ dya॑tu śara॒vye॒३yaṃ catu॑ṣpadī | kṛtye॒’mitre॑bhyo bhava॒ triṣaṃ॑dheḥ sa॒ha sena॑yā || ६ ||
धू॒मा॒क्षी सं प॑ततु कृधुक॒र्णी च॑ क्रोशतु ।
त्रिषं॑धेः॒ सेन॑या जि॒ते अ॑रु॒णाः स॑न्तु के॒तवः॑ ॥७॥
dhū॒mā॒kṣī saṃ pa॑tatu kṛdhuka॒rṇī ca॑ krośatu | triṣaṃ॑dheḥ॒ sena॑yā ji॒te a॑ru॒ṇāḥ sa॑ntu ke॒tavaḥ॑ || ७ ||
अवा॑यन्तां प॒क्षिणो॒ ये वयां॑स्य॒न्तरि॑क्षे दि॒वि ये चर॑न्ति ।
श्वाप॑दो॒ मक्षि॑काः॒ सं र॑भन्तामा॒मादो॒ गृध्राः॒ कुण॑पे रदन्ताम् ॥८॥
avā॑yantāṃ pa॒kṣiṇo॒ ye vayāṃ॑sya॒ntari॑kṣe di॒vi ye cara॑nti | śvāpa॑do॒ makṣi॑kāḥ॒ saṃ ra॑bhantāmā॒mādo॒ gṛdhrāḥ॒ kuṇa॑pe radantām || ८ ||
यामिन्द्रे॑ण सं॒धां स॒मध॑त्था॒ ब्रह्म॑णा च बृहस्पते ।
तया॒हमि॑न्द्रसं॒धया॒ सर्वा॑न् दे॒वानि॒ह हु॑व इ॒तो ज॑यत॒ मामुतः॑ ॥९॥
yāmindre॑ṇa saṃ॒dhāṃ sa॒madha॑tthā॒ brahma॑ṇā ca bṛhaspate | tayā॒hami॑ndrasaṃ॒dhayā॒ sarvā॑n de॒vāni॒ha hu॑va i॒to ja॑yata॒ māmutaḥ॑ || ९ ||
बृह॒स्पति॑राङ्गिर॒स ऋष॑यो॒ ब्रह्म॑संशिताः ।
अ॒सु॒र॒क्षय॑णं व॒धं त्रिषं॑धिं दि॒व्याश्र॑यन् ॥१०॥
bṛha॒spati॑rāṅgira॒sa ṛṣa॑yo॒ brahma॑saṃśitāḥ | a॒su॒ra॒kṣaya॑ṇaṃ va॒dhaṃ triṣaṃ॑dhiṃ di॒vyāśra॑yan || १० ||
येना॒सौ गु॒प्त आ॑दि॒त्य उ॒भाविन्द्र॑श्च॒ तिष्ठ॑तः।
त्रिषं॑धि दे॒वा अ॑भज॒न्तौज॑से च॒ बला॑य च ॥११॥
yenā॒sau gu॒pta ā॑di॒tya u॒bhāvindra॑śca॒ tiṣṭha॑taḥ | triṣaṃ॑dhi de॒vā a॑bhaja॒ntauja॑se ca॒ balā॑ya ca || ११ ||
सर्वां॑ल्लो॒कान्त्सम॑जयन् दे॒वा आहु॑त्या॒नया॑ ।
बृह॒स्पति॑राङ्गिर॒सो वज्रं॒ यमसिञ्चतासुर॒क्षय॑णं व॒धम् ॥१२॥
sarvāṃ॑llo॒kāntsama॑jayan de॒vā āhu॑tyā॒nayā॑ | bṛha॒spati॑rāṅgira॒so vajraṃ॒ yamasiñcatāsura॒kṣaya॑ṇaṃ va॒dham || १२ ||
बृह॒स्पति॑राङ्गिर॒सो वज्रं॒ यमसि॑ञ्चतासुर॒क्षय॑णं व॒धम्।
तेना॒हम॒मूं सेनां॒ नि लि॑म्पामि बृहस्पते॒ऽमित्रा॑न् ह॒न्म्योज॑सा ॥१३॥
bṛha॒spati॑rāṅgira॒so vajraṃ॒ yamasi॑ñcatāsura॒kṣaya॑ṇaṃ va॒dham | tenā॒hama॒mūṃ senāṃ॒ ni li॑mpāmi bṛhaspate॒’mitrā॑n ha॒nmyoja॑sā || १३ ||
सर्वे॑ दे॒वा अ॒त्याय॑न्ति॒ ये अ॒श्नन्ति॒ वष॑ट् कृतम् ।
इ॒मां जु॑षध्व॒माहु॑तिमि॒तो ज॑यत॒ मामुतः॑ ॥१४॥
sarve॑ de॒vā a॒tyāya॑nti॒ ye a॒śnanti॒ vaṣa॑ṭ kṛtam | i॒māṃ ju॑ṣadhva॒māhu॑timi॒to ja॑yata॒ māmutaḥ॑ || १४ ||
सर्वे॑ दे॒वा अ॒त्याय॑न्तु॒ त्रिष॑न्धे॒राहु॑तिः प्रि॒या।
सं॒धां म॑ह॒तीं र॑क्षत॒ ययाग्रे॒ असु॑रा जि॒ताः ॥१५॥
sarve॑ de॒vā a॒tyāya॑ntu॒ triṣa॑ndhe॒rāhu॑tiḥ pri॒yā | saṃ॒dhāṃ ma॑ha॒tīṃ ra॑kṣata॒ yayāgre॒ asu॑rā ji॒tāḥ || १५ ||
वा॒युर॒मित्रा॑णामिष्व॒ग्राण्याञ्च॑तु ।
इन्द्र॑ एषां बा॒हून् प्रति॑ भनक्तु॒ मा श॑कन् प्रति॒धामिषु॑म्।
आ॒दि॒त्य ए॑षाम॒स्त्रं वि ना॑शयतु च॒न्द्रमा॑ युता॒मग॑तस्य॒ पन्था॑म् ॥१६॥
vā॒yura॒mitrā॑ṇāmiṣva॒grāṇyāñca॑tu | indra॑ eṣāṃ bā॒hūn prati॑ bhanaktu॒ mā śa॑kan prati॒dhāmiṣu॑m | ā॒di॒tya e॑ṣāma॒straṃ vi nā॑śayatu ca॒ndramā॑ yutā॒maga॑tasya॒ panthā॑m || १६ ||
यदि॑ प्रे॒युर्दे॑वपु॒रा ब्रह्म॒ वर्मा॑णि चक्रि॒रे।
त॒नू॒पानं॑ परि॒पाणं॑ कृण्वा॒ना यदु॑पोचि॒रे सर्वं॒ तद॑र॒सं कृ॑धि ॥१७॥
yadi॑ pre॒yurde॑vapu॒rā brahma॒ varmā॑ṇi cakri॒re | ta॒nū॒pānaṃ॑ pari॒pāṇaṃ॑ kṛṇvā॒nā yadu॑poci॒re sarvaṃ॒ tada॑ra॒saṃ kṛ॑dhi || १७ ||
क्र॒व्यादा॑नुव॒र्तय॑न्मृ॒त्युना॑ च पु॒रोहि॑तम्।
त्रिष॑न्धे॒ प्रेहि॒ सेन॑या॒ जया॒मित्रा॒न् प्र प॑द्यस्व ॥१८॥
kra॒vyādā॑nuva॒rtaya॑nmṛ॒tyunā॑ ca pu॒rohi॑tam | triṣa॑ndhe॒ prehi॒ sena॑yā॒ jayā॒mitrā॒n pra pa॑dyasva || १८ ||
त्रिष॑न्धे॒ तम॑सा॒ त्वम॒मित्रा॒न् परि॑ वारय ।
पृ॒ष॒दा॒ज्यप्र॑णुत्तानां॒ मामीषां॑ मोचि॒ कश्च॒न ॥१९॥
triṣa॑ndhe॒ tama॑sā॒ tvama॒mitrā॒n pari॑ vāraya | pṛ॒ṣa॒dā॒jyapra॑ṇuttānāṃ॒ māmīṣāṃ॑ moci॒ kaśca॒na || १९ ||
शि॒ति॒प॒दी सं प॑तत्व॒मित्रा॑णाम॒मूः सिचः॑ ।
मुह्य॑न्त्व॒द्यामूः सेनाः॑ अ॒मित्रा॑नां न्यर्बुदे ॥२०॥
śi॒ti॒pa॒dī saṃ pa॑tatva॒mitrā॑ṇāma॒mūḥ sicaḥ॑ | muhya॑ntva॒dyāmūḥ senāḥ॑ a॒mitrā॑nāṃ nyarbude || २० ||
मू॒ढा अ॒मित्रा॑ न्यर्बुदे ज॒ह्येऽषां॒ वरं॑वरम्।
अ॒नया॑ जहि॒ सेन॑या ॥२१॥
mū॒ḍhā a॒mitrā॑ nyarbude ja॒hye’ṣāṃ॒ varaṃ॑varam | a॒nayā॑ jahi॒ sena॑yā || २१ ||
यश्च॑ कव॒ची यश्चा॑कव॒चो॒३मित्रो॒ यश्चाज्म॑नि ।
ज्या॒पा॒शैः क॑वचपा॒शैरज्म॑ना॒भिह॑तः शयाम् ॥२२॥
yaśca॑ kava॒cī yaścā॑kava॒co॒३mitro॒ yaścājma॑ni | jyā॒pā॒śaiḥ ka॑vacapā॒śairajma॑nā॒bhiha॑taḥ śayām || २२ ||
ये व॒र्मिणो॒ येऽव॒र्माणो॑ अ॒मित्रा॒ ये च॑ व॒र्मिणः॑ ।
सर्वां॒स्तां अ॑र्बुदे ह॒तांछ्वानो॑ऽदन्तु॒ भूम्या॑म् ॥२३॥
ye va॒rmiṇo॒ ye’va॒rmāṇo॑ a॒mitrā॒ ye ca॑ va॒rmiṇaḥ॑ | sarvāṃ॒stāṃ a॑rbude ha॒tāṃchvāno॑’dantu॒ bhūmyā॑m || २३ ||
ये र॒थिनो॑ ये अ॑र॒था अ॑सा॒दा ये च॑ सा॒दिनः॑ ।
सर्वा॑नदन्तु॒ तान् ह॒तान् गृध्राः॑ श्ये॒नाः प॑त॒त्रिणः॑ ॥२४॥
ye ra॒thino॑ ye a॑ra॒thā a॑sā॒dā ye ca॑ sā॒dinaḥ॑ | sarvā॑nadantu॒ tān ha॒tān gṛdhrāḥ॑ śye॒nāḥ pa॑ta॒triṇaḥ॑ || २४ ||
स॒हस्र॑कुणपा शेतामामि॒त्री सेना॑ सम॒रे व॒धाना॑म्।
विवि॑द्धा कक॒जाकृ॑ता ॥२५॥
sa॒hasra॑kuṇapā śetāmāmi॒trī senā॑ sama॒re va॒dhānā॑m | vivi॑ddhā kaka॒jākṛ॑tā || २५ ||
म॒र्मा॒विधं॒ रोरु॑वतं सुप॒र्णैर॒दन्तु॑ दु॒श्चितं॑ मृदि॒तं शया॑नम्।
य इ॒मां प्र॒तीची॒माहु॑तिम॒मित्रो॑ नो॒ युयु॑त्सति ॥२६॥
ma॒rmā॒vidhaṃ॒ roru॑vataṃ supa॒rṇaira॒dantu॑ du॒ścitaṃ॑ mṛdi॒taṃ śayā॑nam | ya i॒māṃ pra॒tīcī॒māhu॑tima॒mitro॑ no॒ yuyu॑tsati || २६ ||
यां दे॒वा अ॑नु॒तिस्ठ॑न्ति॒ यस्या॒ नास्ति॑ वि॒राध॑नम्।
तयेन्द्रो॑ हन्तु वृत्र॒हा वज्रे॑ण॒ त्रिषं॑धिना ॥२७॥
yāṃ de॒vā a॑nu॒tisṭha॑nti॒ yasyā॒ nāsti॑ vi॒rādha॑nam | tayendro॑ hantu vṛtra॒hā vajre॑ṇa॒ triṣaṃ॑dhinā || २७ ||