EeseDharmaSanātana Library
30काण्ड 1 · सूक्त 30
Atharvaveda Śaunaka Kand 1, Sukta 30.
4 shlokविश्वे॑ देवा॒ वस॑वो॒ रक्ष॑ते॒ममु॒तादि॑त्या जागृ॒त यू॒यम॒स्मिन्।
मेमं सना॑भिरु॒त वा॒न्यना॑भि॒र्मेमं प्राप॒त् पौरु॑षेयो व॒धो यः ॥१॥
viśve॑ devā॒ vasa॑vo॒ rakṣa॑te॒mamu॒tādi॑tyā jāgṛ॒ta yū॒yama॒smin | memaṃ sanā॑bhiru॒ta vā॒nyanā॑bhi॒rmemaṃ prāpa॒t pauru॑ṣeyo va॒dho yaḥ || १ ||
ये वो॑ देवाः पि॒तरो॒ ये च॑ पु॒त्राः सचे॑तसो मे शृणुते॒दमु॒क्तम्।
सर्वे॑भ्यो वः॒ प॑रि ददाम्ये॒तं स्व॒स्त्येऽनं ज॒रसे॑ वहाथ ॥२॥
ye vo॑ devāḥ pi॒taro॒ ye ca॑ pu॒trāḥ sace॑taso me śṛṇute॒damu॒ktam | sarve॑bhyo vaḥ॒ pa॑ri dadāmye॒taṃ sva॒stye’naṃ ja॒rase॑ vahātha || २ ||
ये दे॑वा दि॒वि ष्ठ ये पृ॑थि॒व्यां ये अ॒न्तरि॑क्ष॒ ओष॑धीषु प॒शुष्व॒प्स्व॑१न्तः ।
ते कृ॑णुत ज॒रस॒मायु॑र॒स्मै श॒तम॒न्यान् परि॑ वृणक्तु मृ॒त्यून् ॥३॥
ye de॑vā di॒vi ṣṭha ye pṛ॑thi॒vyāṃ ye a॒ntari॑kṣa॒ oṣa॑dhīṣu pa॒śuṣva॒psva॑१ntaḥ | te kṛ॑ṇuta ja॒rasa॒māyu॑ra॒smai śa॒tama॒nyān pari॑ vṛṇaktu mṛ॒tyūn || ३ ||
येषां॑ प्रया॒जा उ॒त वा॑नुया॒जा हु॒तभा॑गा अहु॒ताद॑श्च दे॒वाः ।
येषां॑ वः॒ पञ्च॑ प्र॒दिशो॒ विभ॑क्ता॒स्तान् वो अ॒स्मै स॑त्र॒सदः॑ कृणोमि ॥४॥
yeṣāṃ॑ prayā॒jā u॒ta vā॑nuyā॒jā hu॒tabhā॑gā ahu॒tāda॑śca de॒vāḥ | yeṣāṃ॑ vaḥ॒ pañca॑ pra॒diśo॒ vibha॑ktā॒stān vo a॒smai sa॑tra॒sadaḥ॑ kṛṇomi || ४ ||