EeseDharmaSanātana Library
20प्रकरण 20
14 shlokक्व भूतानि क्व देहो वा क्वेन्द्रियाणि क्व वा मनः।
क्व शून्यं क्व च नैराश्यं मत्स्वरूपे निरञ्जने॥२०।१॥
kva bhūtāni kva deho vā kvendriyāṇi kva vā manaḥ | kva śūnyaṃ kva ca nairāśyaṃ matsvarūpe nirañjane || २० | १ ||
क्व शास्त्रं क्वात्मविज्ञानं क्व वा निर्विषयं मनः।
क्व तृप्तिः क्व वितृष्णत्वं गतद्वन्द्वस्य मे सदा॥२०।२॥
kva śāstraṃ kvātmavijñānaṃ kva vā nirviṣayaṃ manaḥ | kva tṛptiḥ kva vitṛṣṇatvaṃ gatadvandvasya me sadā || २० | २ ||
क्व विद्या क्व च वाऽविद्या क्वाहं क्वेदं मम क्व वा।
क्व बन्धः क्व च वा मोक्षः स्वरूपस्य क्व रूपता॥२०।३॥
kva vidyā kva ca vā’vidyā kvāhaṃ kvedaṃ mama kva vā | kva bandhaḥ kva ca vā mokṣaḥ svarūpasya kva rūpatā || २० | ३ ||
क्व प्रारब्धानि कर्माणि जीवन्मुक्तिरपि क्व वा।
क्व तद्विदेहकैवल्यं निर्विशेषस्य सर्वदा॥२०।४॥
kva prārabdhāni karmāṇi jīvanmuktirapi kva vā | kva tadvidehakaivalyaṃ nirviśeṣasya sarvadā || २० | ४ ||
क्व कर्ता क्व च वा भोक्ता निष्क्रियं स्फुरणं क्व वा।
क्वापरोक्षं फलं वा क्व निःस्वभावस्य मे सदा॥२०।५॥
kva kartā kva ca vā bhoktā niṣkriyaṃ sphuraṇaṃ kva vā | kvāparokṣaṃ phalaṃ vā kva niḥsvabhāvasya me sadā || २० | ५ ||
क्व लोकं क्व मुमुक्षुर्वा क्व योगी ज्ञानवान्क्व वा।
क्व बद्धः क्व च वा मुक्तः स्वस्वरूपेऽहमद्वये॥२०।६॥
kva lokaṃ kva mumukṣurvā kva yogī jñānavānkva vā | kva baddhaḥ kva ca vā muktaḥ svasvarūpe’hamadvaye || २० | ६ ||
क्व सृष्टिः क्व च संहारः क्व साध्यं क्व च साधनम्।
क्व साधकः क्व सिद्धिर्वा स्वस्वरूपेऽहमद्वये॥२०।७॥
kva sṛṣṭiḥ kva ca saṃhāraḥ kva sādhyaṃ kva ca sādhanam | kva sādhakaḥ kva siddhirvā svasvarūpe’hamadvaye || २० | ७ ||
क्व प्रमाता प्रमाणं वा क्व प्रमेयं क्व च प्रमा।
क्व किञ्चित्क्व न किञ्चिद्वा सर्वदा विमलस्य मे॥२०।८॥
kva pramātā pramāṇaṃ vā kva prameyaṃ kva ca pramā | kva kiñcitkva na kiñcidvā sarvadā vimalasya me || २० | ८ ||
क्व विक्षेपः क्व चैकाग्र्यं क्व निर्बोधः क्व मूढता।
क्व हर्षः क्व विषादो वा सर्वदा निष्क्रियस्य मे॥२०।९॥
kva vikṣepaḥ kva caikāgryaṃ kva nirbodhaḥ kva mūḍhatā | kva harṣaḥ kva viṣādo vā sarvadā niṣkriyasya me || २० | ९ ||
क्व चैष व्यवहारो वा क्व च सा परमार्थता।
क्व सुखं क्व च वा दुःखं निर्विमर्शस्य मे सदा॥२०।१०॥
kva caiṣa vyavahāro vā kva ca sā paramārthatā | kva sukhaṃ kva ca vā duḥkhaṃ nirvimarśasya me sadā || २० | १० ||
क्व माया क्व च संसारः क्व प्रीतिर्विरतिः क्व वा।
क्व जीवः क्व च तद्ब्रह्म सर्वदा विमलस्य मे॥२०।११॥
kva māyā kva ca saṃsāraḥ kva prītirviratiḥ kva vā | kva jīvaḥ kva ca tadbrahma sarvadā vimalasya me || २० | ११ ||
क्व प्रवृत्तिर्निवृत्तिर्वा क्व मुक्तिः क्व च बन्धनम्।
कूटस्थनिर्विभागस्य स्वस्थस्य मम सर्वदा॥२०।१२॥
kva pravṛttirnivṛttirvā kva muktiḥ kva ca bandhanam | kūṭasthanirvibhāgasya svasthasya mama sarvadā || २० | १२ ||
क्वोपदेशः क्व वा शास्त्रं क्व शिष्यः क्व च वा गुरुः।
क्व चास्ति पुरुषार्थो वा निरुपाधेः शिवस्य मे॥२०।१३॥
kvopadeśaḥ kva vā śāstraṃ kva śiṣyaḥ kva ca vā guruḥ | kva cāsti puruṣārtho vā nirupādheḥ śivasya me || २० | १३ ||
क्व चास्ति क्व च वा नास्ति क्वास्ति चैकं क्व च द्वयम्।
बहुनाऽत्र किमुक्तेन किञ्चिन्नोत्तिष्ठते मम॥२०।१४॥
kva cāsti kva ca vā nāsti kvāsti caikaṃ kva ca dvayam | bahunā’tra kimuktena kiñcinnottiṣṭhate mama || २० | १४ ||