EeseDharmaSanātana Library
11प्रकरण 11
8 shlokभावाभावविकारश्च स्वभावादिति निश्चयी।
निर्विकारो गतक्लेशः सुखेनैवोपशाम्यति॥११।१॥
bhāvābhāvavikāraśca svabhāvāditi niścayī | nirvikāro gatakleśaḥ sukhenaivopaśāmyati || ११ | १ ||
ईश्वरः सर्वनिर्माता नेहान्य इति निश्चयी।
अन्तर्गलितसर्वाशः शान्तः क्वापि न सज्जते॥११।२॥
īśvaraḥ sarvanirmātā nehānya iti niścayī | antargalitasarvāśaḥ śāntaḥ kvāpi na sajjate || ११ | २ ||
आपदः संपदः काले दैवादेवेति निश्चयी।
तृप्तः स्वस्थेन्द्रियो नित्यं न वाञ्छति न शोचति॥११।३॥
āpadaḥ saṃpadaḥ kāle daivādeveti niścayī | tṛptaḥ svasthendriyo nityaṃ na vāñchati na śocati || ११ | ३ ||
सुखदुःखे जन्ममृत्यू दैवादेवेति निश्चयी।
साध्यादर्शी निरायासः कुर्वन्नपि न लिप्यते॥११।४॥
sukhaduḥkhe janmamṛtyū daivādeveti niścayī | sādhyādarśī nirāyāsaḥ kurvannapi na lipyate || ११ | ४ ||
चिन्तया जायते दुःखं नान्यथेहेति निश्चयी।
तया हीनः सुखी शान्तः सर्वत्र गलितस्पृहः॥११।५॥
cintayā jāyate duḥkhaṃ nānyatheheti niścayī | tayā hīnaḥ sukhī śāntaḥ sarvatra galitaspṛhaḥ || ११ | ५ ||
नाहं देहो न मे देहो बोधोऽहमिति निश्चयी।
कैवल्यमिव संप्राप्तो न स्मरत्यकृतं कृतम्॥११।६॥
nāhaṃ deho na me deho bodho’hamiti niścayī | kaivalyamiva saṃprāpto na smaratyakṛtaṃ kṛtam || ११ | ६ ||
आब्रह्मस्तम्बपर्यन्तमहमेवेति निश्चयी।
निर्विकल्पः शुचिः शान्तः प्राप्ताप्राप्तविनिर्वृतः॥११।७॥
ābrahmastambaparyantamahameveti niścayī | nirvikalpaḥ śuciḥ śāntaḥ prāptāprāptavinirvṛtaḥ || ११ | ७ ||
नानाश्चर्यमिदं विश्वं न किञ्चिदिति निश्चयी।
निर्वासनः स्फूर्तिमात्रो न किञ्चिदिव शाम्यति॥११।८॥
nānāścaryamidaṃ viśvaṃ na kiñciditi niścayī | nirvāsanaḥ sphūrtimātro na kiñcidiva śāmyati || ११ | ८ ||