EeseDharmaSanātana Library
21काण्ड 1 · सूक्त 21
Atharvaveda Śaunaka Kand 1, Sukta 21.
4 shlokस्वस्ति॒दा वि॒शां पति॑र्वृत्र॒हा वि॑मृ॒धो॑ व॒शी।
वृषेन्द्रः॑ पु॒र ए॑तु नः सोम॒पा अ॑भयंक॒रः ॥१॥
svasti॒dā vi॒śāṃ pati॑rvṛtra॒hā vi॑mṛ॒dho॑ va॒śī | vṛṣendraḥ॑ pu॒ra e॑tu naḥ soma॒pā a॑bhayaṃka॒raḥ || १ ||
वि न॑ इन्द्र॒ मृधो॑ जहि नीचा॒ य॑च्छ पृतन्य॒तः ।
अ॒ध॒मं ग॑मया॒ तमो॒ यो अ॒स्माँ अ॑भि॒दास॑ति ॥२॥
vi na॑ indra॒ mṛdho॑ jahi nīcā॒ ya॑ccha pṛtanya॒taḥ | a॒dha॒maṃ ga॑mayā॒ tamo॒ yo a॒smām̐ a॑bhi॒dāsa॑ti || २ ||
वि रक्षो॒ वि मृधो॑ जहि वि वृ॒त्रस्य॒ हनू॑ रुज ।
वि म॒न्युमि॑न्द्र वृत्रहन्न॒मित्र॑स्याभि॒दास॑तः ॥३॥
vi rakṣo॒ vi mṛdho॑ jahi vi vṛ॒trasya॒ hanū॑ ruja | vi ma॒nyumi॑ndra vṛtrahanna॒mitra॑syābhi॒dāsa॑taḥ || ३ ||
अपे॑न्द्र द्विष॒तो मनोऽप॒ जिज्या॑सतो व॒धम्।
वि महच्छर्म॑ यच्छ॒ वरी॑यो यावया व॒धम् ॥४॥
ape॑ndra dviṣa॒to mano’pa॒ jijyā॑sato va॒dham | vi mahaccharma॑ yaccha॒ varī॑yo yāvayā va॒dham || ४ ||