EeseDharmaSanātana Library
9प्रकरण 9
8 shlokकृताकृते च द्वन्द्वानि कदा शान्तानि कस्य वा।
एवं ज्ञात्वेह निर्वेदाद्भव त्यागपरोऽव्रती॥९।१॥
kṛtākṛte ca dvandvāni kadā śāntāni kasya vā | evaṃ jñātveha nirvedādbhava tyāgaparo’vratī || ९ | १ ||
कस्यापि तात धन्यस्य लोकचेष्टावलोकनात्।
जीवितेच्छा बुभुक्षा च बुभुत्सोपशमं गताः॥९।२॥
kasyāpi tāta dhanyasya lokaceṣṭāvalokanāt | jīvitecchā bubhukṣā ca bubhutsopaśamaṃ gatāḥ || ९ | २ ||
अनित्यं सर्वमेवेदं तापत्रितयदूषितम्।
असारं निन्दितं हेयमिति निश्चित्य शाम्यति॥९।३॥
anityaṃ sarvamevedaṃ tāpatritayadūṣitam | asāraṃ ninditaṃ heyamiti niścitya śāmyati || ९ | ३ ||
कोऽसौ कालो वयः किं वा यत्र द्वन्द्वानि नो नृणाम्।
तान्युपेक्ष्य यथाप्राप्तवर्ती सिद्धिमवाप्नुयात्॥९।४॥
ko’sau kālo vayaḥ kiṃ vā yatra dvandvāni no nṛṇām | tānyupekṣya yathāprāptavartī siddhimavāpnuyāt || ९ | ४ ||
नाना मतं महर्षीणां साधूनां योगिनां तथा।
दृष्ट्वा निर्वेदमापन्नः को न शाम्यति मानवः॥९।५॥
nānā mataṃ maharṣīṇāṃ sādhūnāṃ yogināṃ tathā | dṛṣṭvā nirvedamāpannaḥ ko na śāmyati mānavaḥ || ९ | ५ ||
कृत्वा मूर्तिपरिज्ञानं चैतन्यस्य न किं गुरुः।
निर्वेदसमतायुक्त्या यस्तारयति संसृतेः॥९।६॥
kṛtvā mūrtiparijñānaṃ caitanyasya na kiṃ guruḥ | nirvedasamatāyuktyā yastārayati saṃsṛteḥ || ९ | ६ ||
पश्य भूतविकारांस्त्वं भूतमात्रान्यथार्थतः।
तत्क्षणाद्बन्धनिर्मुक्तः स्वरूपस्थो भविष्यसि॥९।७॥
paśya bhūtavikārāṃstvaṃ bhūtamātrānyathārthataḥ | tatkṣaṇādbandhanirmuktaḥ svarūpastho bhaviṣyasi || ९ | ७ ||
वासना एव संसार इति सर्वा विमुञ्च ताः।
तत्त्यागो वासनात्यागात्स्थितिरद्य यथा तथा॥९।८॥
vāsanā eva saṃsāra iti sarvā vimuñca tāḥ | tattyāgo vāsanātyāgātsthitiradya yathā tathā || ९ | ८ ||