EeseDharmaSanātana Library
11काण्ड 1 · सूक्त 11
Atharvaveda Śaunaka Kand 1, Sukta 11.
6 shlokवष॑ट् ते पूषन्न॒स्मिन्त्सू॑तावर्य॒मा होता॑ कृणोतु वे॒धाः ।
सिस्र॑तां॒ नार्यृ॒तप्र॑जाता॒ वि पर्वा॑णि जिहतां॒ सूत॒वा उ॑ ॥१॥
vaṣa॑ṭ te pūṣanna॒smintsū॑tāvarya॒mā hotā॑ kṛṇotu ve॒dhāḥ | sisra॑tāṃ॒ nāryṛ॒tapra॑jātā॒ vi parvā॑ṇi jihatāṃ॒ sūta॒vā u॑ || १ ||
चत॑स्रो दि॒वः प्र॒दिश॒श्चत॑स्रो॒ भूम्या॒ उ॒त।
दे॒वा गर्भं॒ समै॑रय॒न् तं व्यू॑र्णुवन्तु॒ सूत॑वे ॥२॥
cata॑sro di॒vaḥ pra॒diśa॒ścata॑sro॒ bhūmyā॒ u॒ta | de॒vā garbhaṃ॒ samai॑raya॒n taṃ vyū॑rṇuvantu॒ sūta॑ve || २ ||
सू॒षा व्यू॑र्णोतु॒ वि योनिं॑ हापयामसि ।
श्र॒थया॑ सूषणे॒ त्वमव॒ त्वं बि॑ष्कले सृज ॥३॥
sū॒ṣā vyū॑rṇotu॒ vi yoniṃ॑ hāpayāmasi | śra॒thayā॑ sūṣaṇe॒ tvamava॒ tvaṃ bi॑ṣkale sṛja || ३ ||
नेव॑ मां॒से न पीव॑सि॒ नेव॑ म॒ज्जस्वाह॑तम्।
अवै॑तु॒ पृश्नि॒ शेव॑लं॒ शुने॑ ज॒राय्वत्त॒वेऽव॑ ज॒रायु॑ पद्यताम् ॥४॥
neva॑ māṃ॒se na pīva॑si॒ neva॑ ma॒jjasvāha॑tam | avai॑tu॒ pṛśni॒ śeva॑laṃ॒ śune॑ ja॒rāyvatta॒ve’va॑ ja॒rāyu॑ padyatām || ४ ||
वि ते॑ भिनद्मि॒ मेह॑नं॒ वि योनिं॒ वि ग॒वीनि॑के ।
वि मा॒तरं॑ च पु॒त्रं च॒ वि कु॑मा॒रं ज॒रायु॒णाव॑ ज॒रायु॑ पद्यताम् ॥५॥
vi te॑ bhinadmi॒ meha॑naṃ॒ vi yoniṃ॒ vi ga॒vīni॑ke | vi mā॒taraṃ॑ ca pu॒traṃ ca॒ vi ku॑mā॒raṃ ja॒rāyu॒ṇāva॑ ja॒rāyu॑ padyatām || ५ ||
यथा॒ वातो॒ यथा॒ मनो॒ यथा॒ पत॑न्ति प॒क्षि॑णः॑ ।
ए॒वा त्वं द॑शमास्य सा॒कं ज॒रायु॑णा प॒ताव॑ ज॒रायु॑ पद्यताम् ॥६॥
yathā॒ vāto॒ yathā॒ mano॒ yathā॒ pata॑nti pa॒kṣi॑ṇaḥ॑ | e॒vā tvaṃ da॑śamāsya sā॒kaṃ ja॒rāyu॑ṇā pa॒tāva॑ ja॒rāyu॑ padyatām || ६ ||