EeseDharmaSanātana Library
12प्रकरण 12
8 shlokकायकृत्यासहः पूर्वं ततो वाग्विस्तरासहः।
अथ चिन्तासहस्तस्मादेवमेवाहमास्थितः॥१२।१॥
kāyakṛtyāsahaḥ pūrvaṃ tato vāgvistarāsahaḥ | atha cintāsahastasmādevamevāhamāsthitaḥ || १२ | १ ||
प्रीत्यभावेन शब्दादेरदृश्यत्वेन चात्मनः।
विक्षेपैकाग्र्यहृदय एवमेवाहमास्थितः॥१२।२॥
prītyabhāvena śabdāderadṛśyatvena cātmanaḥ | vikṣepaikāgryahṛdaya evamevāhamāsthitaḥ || १२ | २ ||
समाध्यासादिविक्षिप्तौ व्यवहारः समाधये।
एवं विलोक्य नियममेवमेवाहमास्थितः॥१२।३॥
samādhyāsādivikṣiptau vyavahāraḥ samādhaye | evaṃ vilokya niyamamevamevāhamāsthitaḥ || १२ | ३ ||
हेयोपादेयविरहादेवं हर्षविषादयोः।
अभावादद्य हे ब्रह्मन्नेवमेवाहमास्थितः॥१२।४॥
heyopādeyavirahādevaṃ harṣaviṣādayoḥ | abhāvādadya he brahmannevamevāhamāsthitaḥ || १२ | ४ ||
आश्रमानाश्रमं ध्यानं चित्तस्वीकृतवर्जनम्।
विकल्पं मम वीक्ष्यैतैरेवमेवाहमास्थितः॥१२।५॥
āśramānāśramaṃ dhyānaṃ cittasvīkṛtavarjanam | vikalpaṃ mama vīkṣyaitairevamevāhamāsthitaḥ || १२ | ५ ||
कर्मानुष्ठानमज्ञानाद्यथैवोपरमस्तथा।
बुध्वा सम्यगिदं तत्त्वमेवमेवाहमास्थितः॥१२।६॥
karmānuṣṭhānamajñānādyathaivoparamastathā | budhvā samyagidaṃ tattvamevamevāhamāsthitaḥ || १२ | ६ ||
अचिन्त्यं चिन्त्यमानोऽपि चिन्तारूपं भजत्यसौ।
त्यक्त्वा तद्भावनं तस्मादेवमेवाहमास्थितः॥१२।७॥
acintyaṃ cintyamāno’pi cintārūpaṃ bhajatyasau | tyaktvā tadbhāvanaṃ tasmādevamevāhamāsthitaḥ || १२ | ७ ||
एवमेव कृतं येन स कृतार्थो भवेदसौ।
एवमेव स्वभावो यः स कृतार्थो भवेदसौ॥१२।८॥
evameva kṛtaṃ yena sa kṛtārtho bhavedasau | evameva svabhāvo yaḥ sa kṛtārtho bhavedasau || १२ | ८ ||