EeseDharmaSanātana Library
13प्रकरण 13
7 shlokअकिञ्चनभवं स्वास्थ्यं कौपीनत्वेऽपि दुर्लभम्।
त्यागादाने विहायास्मादहमासे यथासुखम्॥१३।१॥
akiñcanabhavaṃ svāsthyaṃ kaupīnatve’pi durlabham | tyāgādāne vihāyāsmādahamāse yathāsukham || १३ | १ ||
कुत्रापि खेदः कायस्य जिह्वा कुत्रापि खिद्यते।
मनः कुत्रापि तत्त्यक्त्वा पुरुषार्थे स्थितः सुखम्॥१३।२॥
kutrāpi khedaḥ kāyasya jihvā kutrāpi khidyate | manaḥ kutrāpi tattyaktvā puruṣārthe sthitaḥ sukham || १३ | २ ||
कृतं किमपि नैव स्यादिति संचिन्त्य तत्त्वतः।
यदा यत्कर्तुमायाति तत्कृत्वाऽऽसे यथासुखम्॥१३।३॥
kṛtaṃ kimapi naiva syāditi saṃcintya tattvataḥ | yadā yatkartumāyāti tatkṛtvā’’se yathāsukham || १३ | ३ ||
कर्मनैष्कर्म्यनिर्बन्धभावा देहस्थयोगिनः।
संयोगायोगविरहादहमासे यथासुखम्॥१३।४॥
karmanaiṣkarmyanirbandhabhāvā dehasthayoginaḥ | saṃyogāyogavirahādahamāse yathāsukham || १३ | ४ ||
अर्थानर्थौ न मे स्थित्या गत्या न शयनेन वा।
तिष्ठन्गच्छन्स्वपन्तस्मादहमासे यथासुखम्॥१३।५॥
arthānarthau na me sthityā gatyā na śayanena vā | tiṣṭhangacchansvapantasmādahamāse yathāsukham || १३ | ५ ||
स्वपतो नास्ति मे हानिः सिद्धिर्यत्नवतो न वा।
नाशोल्लासौ विहायास्मादहमासे यथासुखम्॥१३।६॥
svapato nāsti me hāniḥ siddhiryatnavato na vā | nāśollāsau vihāyāsmādahamāse yathāsukham || १३ | ६ ||
सुखादिरूपाऽनियमं भावेष्वालोक्य भूरिशः।
शुभाशुभे विहायास्मादहमासे यथासुखम्॥१३।७॥
sukhādirūpā’niyamaṃ bhāveṣvālokya bhūriśaḥ | śubhāśubhe vihāyāsmādahamāse yathāsukham || १३ | ७ ||